அரசுக்கு இப்போது ஒரு முதலமைச்சர் கிடைத்துள்ளார். அவர் தான் ஜோசப் விஜய் சந்திரசேகர் அல்லது 'தளபதி' விஜய்.
108 இடங்கள் என்ற எல்லையில் இருந்த 'தமிழக வெற்றிக் கழக'த்தின் தலைவரான விஜய், தனக்கு 120 உறுப்பினர்களின் ஆதரவு இருப்பதாகத் தெரிவித்ததையடுத்து, மாநில அரசைக் அமைக்க வருமாறு அவருக்கு அழைப்பு விடுக்க வேண்டிய நிலைக்கு ஆளுநர் தள்ளப்பட்டார்.
விஜய் ஆட்சியைப் பிடிப்பதற்கு காங்கிரஸ் கட்சியின் ஐந்து சட்டமன்ற உறுப்பினர்களும், இடதுசாரிக் கட்சிகளும் மற்றும் சிறிய குழுக்களும் உதவின. பெரும்பான்மை பலத்தை எழுத்துப்பூர்வமாக சமர்ப்பிக்குமாறு ஆளுநர் எடுத்த முடிவு எதிர்க்கட்சிகளாலும் கடுமையாக விமர்சிக்கப்பட்டது.
தடைகளைத் தாண்டி தமிழகத்தின் மிகப்பெரிய நாற்காலியில் அமர்ந்திருந்தாலும், விஜய்யின் அரசியல் எதிரிகள் அமைதியாக இருப்பதாகத் தெரியவில்லை.
இரண்டு ஆண்டுகள் போன்ற குறுகிய காலத்தில் இவ்வளவு தூரம் வந்த இந்த இளம் நடிகர், அரசியலில் நீண்ட காலம் நிலைத்திருப்பார் என்ற அச்சமே இதற்குக் காரணமாகும்.
இதனால் தி.மு.க (DMK) மற்றும் அ.தி.மு.க (AIADMK) ஆகிய இரு கட்சிகளுமே விஜய்யைச் சிக்க வைக்கப் புதிய வலையை விரிக்கத் தொடங்கியுள்ளன. அது, தனது சொத்து விபரங்களை வெளிப்படுத்தியதில் விஜய் செய்துள்ள பழைய தவறாகும்.
விதிக்கப்பட்ட வரி அபராதம்
2015 - 2016ஆம் வரி ஆண்டுக்குத் தொடர்புடையதாக, தளபதி விஜய் தனது வருமானமாக 35 கோடி ரூபாவுக்கும் அதிகத் தொகையை வெளிப்படுத்தியிருந்தார். இருப்பினும், 'புலி' திரைப்படத்துக்காக அவருக்குக் கிடைத்த மேலதிகமான 15 கோடி ரூபா வருமானத்தை அவர் கணக்கில் காட்டவில்லை என இந்திய வருமான வரித்துறை குற்றம் சாட்டியது. இதன் விளைவாக, விஜய்க்கு 1.5 கோடி ரூபா அபராதம் விதிக்கப்பட்டது.
இந்த அபராதத்தை ஏற்க மறுத்த விஜய், வருமான வரித்துறைக்கு எதிராக சென்னை உயர்நீதிமன்றத்தில் வழக்குத் தொடர்ந்தார். சட்டத்தால் வழங்கப்பட்ட காலஅவகாசம் கடந்த பின்னரே இந்த அபராத உத்தரவு பிறப்பிக்கப்பட்டதாக அவர் தரப்பில் வாதிடப்பட்டது.
இருப்பினும், சென்னை உயர்நீதிமன்றம் அந்த வாதத்தை ஏற்றுக்கொள்ளவில்லை. வருமான வரித்துறை நிர்ணயிக்கப்பட்ட கால வரம்புக்குள்ளேயே செயல்பட்டுள்ளதாக நீதியரசர் செந்தில்குமார் ராமமூர்த்தி தெரிவித்தார்.
இதன் காரணமாக விஜய்யின் மனுவை உயர்நீதிமன்றம் நிராகரித்தது. இந்தியாவின் மிகவும் பிரபலமான நடிகராகவும், அரசியலில் நுழைய முயற்சிக்கும் செல்வாக்குமிக்க நபராகவும் இருந்தபோதிலும், சட்டம் அவருக்கு மாறாக அமையவில்லை. வருமான வரித்துறையும் நீதிமன்றமும் விஜய்க்கு எதிராக இவ்வாறுதான் செயல்பட்டன.
விஜய்யின் கதை இத்துடன் முடிவடையவில்லை. அவரது அண்மைய அரசியல் வெற்றிதான் இதற்குக் காரணமாக இருக்கலாம் எனக் கருதப்படுகிறது. தற்போது நபர் ஒருவர் விஜய்க்கு எதிராக மீண்டும் உயர்நீதிமன்றத்தை நாடியுள்ளார்.
இச்சம்பவம் வெறும் வரி தொடர்பான பிரச்சினை மட்டுமல்ல, இதில் பணமோசடி (Money Laundering), ஏமாற்று வேலைகள் மற்றும் மறைக்கப்பட்ட நிதிப் பரிமாற்றங்கள் இருப்பதாகவும் அவர் குற்றம்சாட்டியுள்ளார்.
அவரது புகாரை ஒரு முதன்மைப் புகாராகக் கருதி, இச்சம்பவம் குறித்து குற்றவியல் விசாரணை நடத்தி, பணமோசடி தடுப்புச் சட்டம் (Prevention Of Money Laundering Act - PMLA) கீழ் விசாரணையைத் தொடங்குமாறு அவர் கோரிக்கை விடுத்துள்ளார்.
