ஆஜராகுமாறு தமக்கு விடுக்கப்பட்ட அழைப்பை ஏற்றுக்கொள்வதாகவும், குறித்த தினத்தில் அங்கு ஆஜராகத் தான் தயாராக இருப்பதாகவும் முன்னாள் ஜனாதிபதி மஹிந்த ராஜபக்ஷ தெரிவித்துள்ளார்.
மறைந்த ஸ்ரீலங்கன் ஏர்லைன்ஸ் நிறுவனத்தின் முன்னாள் பிரதம நிறைவேற்று அதிகாரி (CEO) கபில சந்திரசேனவின் பூதவுடலுக்கு இறுதி அஞ்சலி செலுத்திய பின்னர், ஊடகங்களுக்குக் கருத்துத் தெரிவிக்கும் போதே அவர் இதனைத் தெரிவித்தார்.
விசாரணையின் பின்னணி:
எயார்பஸ் (Airbus) விமானக் கொடுக்கல் வாங்கல் தொடர்பில் வாக்குமூலம் வழங்குவதற்காக, முன்னாள் ஜனாதிபதி மஹிந்த ராஜபக்ஷவை எதிர்வரும் மே 12 ஆம் திகதி லஞ்ச ஊழல் ஆணைக்குழுவில் முன்னிலையாகுமாறு கடிதம் மூலம் உத்தியோகபூர்வமாக அறிவிக்கப்பட்டிருந்தது.
விமானக் கொள்வனவு:
2013ஆம் ஆண்டு ஸ்ரீலங்கன் ஏர்லைன்ஸ் நிறுவனத்திற்காக 06 எயார்பஸ் A-330 ரக விமானங்களையும், 08 A-350 ரக விமானங்களையும் கொள்வனவு செய்தபோது, சுமார் 02 மில்லியன் அமெரிக்க டாலர்களை லஞ்சமாகப் பெற்றதாக அப்போதைய சி.இ.ஓ கபில சந்திரசேன மற்றும் அவரது மனைவி நியோமாலி விஜேநாயக்க மீது குற்றம் சுமத்தப்பட்டது.
பணப் பகிர்வு:
விசாரணைகளின் போது, தமக்குக் கிடைத்த 02 மில்லியன் டாலர்களில் இருந்து 20 மில்லியன் ரூபாவை அப்போதைய சிவில் விமானப் போக்குவரத்து அமைச்சர் பிரியங்கர ஜயரத்னவுக்கும், 60 மில்லியன் ரூபாவை அப்போதைய ஜனாதிபதி மஹிந்த ராஜபக்ஷவுக்கும் வழங்கியதாக கபில சந்திரசேன தெரிவித்ததாக லஞ்ச ஊழல் ஆணைக்குழு அதிகாரிகள் நீதிமன்றத்தில் குறிப்பிட்டிருந்தனர்.
சட்டத்தரணியின் ஆட்சேபனை:
எவ்வாறாயினும், இந்த வாக்குமூலத்தை கபில சந்திரசேனவின் சட்டத்தரணியான ஜனாதிபதி சட்டத்தரணி ரியன்சி அர்சகுலரத்ன வன்மையாக மறுத்துள்ளார். லஞ்ச ஊழல் ஆணைக்குழுவின் பணிப்பாளர் நாயகம் தனது கட்சிக்காரரை (கபில சந்திரசேன) அச்சுறுத்தி, வற்புறுத்தியே இவ்வாறான ஒரு வாக்குமூலத்தைப் பெற்றுக்கொண்டதாக அவர் நீதிமன்றத்தில் சத்தியக்கடதாசி ஒன்றைத் தாக்கல் செய்துள்ளார்.
இந்த பரபரப்பான சூழலிலேயே, கபில சந்திரசேனவின் மர்ம மரணத்தைத் தொடர்ந்து முன்னாள் ஜனாதிபதி மஹிந்த ராஜபக்ஷ விசாரணைக்கு சமூகமளிக்கத் தீர்மானித்துள்ளார்.