அமைச்சரவையில் உடனடி மாற்றத்தை ஏற்படுத்துமாறு ஜனாதிபதிக்கு மகஜர்!

'தேசத்தைப் பாதுகாக்கும்' தேசிய இயக்கத்தின் தலைவர் வணக்கத்திற்குரிய எல்லே குணவங்ச தேரர் ஜனாதிபதியிடம் கோரிக்கை விடுத்துள்ளார்.

ஜனாதிபதி அநுர குமார திஸாநாயக்கவுக்கு அனுப்பி வைத்துள்ள மகஜரில், பிரதமரின் தலைமையில் நடைமுறைப்படுத்தப்படவுள்ள தன்னிச்சையான கல்விச் சீர்திருத்தங்கள் மூலம், இந்த அரசாங்கத்தின் கீழ் நாடும், மக்களும், புத்த மதமும் பாரிய ஆபத்தை எதிர்நோக்கியுள்ளமை உறுதிப்படுத்தப்படுவதாக அவர் சுட்டிக்காட்டியுள்ளார்.

இவ்வாறான பலவீனமான மற்றும் நாடு, மக்கள் குறித்து அக்கறையற்ற அரசாங்கத்தினால் நாட்டுக்கும் மக்களுக்கும் நேரடி பாதிப்பு ஏற்படும் என அவர் குறிப்பிட்டுள்ளார். கல்விச் சீர்திருத்தங்களுக்காக பிக்குகள், பிற மதத் தலைவர்கள், ஆசிரியர்கள் மற்றும் கல்வி நிபுணர்களின் கருத்துக்கள் பெறப்படாததால், இது வெளிப்படைத்தன்மையற்றது என அவர் மேலும் தெரிவித்துள்ளார்.

எனவே, சீர்திருத்தங்களைக் கொண்டு வந்த விதம் ஆரம்பத்திலிருந்தே தவறானது என்றும், அதற்கு எவ்வித செல்லுபடித்தன்மையும் இல்லை என்றும் அந்த மகஜரில் குறிப்பிடப்பட்டுள்ளது.

ஒரு பிக்குவின் வரலாற்று ரீதியான கடமையை நிறைவேற்றும் வகையில், இந்த ஆபத்திலிருந்து நாடும், மக்களும், புத்த மதமும் காப்பாற்றப்படுவதை உறுதி செய்ய அரச தலைவர் என்ற ரீதியில் ஜனாதிபதி அநுர குமார திஸாநாயக்க உடனடியாக நடவடிக்கை எடுப்பார் என எதிர்பார்ப்பதாக எல்லே குணவங்ச தேரர் அந்த மகஜரில் மேலும் தெரிவித்துள்ளார்.