கனவாகவே இருந்து வருகின்றது.
அந்தத் துரதிஷ்டவசமான நிலையைச் சமூக எதார்த்தமாக்கி, ஈரானின் மனித உரிமைகளுக்காகத் தொடர்ச்சியாகக் குரல் கொடுத்து வரும் நோபல் அமைதிப் பரிசு வெற்றியாளர் நர்கீஸ் முகமதிக்கு (Narges Mohammadi) எதிராக அந்நாட்டு நீதிமன்றம் மீண்டும் ஏழரை ஆண்டுகள் சிறைத்தண்டனை விதித்துள்ளது.
அவரது சட்டத்தரணி முஸ்தபா நிலி சமூக வலைத்தளங்கள் ஊடாக உறுதிப்படுத்தியதற்கமைய, வடகிழக்கு மஷாட் நகரின் நீதிமன்றமொன்றினால் இந்தத் தீர்ப்பு வழங்கப்பட்டுள்ளது. இதன்போது, “கூட்டங்களை நடாத்துதல் மற்றும் சதி செய்தல்” என்ற குற்றச்சாட்டின் கீழ் ஆறு ஆண்டுகளும், “அரசுக்கு எதிரான பிரசார நடவடிக்கைகள்” தொடர்பில் ஒன்றரை ஆண்டுகளும் என இந்தப் புதிய தண்டனைகள் விதிக்கப்பட்டுள்ளன.
எனினும், பெண்களின் குறைகளைச் சமூகமயப்படுத்துவதில் அதிக ஆர்வம் காட்டும் இலங்கை ஊடகவியலாளர்கள் இது குறித்துப் போதிய கவனம் செலுத்தவில்லை.
53 வயதான நர்கீஸ் முகமதிக்கு, 2023ஆம் ஆண்டு நோபல் அமைதிப் பரிசு வழங்கப்பட்டது. ஈரானியப் பெண்களுக்கு எதிராகத் தொடர்ச்சியாக முன்னெடுக்கப்படும் ஒடுக்குமுறைகளுக்கு எதிராகவும், மனித உரிமைகளை மேம்படுத்துவதற்காகவும் அவர் காட்டிய தளராத துணிச்சலுக்காகவே இந்த கௌரவம் வழங்கப்பட்டது. ஆயினும், சமூக ரீதியாக அந்த கௌரவத்தை அனுபவிப்பதற்குக்கூட அவருக்குச் சுதந்திரம் இல்லை.
தொழில் ரீதியாக ஒரு பொறியியலாளரும், பௌதிகவியல் பட்டதாரியுமான அவர், தற்போது தெஹ்ரானின் பேர்போன ‘எவின்’ (Evin) சிறைச்சாலையில் 31 வருடச் சிறைத்தண்டனையை அனுபவித்து வருகின்றார். கடந்த டிசம்பர் மாதம் நடைபெற்ற நினைவேந்தல் நிகழ்வொன்றில் “தூண்டல் கருத்துக்களை” வெளியிட்டதாகத் தெரிவித்தே ஈரானிய அதிகாரிகள் அவரைக் கைது செய்துள்ளனர்.
எவ்வாறாயினும், அந்தக் கைது நடவடிக்கையின் போது மேற்கொள்ளப்பட்ட தாக்குதல்கள் காரணமாக அவர் வைத்தியசாலையில் அனுமதிக்கப்பட வேண்டியிருந்ததாக அவரது குடும்ப உறுப்பினர்கள் தெரிவிக்கின்றனர். இது ஒரு நாகரிக மனித சமூகத்தில் எவ்வகையிலும் இடம்பெறக் கூடாத ஒரு விடயமாகும்.
ஈரானியப் பெண்களுக்குச் சுதந்திரத்தைப் பெற்றுக்கொடுப்பதற்காக நர்கீஸ் முன்னெடுக்கும் இந்தப் போராட்டத்திற்காக அவர் தனது தனிப்பட்ட வாழ்க்கையை முழுமையாக அர்ப்பணித்துள்ளார். நர்கீஸ் முகமதி 1999 ஆம் ஆண்டு ஊடகவியலாளரும் செயற்பாட்டாளருமான தகி ரஹ்மானியைத் திருமணம் செய்துகொண்டார். அவரும் அரசியல் செயற்பாடுகள் காரணமாகப் பல ஆண்டுகள் சிறைவாசம் அனுபவிக்க வேண்டியிருந்தது.
அவரது இரட்டைப் பிள்ளைகளான அலி மற்றும் கியென்னா குறித்த செய்தி மிகவும் உருக்கமானது. தாய் சிறையில் இருப்பதால் எட்டு வருடங்களாகப் பிள்ளைகளால் அவரைப் பார்க்க முடியாமல் போயுள்ளது. தற்போது பிரான்சில் வசிக்கும் இந்தப் பிள்ளைகள், தமது தாயின் அன்பைத் தொலைவில் இருந்து வரும் செய்திகள் ஊடாகவே உணர்ந்து கொள்கின்றனர்.
ஒரு தாயாகத் தான் அனுபவிக்கும் வலியை, தான் அர்ப்பணிப்புடன் செயற்படும் பொது நோக்கத்திற்காக அவர் மனதிற்குள் அடக்கி வைத்துள்ளார். ஒரு பொறியியலாளராக வெற்றிகரமான தொழில் வாழ்க்கையையும், ஒரு மனைவியாகச் சிறந்த இல்லற வாழ்க்கையையும் கொண்டிருப்பதற்கான இயல்பான உரிமையை, ஈரானியப் பெண்களின் நிம்மதிப் பெருமூச்சிற்காக அவர் ஏற்கனவே தியாகம் செய்துவிட்டார்.
நர்கீஸ் முகமதி இதுவரை 13 தடவைகள் கைது செய்யப்பட்டுள்ளதுடன், 5 தடவைகள் குற்றவாளியாகக் காணப்பட்டுள்ளார். எவ்வாறாயினும், விலங்குகளால் அவரது குரலை ஒடுக்க முடியாது என்பதை உலகம் அறியும்.
இவரது இந்தப் புதிய சிறைத்தண்டனைக்குச் சர்வதேச மனித உரிமை அமைப்புகள் கடும் கண்டனம் தெரிவித்துள்ளதோடு, அவரை உடனடியாக விடுதலை செய்யுமாறு உலக சமூகம் வலியுறுத்தி வருகின்றது.
இதற்காக இலங்கை பெண்களின் பங்களிப்பும் கிடைப்பது, முழு உலகப் பெண்களுக்காகவும் செய்யும் ஒரு உன்னத அர்ப்பணிப்பாக அமையும். அத்துடன், தற்போது ஈரானில் நிலவும் அரசியல் ஸ்திரமற்ற சூழ்நிலையில், ஒட்டுமொத்த ஈரானியப் பெண்களுக்கும் அவர் பெற்றுக்கொடுக்க முயலும் சுதந்திர ஒளி, விரைவில் உண்மையான எதார்த்தமாக மாறும் வாய்ப்புகள் தென்படுகின்றன.
சிறை மதில்களுக்குள் முடக்கப்பட்டிருந்தாலும், நர்கீஸ் முகமதி தற்போது ஈரானியப் பெண்களின் சுதந்திரத்தின் அடையாளமாக மாறிவிட்டார். இரும்புக்கம்பிகளால் சிறைப்படுத்த முடியாத அவரது மன உறுதி, அடிப்படைச் சுதந்திரத்திற்காகப் போராடும் உலகப் பெண்களுக்கு ஒரு வாழும் உதாரணமாகும்.