அமெரிக்காவின் வொஷிங்டன் டி.சி. நகரில் அமைந்துள்ள இலங்கைத் தூதரகத்தினால் உற்சாக வரவேற்பு அளிக்கப்பட்டுள்ளது.
2026 பெப்ரவரி 10ஆம் திகதி வொஷிங்டன் நகரை வந்தடைந்த இந்த நடைபயணத்தில் பங்கேற்ற பௌத்த துறவிகளுக்கு கௌரவம் அளிக்கும் வகையில் இலங்கைத் தூதரகம் விசேட ஏற்பாடுகளைச் செய்திருந்தது.
இந்தச் சமாதான நடைபயணத்தில் கலந்துகொண்ட 200-க்கும் மேற்பட்ட பௌத்த துறவிகளுக்காக, அங்குள்ள தேசிய ஐக்கிய மெதடிஸ்த தேவாலயத்தில் (National United Methodist Church) விசேட மதிய போசனை (தானம்) வழங்கப்பட்டது. இதற்கு இலங்கைத் தூதரகம் முழுமையான பங்களிப்பை வழங்கியிருந்ததுடன், இதன்போது பாரம்பரிய இலங்கை உணவுகள் பரிமாறப்பட்டன. வொஷிங்டன் டி.சி., மேரிலாண்ட் மற்றும் வேர்ஜினியா ஆகிய மாநிலங்களில் வாழும் இலங்கைச் சமூகத்தினர் இந்த நிகழ்வை ஒருங்கிணைப்பதில் முனைப்புடன் செயற்பட்டனர்.
கொலம்பியா மாவட்டச் செயலாளர் கிம்பர்லி ஏ. பாசெட்டின் (Kimberly A. Basset) அழைப்பின் பேரில், வொஷிங்டன் தேசிய கதீட்ரலில் (Washington National Cathedral) நடைபெற்ற விசேட சர்வமத வழிபாட்டு நிகழ்வில் அமெரிக்காவிற்கான இலங்கைத் தூதுவர் மஹிந்த சமரசிங்க கலந்துகொண்டார். ஆயிரக்கணக்கான மக்கள் பங்கேற்ற இந்நிகழ்வில், தூதரகத்தின் பிரதித் தூதுவர் மதுக்க விக்கிரமாராச்சியும் கலந்துகொண்டார்.
தூதரகத்திற்கு முன்னால் விசேடமாக அமைக்கப்பட்டிருந்த மேடையில் சமாதான நடைபயணக் குழுவினர் வரவேற்கப்பட்டனர். இதன்போது, மகா சங்கத்தினருக்குத் தூதுவர் மஹிந்த சமரசிங்கவினால் 'அட்டபிரிகார' பூசைப் பொருட்கள் வழங்கிக் கௌரவிக்கப்பட்டன.
விசேட நிகழ்வாக, நடைபயணத்தில் பங்கேற்ற வணக்கத்திற்குரிய பஞ்ஞாக்கர தேரரின் காவி உடை மீது, இலங்கையின் தேசியக் கொடி பொறிக்கப்பட்ட இலச்சினை (Badge) தூதுவரால் அணிவிக்கப்பட்டது.
தூதரக ஊழியர்களும் அங்கிருந்த இலங்கையர்களும் மலர் தூவி நடைபயணக் குழுவினருக்குத் தமது மரியாதையைச் செலுத்தியதுடன், அதில் பங்கேற்ற அனைத்து பக்தர்களுக்கும் குடிநீர் வசதிகளையும் செய்து கொடுத்தனர். நிகழ்வின் இறுதியில், தூதுவர் உள்ளிட்ட குழுவினர் துறவிகளுடன் இணைந்து சிறிது தூரம் நடைபயணத்தில் ஈடுபட்டுத் தமது ஆதரவை வெளிப்படுத்தினர்.
