முன்னெடுத்து வரும் நிலையில், மின்சாரக் கட்டணங்கள் மீண்டும் பேசுபொருளாகியுள்ளன. அதிகரித்து வரும் உலகளாவிய எரிசக்தி செலவுகள் கட்டணங்கள் மீது மேலும் அழுத்தத்தை ஏற்படுத்துகின்றன. அதேவேளை, பொருளாதார ரீதியாகப் பாதிக்கப்பட்டுள்ள குடும்பங்களைப் பாதுகாப்பதற்கும் அதிகாரிகள் முயற்சித்து வருகின்றனர்.
மத்திய கிழக்கில் நிலவும் மோதல் சூழல் இந்தச் சவாலை மேலும் கடினமாக்கியுள்ளது. சர்வதேச நாணய நிதியத்தின் கூற்றுப்படி, இது இலங்கைப் பொருளாதாரத்தில் குறிப்பிடத்தக்க தாக்கத்தை ஏற்படுத்தக்கூடும். குறிப்பாக, எரிபொருள் மற்றும் எரிசக்தி செலவுகள் அதிகரிப்பது மின்சாரக் கட்டண நிர்ணயத்தில் நேரடியாகப் பிரதிபலிக்கும்.
"மின்சார விலையானது அதன் உண்மையான விநியோகச் செலவைப் பிரதிபலிப்பதை உறுதி செய்வது, நிதி நிலைத்தன்மையைப் பாதுகாப்பதற்கு அவசியமானது" என சர்வதேச நாணய நிதியத்தின் இலங்கைக்கான தூதுக்குழுத் தலைவர் இவான் பாபஜார்ஜியோ (Evan Papageorgiou) நேற்று கொழும்பில் நடைபெற்ற செய்தியாளர் சந்திப்பில் தெரிவித்தார்.
செலவுகளுக்கு ஏற்பக் கட்டணங்களைப் பேணுவது, இலங்கை மின்சார சபை (CEB) போன்ற அரச நிறுவனங்களின் நஷ்டத்தைத் தடுக்க உதவும் என்றும் அவர் குறிப்பிட்டார்.
கடந்த மார்ச் 31ஆம் திகதி இலங்கை மின்சாரக் கட்டணத்தை சுமார் 11 சதவீதத்தால் அதிகரித்திருந்தது. உலகளாவிய எரிசக்தி விலைகள் உயர்வாகவே இருப்பதால், மேலதிக அதிகரிப்புகள் குறித்தும் ஆலோசிக்கப்பட்டு வருகின்றன.
மின்சாரத்தை சரியாக விலைப்படுத்துவது, பின்னர் நஷ்டத்தை ஈடுகட்ட அரசாங்கம் தலையிட வேண்டிய தேவையைக் குறைக்கும் என IMF தெரிவித்துள்ளது.
அதே நேரத்தில், குறைந்த வருமானம் பெறும் குடும்பங்களைப் பாதுகாக்க வேண்டியதன் அவசியத்தையும் பாபஜார்ஜியோ வலியுறுத்தினார். குறிப்பாகக் குறைந்த மின்சாரத்தைப் பயன்படுத்தும் மக்களுக்கு இலக்கு வைக்கப்பட்ட மற்றும் தற்காலிக ஆதரவை வழங்குவது குறித்து அதிகாரிகளுடன் கலந்துரையாடப்பட்டுள்ளதாக அவர் கூறினார்.
இந்த பாதிப்பைத் தணிக்க, அரசாங்கம் 100 பில்லியன் ரூபாய் நிவாரணப் பொதியை அறிமுகப்படுத்தியுள்ளது. இதில் குறைந்த வருமானம் பெறும் குடும்பங்கள், சிறு விவசாயிகள் மற்றும் மீன்பிடித்துறைக்கான ஆதரவு மற்றும் 'அஸ்வெசும' திட்டத்தின் ஊடான மேலதிக உதவிகள் உள்ளடக்கப்பட்டுள்ளன.
குறைந்த மின்சாரத்தைப் பயன்படுத்துபவர்கள் சிறிய அளவிலான அதிகரிப்பையும், அதிக மின்சாரத்தைப் பயன்படுத்துபவர்கள் செலவின் பெரும் பகுதியையும் சுமக்க வேண்டியிருக்கும் என எதிர்பார்க்கப்படுகிறது.
உலகளாவிய ரீதியில் ஏற்படும் அதிர்ச்சிகள் இலங்கையின் பொருளாதாரக் கண்ணோட்டத்தில் செல்வாக்கு செலுத்தும் என்று IMF குறிப்பிட்டுள்ளது. எரிசக்தி செலவுகள் அதிகரிப்பது வர்த்தகம், பணப்பரிமாற்றம் மற்றும் சுற்றுலாத்துறையைப் பாதிப்பதால், பொருளாதார வளர்ச்சி கணிப்புகள் மீளாய்வு செய்யப்பட வாய்ப்புள்ளது.
மின்சார விலை நிர்ணயமானது பரந்த பொருளாதாரச் சீர்திருத்தங்களுடன் நெருக்கமாகப் பிணைக்கப்பட்டுள்ளது. குறிப்பாக அரச நிறுவனங்களின் நஷ்டத்தைக் குறைப்பதற்கும் பொது நிதி மீதான அழுத்தத்தைத் தணிப்பதற்கும் இது முக்கியமானதாகும்.
அரசாங்கத்தின் எதிர்கால நிதி நெருக்கடியைத் தவிர்க்க, செலவுகளுக்கு ஏற்பக் கட்டணங்களை சீரமைப்பது அவசியம் என IMF தெரிவித்துள்ளது.
நான்கு ஆண்டுகால நீடிக்கப்பட்ட நிதி வசதி (EFF) திட்டத்தின் கீழ் 5வது மற்றும் 6வது மீளாய்வுகள் குறித்து சர்வதேச நாணய நிதியத்தின் அதிகாரிகளும் இலங்கை அதிகாரிகளும் ஏற்கனவே அதிகாரிகள் மட்டத்திலான உடன்பாட்டை எட்டியுள்ளனர். இது சுமார் 3 பில்லியன் டொலர் நிதியுதவியைப் பெறுவதற்கான பாதையைத் திறக்கிறது.
தேவையான படிமுறைகள் பூர்த்தி செய்யப்பட்டதும், இந்தத் திட்டத்தை நிறைவேற்றுச் சபைக்கு (Executive Board) கொண்டு செல்வதற்குப் பொதுவாக இரண்டு வாரங்கள் முதல் இரண்டு மாதங்கள் வரை எடுக்கும் என IMF தெரிவித்துள்ளது.
எதிர்வரும் மாதங்களிலும் மின்சார விலை குறித்த கவனம் தொடரும் என எதிர்பார்க்கப்படுகிறது. ஏனெனில், இலங்கை தனது பொருளாதாரச் சீர்திருத்தங்களுக்கும் வாழ்க்கைச் செலவு அதிகரிப்புக்கும் இடையில் சமநிலையைப் பேண வேண்டிய கட்டாயத்தில் உள்ளது.