பிரயோகத்தில் உயிரிழந்தவர் 19 வயதுடைய இளைஞர் என பொலிஸார் தற்போது தெளிவுபடுத்தியுள்ளனர்.
முன்னதாக, இச்சம்பவத்தில் 17 வயதுடைய சிறுவன் ஒருவனே காயமடைந்து யாழ். போதனா வைத்தியசாலையில் உயிரிழந்ததாகத் தகவல்கள் வெளியாகியிருந்தன. எனினும், உயிரிழந்தவர் 19 வயதுடையவர் என்பதை பொலிஸார் உறுதிப்படுத்தியுள்ளனர்.
ஊர்காவற்றுறை பொலிஸ் பிரிவுக்குட்பட்ட அல்லைப்பிட்டி சந்திக்கு அருகில் சந்தேகத்திற்கிடமான முறையில் பயணித்த வேன் ஒன்றை மறித்துச் சோதனையிட பொலிஸார் முற்பட்டனர். இதன்போது பொலிஸாரின் கட்டளையை மீறி வேன் வேகமாகச் சென்றதையடுத்து, பொலிஸார் துப்பாக்கிப் பிரயோகம் மேற்கொண்டுள்ளனர். இதில் காயமடைந்த 19 வயது இளைஞர் யாழ். போதனா வைத்தியசாலையில் அனுமதிக்கப்பட்ட பின்னர் உயிரிழந்தார்.
இச்சம்பவம் தொடர்பில் நல்லூர் - சின்ன நகரைச் சேர்ந்த 25 வயதுடைய நபர் ஒருவரும், சித்தன்கேணியைச் சேர்ந்த 38 வயதுடைய ஒருவரும் கைது செய்யப்பட்டனர். அவர்கள் ஊர்காவற்றுறை நீதவான் முன்னிலையில் ஆஜர்ப்படுத்தப்பட்டதை அடுத்து, எதிர்வரும் பெப்ரவரி 24ஆம் திகதி வரை விளக்கமறியலில் வைக்கப்பட்டுள்ளனர்.
நீதவான் விசாரணைகளின் பின்னர் உயிரிழந்தவரின் சடலம் உறவினர்களிடம் ஒப்படைக்கப்பட்டது. உயிரிழந்த இளைஞர் 'ஐஸ்' (ICE) மற்றும் ஹெரோயின் போதைப்பொருட்களைப் பயன்படுத்தியிருந்தமை விசாரணைகளில் உறுதிப்படுத்தப்பட்டுள்ளது. அத்துடன், கைது செய்யப்பட்டவர்களில் ஒருவரும் போதைப்பொருள் பயன்படுத்தியிருந்தமை மருத்துவப் பரிசோதனையில் தெரியவந்துள்ளது.
சம்பந்தப்பட்ட வேனின் பின் இருக்கைகள் அகற்றப்பட்டிருந்த நிலையில், தடயவியல் அதிகாரிகளின் உதவியுடன் முன்னெடுக்கப்பட்ட சோதனையில் 17.5 கிராம் கேரளா கஞ்சா, வாள், கத்தி, கயிறு மற்றும் மிருகத் தோல் என்பன கைப்பற்றப்பட்டுள்ளன.
குறித்த வாகனம் ஊர்காவற்றுறைப் பகுதியில் இடம்பெற்று வரும் கால்நடைத் திருட்டுகள் மற்றும் ஏனைய குற்றச் செயல்களுடன் தொடர்புடையதாக இருக்கலாம் என பொலிஸார் சந்தேகிக்கின்றனர். உதவிப் பொலிஸ் அத்தியட்சகர் ஒருவரின் மேற்பார்வையில், யாழ். குற்றத்தடுப்புப் பிரிவினரின் ஒத்துழைப்புடன் மேலதிக விசாரணைகள் முன்னெடுக்கப்பட்டு வருகின்றன.
