கடந்த ஏப்ரல் 09ஆம் திகதி, திருகோணமலை பொது வைத்தியசாலையில் சிசுவொன்று உயிரிழந்த சம்பவம் தொடர்பாக, மகப்பேறு மற்றும் மகப்பேறியல் விசேட வைத்தியர் மற்றும் சிரேஷ்ட விடுதி வைத்தியர் ஆகியோரின் பணி இடைநிறுத்தப்பட்டுள்ளது.
விசாரணையில் வெளிவந்த அதிர்ச்சிகரமான தகவல்கள்:
கடமை தவறியமை:
ஏப்ரல் 09 காலை 8.45 மணியளவில் பிரசவ அறையிலிருந்த தாயொருவருக்கு பிறந்த குழந்தைக்கு மலம் உட்புறமாகச் சென்றிருந்தது குறித்து, விடுதிக்கு பொறுப்பான வைத்தியர் 6 தடவைகள் தொலைபேசி மூலம் அறிவித்துள்ளார்.
எனினும், விசேட வைத்தியர் மற்றும் சிரேஷ்ட விடுதி வைத்தியர் பிரசவ அறைக்கு சமூகமளிக்கவில்லை.
தனியார் சேவையில் ஈடுபாடு:
அரசாங்க வைத்தியசாலையில் கடமையை நிறைவேற்ற வேண்டிய அந்த நேரத்தில், இவ்விரு வைத்தியர்களும் அருகிலுள்ள தனியார் வைத்தியசாலையில் மற்றுமொரு தாய்க்கு சிசேரியன் (C-Section) அறுவை சிகிச்சை செய்து கொண்டிருந்தமை விசாரணையில் உறுதியாகியுள்ளது.
போலிப் பதிவுகள்:
குறித்த நேரத்தில் அரசாங்க வைத்தியசாலையில் கடமையில் இருந்ததாக வைத்தியசாலையின் நாட்குறிப்பில் (Diary) போலியான தகவல்களைப் பதிவு செய்துள்ளமையும் கண்டறியப்பட்டுள்ளது.
எடுக்கப்பட்ட நடவடிக்கை:
இவ்வாறான பாரிய ஒழுக்கமற்ற செயல்கள் காரணமாக, சுகாதார அமைச்சின் செயலாளர் விசேட வைத்தியர் அனில் ஜாசிங்கவினால் கடந்த 08ஆம் திகதி முதல் நடைமுறைக்கு வரும் வகையில், விசேட வைத்தியர் ஓ.வி.ஜி.எல். வீரசேன மற்றும் சிரேஷ்ட விடுதி வைத்தியர் எஸ்.ஏ.என்.டி. சியம்பலாபிட்டிய ஆகியோர் பணி இடைநீக்கம் செய்யப்பட்டுள்ளனர்.
பணி இடைநீக்கம் செய்யப்பட்ட விசேட வைத்தியர் வீரசேன, திருகோணமலை மாவட்ட அரசாங்க வைத்திய அதிகாரிகள் சங்கத்தின் (GMOA) தலைவர் என்பது குறிப்பிடத்தக்கது.