PMLA சட்டம் என்றால் என்ன?
எளிமையாகச் சொன்னால், குற்றச் செயல்களின் மூலம் ஈட்டப்படும் கறுப்புப் பணத்தைச் சுத்திகரிப்பதைத் தடுப்பதற்காக இந்தியாவில் கொண்டுவரப்பட்ட மிகவும் சக்திவாய்ந்த சட்டமாகும்.
இலஞ்சம் பெறுதல், வரி ஏய்ப்பு செய்து பணத்தைப் பதுக்குதல், கறுப்புப் பணத்தை வேறு வியாபாரங்கள் மூலம் சட்டப்பூர்வமாக்குதல் போன்றவற்றுக்கு எதிராகப் புலனாய்வாளர்கள் சட்ட வலையை வீசுவதற்கு இந்தச் சட்டம் வழிவகை செய்கிறது.
இந்தச் சட்டத்தின் பலம்:
-
புலனாய்வாளர்கள் வங்கிக் கணக்குகளைச் சரிபார்க்கவும், சொத்துக்களைப் பறிமுதல் செய்யவும் இது அதிகாரம் அளிக்கிறது.
-
வெளிநாடுகளுடன் தகவல்களைப் பரிமாறிக்கொண்டு, சந்தேகத்துக்ரிய பணப் பரிமாற்றங்கள் குறித்துப் பாரிய விசாரணைகளை மேற்கொள்ள முடியும்.
உலக அரசியலில் ஊழல் எதிர்ப்பு என்பது தற்போது ஒரு முக்கிய பேசுபொருளாக உள்ளது. தமிழகத்தில் மக்கள் வாக்குகள் மூலம் விஜய்யைத் தோற்கடிக்க முடியாத எதிரிகள், இவ்வாறான சட்டச் சிக்கல்கள் மூலம் அவரை முடக்கத் திட்டமிடுகிறார்களோ என்ற சந்தேகம் எழுந்துள்ளது.
ஜெயலலிதாவுக்கு நேர்ந்த கதி விஜய்க்கும் ஏற்படுமா?
ஆறு முறை முதலமைச்சர் நாற்காலியை அலங்கரித்த ஜெயலலிதா அவர்களையும், அவரது அரசியல் எதிரிகள் ஊழல் எதிர்ப்புச் சட்டத்தின் மூலமே வீழ்த்தினர். அன்று ஜெயலலிதாவின் சொத்து விபரங்களை ஆராயத் தொடங்கியது பாரதிய ஜனதா கட்சி (BJP) ஆகும்.
1991இல் அவர் முதன்முறையாக முதலமைச்சரான போது 3 கோடி ரூபாவாக இருந்த அவரது சொத்து மதிப்பு, 5 ஆண்டுகளில் 66 கோடி ரூபாவாக உயர்ந்தது எப்படி என்று கேள்வி எழுப்பிய பா.ஜ.க, அவருக்கு எதிராக வழக்குத் தொடர்ந்தது.
ஜெயலலிதாவின் சட்டப் போராட்டம்:
-
தண்டனை: 18 ஆண்டுகள் நீடித்த இந்த வருமானத்துக்கு மிஞ்சிய சொத்துக் குவிப்பு வழக்கில், 2014 செப்டம்பரில் ஜெயலலிதா உள்ளிட்ட நால்வருக்கு 4 ஆண்டுகள் சிறைத்தண்டனை விதிக்கப்பட்டது.
-
விடுதலை: பின்னர் பிணையில் விடுதலையான அவர், ஒரு வருடத்துக்குள் கர்நாடக உயர் நீதிமன்றத்தால் அனைத்துக் குற்றச்சாட்டுகளில் இருந்தும் விடுவிக்கப்பட்டார்.
விஜய்க்கு விடுக்கப்பட்டுள்ள சவால்:
தமிழக முதலமைச்சர் விஜய்யின் இந்தச் சம்பவம் வெறும் ஒரு நடிகரின் வரி ஏய்ப்பு வழக்கு மட்டுமல்ல; இது அரசியல் அதிகாரத்துக்கும் சட்டத்துக்கும் இடையிலான பிணைப்பைக் காட்டுகிறது.
விஜய் தனது அரசியல் பயணத்துக்கான ஆயுதமாகத் தனது தந்தை இயக்கிய ‘நாளைய தீர்ப்பு’ திரைப்படத்தில் தொடங்கிய திரைத்துறைப் பயணத்தையே பயன்படுத்தினார். தனது பட்டப்படிப்பைப் புறந்தள்ளிவிட்டு நடிப்பில் காட்டிய அர்ப்பணிப்பு வீண் போகவில்லை.
இருப்பினும், இப்போது விஜய்யின் எதிரிகள் முரண்பாடான முறையில், விஜய்யின் சொந்தத் திரைப்படமான ‘புலி’ மூலம் அவரது அரசியல் கரங்களைக் கட்ட முயல்கின்றனர்.
விஜய்யின் அரசியல் எதிர்காலம் இந்தச் சட்டப் போராட்டங்களின் முடிவிலேயே தங்கியுள்ளது. ஒரு நடிகராக மக்கள் மனதில் இடம் பிடித்த அவர், ஒரு முதலமைச்சராக இந்தச் சட்டச் சிக்கல்களை எவ்வாறு கையாளப் போகிறார் என்பதே இப்போது அனைவரதும் எதிர்பார்ப்பாகும்.