கலந்தவை. அதிகாலைப் பொழுதில் அருந்தும் முதல் கோப்பைத் தேநீர் அந்த நாளை உற்சாகப்படுத்துவதுடன், நண்பகல் வேளைகளில் அலுவலக மேசைகளிலும் கிராமத்துத் திண்ணைகளிலும் இடம்பெறும் உரையாடல்களுக்கு உயிர் கொடுக்கின்றது.
இவ்வாறானதொரு பின்னணியில், நாளொன்றுக்கு இரண்டு அல்லது மூன்று கோப்பைகள் தேநீர் அல்லது கோப்பி அருந்துவது மறதிநோய் (Dementia) அபாயத்தைக் குறைப்பதாக உலகளாவிய ரீதியில் வெளியாகியுள்ள செய்திகள் எமது நாட்டில் பெரும் கவனத்தை ஈர்த்துள்ளன.
ஆய்வுகளின் பின்னணி
கெஃபைன் (Caffeine) மற்றும் மூளை ஆரோக்கியம் குறித்து மேற்கொள்ளப்பட்ட பாரிய நீண்டகால ஆய்வொன்றின் மூலமே இந்தத் தகவல் வெளியாகியுள்ளது. அமெரிக்காவின் ‘தாதியர் சுகாதார ஆய்வு’ (Nurses’ Health Study) மற்றும் ‘சுகாதார நிபுணர்களின் தொடர் ஆய்வு’ ஆகியவற்றில் பங்கேற்ற 131,821 நபர்களின் தரவுகளை ஆய்வாளர்கள் சுமார் 43 வருடங்களாகப் பகுப்பாய்வு செய்துள்ளனர்.
அமெரிக்க மருத்துவ சங்கத்தின் இதழில் (JAMA) வெளியிடப்பட்டுள்ள இந்த ஆய்வின் முடிவுகளின்படி, வழமையாகக் கெஃபைன் கலந்த கோப்பி அல்லது தேநீர் அருந்துபவர்களுக்கு, அவற்றை அரிதாக அருந்துபவர்களுடன் ஒப்பிடுகையில் மறதிநோய் ஏற்படும் அபாயம் 15 முதல் 20 சதவீதத்தால் குறைவாகக் காணப்படுகின்றமை கண்டறியப்பட்டுள்ளது.
புள்ளிவிபரங்கள் தரும் உண்மை
அதிகளவு கோப்பி அருந்துபவர்களுக்கு மறதிநோய் அபாயம் 18 சதவீதம் குறைவாகக் காணப்பட்டதுடன், நாளொன்றுக்கு ஒன்று முதல் இரண்டு கோப்பைகள் தேநீர் அருந்துபவர்களிடமும் குறிப்பிடத்தக்க அளவு அபாயக் குறைவு தென்பட்டுள்ளது. எனினும், கெஃபைன் நீக்கப்பட்ட (Decaffeinated) கோப்பியில் இவ்வாறான சாதகமான முடிவுகள் எட்டப்படவில்லை. இதன்மூலம், மூளை ஆரோக்கியத்தில் 'கெஃபைன்' முக்கிய பங்காற்றுவது ஓரளவுக்கு உறுதியாகியுள்ளது.
அத்துடன், ஐக்கிய இராச்சியத்தின் 'Biobank' தரவுகளைக் கொண்டு 50 முதல் 74 வயதுடைய 365,000 பேரிடம் மேற்கொள்ளப்பட்ட ஆய்விலும், மிதமான அளவில் தேநீர் மற்றும் கோப்பி அருந்துவது மறதிநோய் மற்றும் பக்கவாதம் (Stroke) ஏற்படும் அபாயத்தைக் குறைப்பதாகத் தெரிவிக்கப்பட்டுள்ளது.
மூளை ஆரோக்கியத்தை இவை எவ்வாறு பாதுகாக்கின்றன?
