பெரும்பான்மையான இடங்களைக் கைப்பற்றி பாரிய வெற்றியைப் பெற்றுள்ளதாக அந்நாட்டுத் தொலைக்காட்சிகள் செய்தி வெளியிட்டுள்ளன.
தெற்காசிய நாடான பங்களாதேஷில் அரசியல் ஸ்திரத்தன்மையை மீண்டும் நிலைநாட்டும் நோக்கில் இடம்பெற்ற இந்த முக்கியத்துவம் வாய்ந்த தேர்தலில், மக்கள் இக்கட்சிக்குத் தெளிவான ஆணையை வழங்கியுள்ளனர்.
கடந்த 2024 ஆம் ஆண்டில், நீண்டகாலமாகப் பிரதமராக இருந்த ஷேக் ஹசீனாவின் ஆட்சியை வீட்டுக்கு அனுப்பிய 'ஜெனரேஷன் இசட்' (Gen Z) எனப்படும் இளைய தலைமுறையினரின் புரட்சிக்குப் பின்னர் இடம்பெற்ற முதலாவது தேர்தல் இதுவாகும். கடந்த வியாழக்கிழமை இந்தத் தேர்தல் நடைபெற்றது.
சுமார் 175 மில்லியன் மக்கள் தொகையைக் கொண்ட இந்த முஸ்லிம் பெரும்பான்மை நாட்டில், கடந்த சில மாதங்களாக ஷேக் ஹசீனாவுக்கு எதிராக இடம்பெற்ற வன்முறைப் போராட்டங்களினால் மக்களின் இயல்பு வாழ்க்கை பாதிக்கப்பட்டதோடு, உலக அளவில் ஆடை ஏற்றுமதியில் இரண்டாம் இடத்தில் உள்ள அந்நாட்டின் ஆடைத் தொழிற்றுறையும் பெரும் சரிவைச் சந்தித்திருந்தது. இந்நிலையில், நாட்டின் அமைதிக்கு இந்தத் தேர்தலின் முடிவு மிக முக்கியமானதாகக் கருதப்பட்டது.
அண்மைக்காலமாக தெற்காசியப் பிராந்தியத்தில் 30 வயதுக்குட்பட்ட இளைஞர்களால் முன்னெடுக்கப்பட்டு வரும் கிளர்ச்சிகளுக்குப் பிந்தைய முதலாவது தேசியத் தேர்தல் இது என்பதும் குறிப்பிடத்தக்கது. இதேவேளை, நேபாளத்திலும் அடுத்த மாதம் தேர்தல் நடைபெறவுள்ளது.
தேர்தலுக்கு முந்தைய கருத்துக்கணிப்புகள் பி.என்.பி கட்சிக்குச் சாதகமாக இருந்த நிலையில், அக்கட்சி எதிர்பார்த்தபடியே வெற்றியை நிலைநாட்டியுள்ளது. 300 இடங்களைக் கொண்ட 'ஜாதிய சங்கத்' (தேசிய நாடாளுமன்றம்) சபையில், பி.என்.பி தலைமையிலான கூட்டணி 209 இடங்களைக் கைப்பற்றி, மூன்றில் இரண்டு பெரும்பான்மையைப் பெற்றுள்ளதாக ஜமுனா தொலைக்காட்சி (Jamuna TV) தெரிவித்துள்ளது.
வாக்கு எண்ணிக்கை முடிவில் தமக்கு பெரும்பான்மை உறுதியானதை அடுத்து, கட்சித் தலைமை மக்களுக்கு நன்றிகளையும் வாழ்த்துகளையும் தெரிவித்தது. அத்துடன், நாட்டின் நல்வாழ்வுக்காகவும் மக்களின் நலனுக்காகவும் வெள்ளிக்கிழமை விசேட பிரார்த்தனைகளில் ஈடுபடுமாறு கோரிக்கை விடுத்துள்ளது.
"தேசிய நாடாளுமன்றத் தேர்தலில் பெரும் வாக்கு வித்தியாசத்தில் வெற்றி பெற்றிருந்தாலும், பி.என்.பி கட்சியினர் எவ்வித வெற்றிக் கொண்டாட்டங்களையோ அல்லது பேரணிகளையோ நடத்தக்கூடாது" என அக்கட்சி விடுத்த அறிக்கையில் வலியுறுத்தப்பட்டுள்ளது.
அதற்குப் பதிலாக, நாடு முழுவதும் உள்ள மசூதிகள், கோயில்கள், தேவாலயங்கள் மற்றும் பகோடாக்களில் வழிபாடுகளில் ஈடுபடுமாறு மக்களைக் கேட்டுக்கொண்டுள்ளது.
முன்னாள் பிரதமர் காலேதா ஜியா மற்றும் முன்னாள் அதிபர் ஜியாவுர் ரஹ்மான் ஆகியோரின் புதல்வரான 60 வயதுடைய தாரிக் ரஹ்மான், பி.என்.பி கட்சியின் பிரதமர் வேட்பாளராக முன்னிறுத்தப்பட்டுள்ளார்.
ஏழை குடும்பங்களுக்கு நிதியுதவி வழங்குதல், ஒருவர் பிரதமர் பதவியில் இருப்பதற்கு 10 ஆண்டுகள் என்ற கால எல்லையை நிர்ணயித்தல், வெளிநாட்டு முதலீடுகள் மூலம் பொருளாதாரத்தை மேம்படுத்துதல் மற்றும் ஊழலுக்கு எதிரான கடுமையான கொள்கைகள் போன்றவை இக்கட்சியின் முக்கிய தேர்தல் வாக்குறுதிகளாக அமைந்திருந்தன.