'அவசரகாலச் சட்டம் அமுலில் உள்ள போதும் இடம்பெறும் கொலைகள் குறித்து அரசாங்கம் நாட்டுக்கு விளக்கமளிக்க வேண்டும்!'

தலைவர் சஜித் பிரேமதாச விசேட அறிக்கையொன்றை வெளியிட்டுள்ளார்.

அதிஉயர் பாதுகாப்பு வலயங்களில் கூட 'சிகாகோ பாணியில்' இடம்பெறும் இவ்வாறான மனிதப் படுகொலைகள் குறித்து அரசாங்கம் நாட்டுக்குத் தெளிவுபடுத்த வேண்டும் என எதிர்க்கட்சித் தலைவர் அந்த அறிக்கையில் சுட்டிக்காட்டியுள்ளார்.

குறித்த கொலைச் சம்பவம் தொடர்பில் தான் மிகுந்த அதிர்ச்சியடைந்துள்ளதாகவும், இந்தச் சம்பவமானது நாட்டில் தற்போது நிலவும் பாரிய அனர்த்தகரமான நிலைமை குறித்து மீண்டும் ஒருமுறை எச்சரிக்கை விடுத்துள்ளதாகவும் அவர் குறிப்பிட்டுள்ளார்.

தற்போதைய அரசாங்கம் ஆட்சிக்கு வருவதற்கு முன் முன்வைத்த பிரதான கோஷங்களில் ஒன்று 'சட்டம் ஒழுங்கு சீர்குலைந்துள்ளமை' என்பதாகும். அது குறித்துத் தம்மால் பாடம் புகட்ட முடியும் என மேடைகளில் அவர்கள் ஆற்றிய உரைகள் இந்தத் தருணத்தில் மீண்டும் நினைவுக்கு வருவதாகத் தெரிவித்துள்ள சஜித் பிரேமதாச, இந்த மிலேச்சத்தனமான கொலையானது நாட்டின் சட்டம் ஒழுங்கு சீர்குலைந்துள்ளதையும், அதனைப் பாதுகாப்பதற்கு அரசாங்கத்திற்கு இயலுமை இல்லை என்பதையுமே மீண்டும் வெளிப்படுத்தியுள்ளதாகக் கூறியுள்ளார்.

சட்டம் ஒழுங்கைப் பாதுகாப்பதற்கு அரசாங்கம் எடுக்கும் நடவடிக்கைகள் வெறும் ஊடகச் சாகசங்கள் (Media Shows) மாத்திரமே என்பது இதன் மூலம் மிகத் தெளிவாகிறது. பாதாள உலகத்தை ஒடுக்குவதாகக் கூறும் அரசாங்கம், இடம்பெறும் ஒவ்வொரு கொலையையும் பாதாள உலகம் அல்லது போதைப்பொருள் கடத்தல்காரர்கள் மீது சுமத்தித் தனது பொறுப்பிலிருந்து தட்டிக்கழிக்க முயல்வதைத் தான் கண்டிப்பதாக எதிர்க்கட்சித் தலைவர் தனது அறிக்கையில் சுட்டிக்காட்டியுள்ளார்.

மேலும், இந்தக் கொலையானது நாட்டின் சட்டத்தின் ஆட்சிக்கும் (Rule of Law) சட்டச் செயற்பாடுகளுக்கும் விடுக்கப்பட்டுள்ள பாரிய சவாலாகும் எனத் தெரிவித்துள்ள அவர், மக்களின் வாழ்க்கையைப் பாதுகாப்பதற்குச் சட்டம் ஒழுங்கைப் பேணுவதும், நீதியான சமூகமொன்றின் நிலைப்பாட்டிற்காகச் சட்டத்தின் ஆட்சியை உறுதிப்படுத்துவதும் அரசாங்கம் கைவிட முடியாத பொறுப்பாகும் என்றும் குறிப்பிட்டுள்ளார்.

எனவே, இந்த மிலேச்சத்தனமான கொலை குறித்து உடனடியாக விசாரணைகளை முன்னெடுத்து, பொறுப்புக்கூற வேண்டியவர்களை சட்டத்தின் முன் நிறுத்த அரசாங்கம் நடவடிக்கை எடுக்க வேண்டும். அத்துடன், அதிஉயர் பாதுகாப்பு வலயத்தில் கூட சீர்குலைந்துள்ள தேசிய பாதுகாப்பை உறுதிப்படுத்துவதற்கு அரசாங்கம் தாமதமின்றிப் நடவடிக்கை எடுக்க வேண்டும் எனவும் சஜித் பிரேமதாச வலியுறுத்தியுள்ளார்.

அரசாங்கத்தினால் அவசரகாலச் சட்டம் அமுல்படுத்தப்பட்டு, நாடு முழுவதும் சட்டம் ஒழுங்கைப் பேணுவதற்காக முப்படைகளும் அழைக்கப்பட்டுள்ள ஒரு தருணத்தில், இவ்வாறான சம்பவங்கள் அதிஉயர் பாதுகாப்பு வலயத்தில் இடம்பெறுவது குறித்து அரசாங்கம் உடனடியாக நாட்டுக்கு விளக்கமளிக்க வேண்டும் என எதிர்க்கட்சித் தலைவர் சஜித் பிரேமதாச வெளியிட்டுள்ள அறிக்கையில் மேலும் தெரிவிக்கப்பட்டுள்ளது.