தேநீர் மற்றும் கோப்பியில் உள்ள பொலிஃபீனால்கள் (Polyphenols) மற்றும் ஒக்ஸிஜனேற்ற எதிர்ப்பிகள் (Antioxidants) மூளையில் ஏற்படும் வீக்கங்களைக் குறைப்பதற்கும், மூளை முதுமையடைவதைத் தடுப்பதற்கும் உதவுகின்றன. மேலும், கெஃபைன் ஆனது இரத்த நாளங்களின் செயற்பாட்டைச் சீர்செய்வதுடன், மறதிநோயுடன் தொடர்புடைய இரண்டாம் வகை நீரிழிவு நோய்க்கான அபாயத்தையும் குறைக்கின்றது.
இருப்பினும், இவை அவதானிப்பு ஆய்வுகள் (Observational studies) மாத்திரமே என்பதை நினைவில் கொள்ள வேண்டும். அதாவது, கோப்பி அருந்துவது நேரடியாக மறதிநோயைத் தடுக்கும் என்பதற்கு இதுவொரு முற்றுமுழுதான ஆதாரமல்ல. உயர் இரத்த அழுத்தம் போன்ற ஏனைய உடல்நலக் காரணிகளும் இதில் செல்வாக்கு செலுத்தக்கூடும்.
இலங்கையில் அதிகரித்து வரும் மறதிநோய் அச்சுறுத்தல்
இலங்கையைப் பொறுத்தமட்டில் இது மிகவும் அவசரமானதொரு பேசுபொருளாகும். தற்போது இலங்கையில் சுமார் 200,000 பேர் மறதிநோயுடன் வாழ்ந்து வருவதாக மதிப்பிடப்பட்டுள்ளதுடன், சனத்தொகை முதுமையடைந்து வருவதால் இந்த எண்ணிக்கை வருங்காலத்தில் மேலும் அதிகரிக்கக்கூடும்.
உலகத்தரம் வாய்ந்த தேயிலையை உற்பத்தி செய்யும் நாடாக இலங்கை இருந்தபோதிலும், எமது தேநீர் கலாசாரம் சற்று வித்தியாசமானது. நாம் அதிக இனிப்பு மற்றும் பால் சேர்த்து தேநீர் அருந்தும் பழக்கம் கொண்டவர்கள். அத்துடன், மேற்கத்திய நாடுகளின் வாழ்க்கை முறையிலிருந்து இலங்கையர்களின் உணவுப் பழக்கம் மற்றும் மரபணுக்கள் மாறுபட்டவை என்பதால், இலங்கையர்களுக்கென பிரத்தியேகமான தேசிய மட்ட ஆய்வுகள் முன்னெடுக்கப்பட வேண்டியதன் அவசியம் இங்கு வலியுறுத்தப்படுகின்றது.
இலங்கையர்களுக்கான இறுதிச் செய்தி
அப்படியானால், மறதிநோயைத் தடுக்க அதிகளவு தேநீர் அருந்த வேண்டுமா? இல்லை. மிதமான அளவே சிறந்தது என ஆய்வுகள் கூறுகின்றன. அளவுக்கு அதிகமான கெஃபைன் தூக்கமின்மை மற்றும் பதற்றத்தை ஏற்படுத்தி, மூளை ஆரோக்கியத்தைப் பாதிக்கக்கூடும்.
மூளைப் பாதுகாப்பு என்பது ஒரு பழக்கத்தால் மாத்திரம் வருவதல்ல; அது ஒரு வாழ்க்கை முறை.
முறையான உடற்பயிற்சி
போதுமான உறக்கம்
இரத்த அழுத்தம் மற்றும் நீரிழிவைக் கட்டுப்பாட்டில் வைத்திருத்தல்
சமூக உறவுகளைப் பேணுதல்
ஆகியவை மிக முக்கியமானவை. ஒரு கோப்பைத் தேநீரை நண்பர்களுடன் பகிர்ந்து கொள்ளும்போது ஏற்படும் அந்த உரையாடலும் சமூகத் தொடர்பும் கூட உங்கள் மூளைக்கு ஒரு மருந்தாக அமையலாம்.
இலங்கையில் மறதிநோய் பற்றிய விழிப்புணர்வை ஏற்படுத்தவும், முதியோர்களைக் கண்ணியத்துடன் பராமரிக்கவும் இத்தகைய செய்திகள் ஒரு தூண்டுகோலாக அமைந்தால், அதுவே மிகப்பெரிய வெற்றியாகும்.
-Daily Mirror