இலங்கையின் இரண்டாவது பெரிய மனிதப்புதைகுழியாகக் கருதப்படும் செம்மணியில், கடந்த ஐந்து மாதங்களாக அகழ்வுப் பணிகள் இடைநிறுத்தப்பட்டிருந்தன.
இந்நிலையில், இன்னும் 45 முதல் 60 நாட்களுக்கு அகழ்வாராய்ச்சியைத் தொடர்வதற்குத் தேவையான நிதி மதிப்பீடு மீண்டும் நீதிமன்றத்தில் சமர்ப்பிக்கப்பட்டுள்ளது.
கடந்த ஆண்டில் இந்தப் பணிகளுக்காக ஒதுக்கப்பட்ட நிதி, அந்த ஆண்டுக்குள் பயன்படுத்தப்படாமையினால் திறைசேரிக்குத் திருப்பி அனுப்பப்பட்டிருந்தது. இதனாலேயே தற்போது புதிய நிதி மதிப்பீடு கோரப்பட்டுள்ளது.
நீதிமன்ற நடவடிக்கை
பாதிக்கப்பட்ட தரப்பு சார்பாக முன்னிலையான சட்டத்தரணி வி.எஸ். நிரஞ்சன் இது குறித்துத் தெரிவிக்கையில்: யாழ்ப்பாணம், செம்மணி சித்துப்பாத்தி மனிதப்புதைகுழி தொடர்பான வழக்கு விசாரணை, 2026 பெப்ரவரி 09ஆம் திகதி யாழ் நீதவான் செல்வநாயகம் லெனின்குமார் முன்னிலையில் எடுத்துக்கொள்ளப்பட்டது.
இதன்போது, யாழ் போதனா வைத்தியசாலையின் சட்ட மருத்துவ அதிகாரி செல்லையா பிரணவன், அகழ்வுப் பணிகளுக்கான புதிய நிதி மதிப்பீட்டை மன்றுக்குச் சமர்ப்பித்தார்.
புதிதாகக் கோரப்பட்டுள்ள நிதித் தொகை சுமார் 21 மில்லியன் ரூபாய் என மாகாண ஊடகவியலாளர்கள் தகவல் பகிர்ந்துள்ளனர்.
கடந்த ஆண்டில் இரண்டு மாத கால அகழ்வுப் பணிகளுக்காக நீதியமைச்சினால் 19 மில்லியன் ரூபாய் நிதி வழங்கப்பட்டிருந்தது. எனினும், அந்தச் சமயம் நிலவிய கடும் மழை காரணமாக அகழ்வுப் பணிகளை ஆரம்பிக்க முடியாமல் போனது.
2025ஆம் ஆண்டு நிறைவடைந்ததையடுத்து, அந்த நிதி மீண்டும் திருப்பி அனுப்பப்பட்டது.
தற்போது மனிதப்புதைகுழியில் தேங்கியுள்ள மழைநீரை, நல்லூர் பிரதேச சபை மற்றும் யாழ் மாநகர சபையின் உதவியுடன் வெளியேற்றும் பணிகள் பெப்ரவரி 9ஆம் திகதி ஆரம்பிக்கப்பட்டுள்ளன.
அகழ்வுப் பணிகளை மீண்டும் ஆரம்பிப்பது குறித்த தீர்மானத்தை யாழ் நீதவான் நீதிமன்றம் எதிர்வரும் மார்ச் 16ஆம் திகதி அறிவிக்கவுள்ளது.
நீதிமன்ற உத்தரவின் பேரில், தடயவியல் தொல்பொருள் பேராசிரியர் ராஜ் சோமதேவ மற்றும் சட்ட மருத்துவ அதிகாரி செல்லையா பிரணவன் ஆகியோரின் வழிநடத்தலில், செம்மணி சித்துப்பாத்தி மனிதப்புதைகுழியின் முதற்கட்ட அகழ்வுப் பணிகள் 2025 மே 15ஆம் திகதி ஆரம்பமானது.
45 நாட்கள் வரை நீடித்த இரண்டாம் கட்ட அகழ்வுப் பணிகள் 2025 செப்டெம்பர் 06ஆம் திகதி நிறைவடைந்தன. இதன்போது:
சிறுவர்களுடையது உட்பட 240 மனித எலும்புக்கூடுகள் அடையாளங்காணப்பட்டன.
அவற்றில் ஒன்றைத் தவிர ஏனைய அனைத்து எலும்புக்கூடுகளும் அகழ்ந்தெடுக்கப்பட்டுள்ளன.
எலும்புக்கூடுகளுடன் சேர்த்து, குழந்தைகளின் பால் போத்தல்கள், பொம்மைகள் உள்ளிட்ட விளையாட்டுப் பொருட்கள், சிறுவர் காலணிகள் மற்றும் பாடசாலைப் பைகள் போன்றவையும் மீட்கப்பட்டுள்ளன.
மன்னார் 'சதொச' மனிதப்புதைகுழியே இலங்கையில் இதுவரை கண்டறியப்பட்ட மிகப்பெரிய புதைகுழியாகக் கருதப்படுகிறது. அங்கிருந்து 28 சிறுவர்கள் உட்பட 376 மனித உடற்பாகங்கள் மீட்கப்பட்டமை குறிப்பிடத்தக்கது.
