அமரக்கீர்த்தி கொலை வழக்கு தீர்ப்புக்கு எதிராக சட்டமா அதிபர் மேன்முறையீடு!

வழக்குத் தீர்ப்புக்கு எதிராக, மேன்முறையீட்டு நீதிமன்றத்தில் மேன்முறையீடு செய்வதற்கு சட்டமா அதிபர் தீர்மானித்துள்ளார்.

வெளியாகியுள்ள தீர்ப்பின்படி, இந்த கொலைச் சம்பவத்துடன் தொடர்புடைய குற்றச்சாட்டுகள் நிரூபிக்கப்பட்டவர்களின் எண்ணிக்கை இதைவிட அதிகமாக இருக்க வேண்டும் என்பதே சட்டமா அதிபர் திணைக்களத்தின் நிலைப்பாடாக உள்ளது.

இந்த வழக்கை வழிநடத்திய பிரதி சொலிசிட்டர் ஜெனரல் தலைமையிலான சட்ட வல்லுநர்கள் குழு, பின்வரும் முக்கிய விடயங்களைச் சுட்டிக்காட்டியுள்ளது:

தற்போது விடுவிக்கப்பட்டவர்களில் மேலும் பலருக்கு தண்டனை வழங்கப்பட்டிருக்க வேண்டும்.

பாதிக்கப்பட்ட தரப்பினருக்கு முழுமையான நீதியையும் நியாயத்தையும் பெற்றுக்கொடுப்பதற்கு, தற்போதைய தீர்ப்புக்கு எதிராக மேன்முறையீடு செய்வது அவசியமாகும்.

இதனடிப்படையில், குறித்த தீர்ப்புக்கு எதிராக மேன்முறையீட்டு நீதிமன்றத்தில் விடயங்களை முன்வைப்பதற்கான அனுமதியை சட்டமா அதிபர் வழங்கியுள்ளதாக மேலதிகத் தகவல்கள் தெரிவிக்கின்றன.

இதேவேளை, அமரக்கீர்த்தி கொலை வழக்குத் தீர்ப்புக்கு மொட்டுக் கட்சி வரவேற்பளித்துள்ளது.

முன்னாள் நாடாளுமன்ற உறுப்பினர் அமரக்கீர்த்தி அத்துக்கோரலவின் மிலேச்சத்தனமான கொலைச் சம்பவத்துடன் தொடர்புடையவர்களுக்கு மரண தண்டனை விதிக்கப்பட்டமையானது, நாட்டின் நீதித்துறை சுதந்திரமாக இயங்குவதை உறுதிப்படுத்தியுள்ளதாக முன்னாள் அமைச்சர் லக்ஷ்மன் யாப்பா அபேவர்தன தெரிவித்துள்ளார்.

இது குறித்து அவர் மேலும் குறிப்பிடுகையில்:

"பொதுமக்களைத் தூண்டிவிட்டவர்களுக்கு மக்கள் ஆட்சியை வழங்கியதைப் போலவே, மிலேச்சத்தனமான கொலையாளிகளுக்கு நீதிமன்றம் மரண தண்டனையை வழங்கியுள்ளது. இத்தீர்ப்பின் மூலம் நாட்டில் சட்டம் சீர்குலைந்துவிடவில்லை என்பதும், நீதித்துறையின் சுயாதீனம் பாதுகாக்கப்பட்டுள்ளதும் உறுதியாகியுள்ளது. மனித உயிர்களை மிலேச்சத்தனமாகப் பறிப்பவர்களுக்கு இத்தீர்ப்பு ஒரு பலமான எச்சரிக்கையாக அமையும்."

மேலும், கொலைக் குற்றவாளிகளைப் பெற்றெடுத்த பெற்றோர்களும் உறவினர்களும் இன்று கண்ணீர் வடிக்க நேரிட்டுள்ளது. அன்று அமரக்கீர்த்தி எம்.பி.யின் மனைவியும் பிள்ளைகளும் அனுபவித்த அதே வேதனையை இன்று இந்தக் கொலையாளிகளின் குடும்பங்களும் அனுபவிக்க நேரிட்டுள்ளது எனவும் அவர் சுட்டிக்காட்டினார்.

கடந்த 'அரகலய' போராட்டக் காலப்பகுதியில் வீடுகள் மற்றும் சொத்துக்கள் தீக்கிரையாக்கப்பட்ட சம்பவங்களுக்கு இந்தத் தீர்ப்பு ஒரு சிறந்த முன்னுதாரணம் எனத் தெரிவித்த லக்ஷ்மன் யாப்பா, பாதுகாப்பு கேமரா காட்சிகள் மற்றும் சாட்சியங்களின் அடிப்படையில் சொத்துக்களை அழித்தவர்கள் அடையாளம் காணப்பட்டுள்ளதாகக் குறிப்பிட்டார்.

1983 மற்றும் 1989 காலப்பகுதிகளில் சேதமடைந்த சொத்துக்களுக்கு நட்டயீடு வழங்கப்பட்டதைச் சுட்டிக்காட்டிய அவர், போராட்டத்தின் போது சேதமாக்கப்பட்ட அரசியல்வாதிகள் மற்றும் பொதுமக்களின் வீடுகளுக்கு அரசாங்கம் நட்டயீடு வழங்க நடவடிக்கை எடுக்க வேண்டும் எனவும் வலியுறுத்தினார்.

தற்போதைய ஆட்சியையும் நாடாளுமன்றச் செயற்பாடுகளையும் விமர்சித்த அவர், அவை ஒரு திரைப்படக் காட்சி போல அமைந்துள்ளதாகக் குறிப்பிட்டார். தேர்தலுக்கு முன்னர் சூரர்களைப் போலவும், தேர்தல் காலத்தில் சண்டியர்களைப் போலவும் செயற்பட்டவர்கள், தற்போது நாடாளுமன்றத்தில் வெறும் நகைச்சுவையாளர்களாக மாறி வாக்குறுதிகளைக் காற்றில் பறக்கவிட்டுள்ளதாக அவர் சாடினார். குறிப்பாக, சபாநாயகரின் செயற்பாடுகளும் இன்று கேலிக்குரியதாக மாறியுள்ளதாக அவர் மேலும் தெரிவித்தார்.