மோசமான வானிலையால் காய்கறி விலைகள் மேலும் உயரக்கூடும்!

பாதிக்கப்பட்டுள்ளதால், வரும் நாட்களில் காய்கறி விலைகள் மேலும் அதிகரிக்கக்கூடும் என எதிர்பார்க்கப்படுகிறது.

அதேவேளை, தற்போது நிலவும் மழையுடனான காலநிலை மேலும் சில நாட்களுக்குத் தொடரலாம் என வானிலை அவதானிப்பு நிலையம் நேற்று எச்சரித்துள்ளது.

மேல் மற்றும் சபரகமுவ மாகாணங்களிலும், புத்தளம், காலி மற்றும் மாத்தறை மாவட்டங்களிலும் அவ்வப்போது மழை பெய்யக்கூடும் எனத் திணைக்களம் தெரிவித்துள்ளது.

இதனால் உள்ளூர் சந்தைகளில் காய்கறி தட்டுப்பாடு ஏற்பட்டு விலைகள் மேலும் உயரக்கூடும் என வர்த்தகர்கள் மத்தியில் கவலை எழுந்துள்ளது.

மேனிங் சந்தை வர்த்தகர் சங்கத்தின் முன்னாள் தலைவர் எஸ். எம். உபசேன 'டெய்லி மிரர்' (Daily Mirror) நாளிதழுக்கு கருத்துத் தெரிவிக்கையில், தற்போது ஓரளவுக்குக் காய்கறி விநியோகம் உள்ள போதிலும், வரும் நாட்களில் கடுமையான தட்டுப்பாடு நிலவக்கூடும் என்றார்.

"விநியோகக் குறைபாடு காரணமாக வரும் நாட்களில் விலைகள் அதிகரிக்கும் சாத்தியம் உள்ளது. மேலும், மோசமான வானிலை காரணமாகக் கடந்த இரண்டு நாட்களாகக் காய்கறி விற்பனை ஓரளவுக்குக் குறைந்துள்ளது.

மோசமான வானிலையால் சந்தைக்கு வரும் மக்களின் வருகை பெருமளவில் குறைந்துள்ளது," என்றும் அவர் குறிப்பிட்டார்.

பாதிப்புகள் மற்றும் மழைவீழ்ச்சி விபரம்:

நேற்றைய தினத்திலும் நாட்டின் பல பகுதிகளில் மோசமான வானிலை நீடித்தது. புத்தளம், கொழும்பு, களுத்துறை, மட்டக்களப்பு, மொனராகலை, காலி மற்றும் இரத்தினபுரி ஆகிய 7 மாவட்டங்களில் 1,113 குடும்பங்களைச் சேர்ந்த 3,475 பேர் பாதிக்கப்பட்டுள்ளனர்.

அதிகூடிய மழைவீழ்ச்சியாகப் புத்தளத்தில் 256 மி.மீ மழை பதிவாகியுள்ளது. கெஸ்பேவ மற்றும் நவகத்தேகம ஆகிய பகுதிகளில் 77 மி.மீ மழையும், காலியில் 72 மி.மீ மழையும் பதிவாகியுள்ளது.

நீர்த்தேக்கங்கள் வான்பாய்தல்:

அனுராதபுரத்தின் இராஜாங்கனை மற்றும் நாச்சாதுவ, திஸ்ஸமஹாராமவின் லுணுகம்வெஹெர, திஸ்ஸ வாவி, வீரவில மற்றும் யோத வாவி, கல்கமுவவின் அம்பகொல வாவி மற்றும் உஸ்கல சியம்பலாங்கமுவ, நிக்கவெரட்டியவின் மெடியாவாவ மற்றும் மாகல்ல, தம்புளையின் நாலந்த மற்றும் வேமெடில்ல, புத்தளத்தின் இகிணிமிட்டிய, தப்போவ மற்றும் மன்னார் யோத வாவி உட்பட 18 பிரதான நீர்த்தேக்கங்களும், 20 சிறிய அளவிலான குளங்களும் வான்பாய்கின்றன.

சாரதிகளுக்கான அவசர அறிவுறுத்தல்:

மலையகப் பகுதிகளில் நிலவும் அடர்ந்த மூடுபனி, பலத்த மழை மற்றும் பலத்த காற்று காரணமாக ஏற்படக்கூடிய ஆபத்துகள் குறித்து அவதானமாக இருக்குமாறு பொலிஸ் போக்குவரத்துப் பிரிவினர் சாரதிகளைக் கேட்டுக்கொண்டுள்ளனர்.

எதிர்பாராதவிதமாக மண்சரிவுகள் மற்றும் பாறைகள் சரிந்து விழுந்து வீதிகள் தடைப்படக்கூடும் என்பதால், மூடுபனி உள்ள பகுதிகளினூடாகப் பயணிக்கும் போது வாகனங்களின் முகப்பு விளக்குகள் (Headlights) மற்றும் பனி விளக்குகளை (Fog lights) ஒளிரச் செய்யுமாறு பொலிஸார் அறிவுறுத்தியுள்ளனர்.