வீட்டுப் பிரிவில் 180 அலகுகளுக்கு மேல் மின்சாரத்தைப் பயன்படுத்தும் நுகர்வோருக்கான மின்சாரக் கட்டணத்தை 18 சதவீதத்தால் அதிகரிக்க இலங்கை பொதுப் பயன்பாடுகள் ஆணைக்குழு தீர்மானித்துள்ளது.
எனினும், 180 அலகுகளுக்குக் குறைவாகப் பயன்படுத்தும் வீட்டுப் பாவனையாளர்களின் மின்சாரக் கட்டணத்தில் எவ்வித மாற்றமும் ஏற்படாது என அந்த ஆணைக்குழு குறிப்பிட்டுள்ளது.
மின்சார உற்பத்திச் செலவு அதிகரித்துள்ளமையால் இந்த காலாண்டு மற்றும் அடுத்த காலாண்டில் ஏற்படவுள்ள சுமார் 38 பில்லியன் ரூபா பற்றாக்குறையை ஈடுகட்டுதல் உள்ளிட்ட மூன்று முக்கிய காரணங்களை முன்னிலைப்படுத்தி, மின்சாரக் கட்டணத்தை 18 சதவீதத்தால் அதிகரிக்க அனுமதி வழங்கப்பட்டுள்ளது.
எவ்வாறாயினும், அரசாங்கம் 15 பில்லியன் ரூபா சலுகையை வழங்க எழுத்துப்பூர்வமாக உடன்பட்டுள்ளதால், இந்த கட்டண அதிகரிப்பு மொத்த மின் நுகர்வோரில் சுமார் 5 சதவீதமானோரை மட்டுமே பாதிக்கும் என ஆணைக்குழு தெரிவித்துள்ளது. அதன்படி, 95 சதவீதமான நுகர்வோருக்கு இந்த அதிகரிப்பு பொருந்தாது எனவும் ஆணைக்குழு மேலும் குறிப்பிட்டுள்ளது.
இந்தக் கட்டண உயர்வு நாளை (10) நள்ளிரவு முதல் நடைமுறைக்கு வரும் எனத் தெரிவிக்கப்பட்டுள்ளது.
18% மின்சாரக் கட்டண அதிகரிப்பு நடைமுறைப்படுத்தப்படும் விதம்:
-
வீட்டுப் பாவனையாளர்கள்: 0 - 180 அலகுகளுக்கு இடைப்பட்ட மின் நுகர்வுக்குக் கட்டண அதிகரிப்பு இல்லை; 180 அலகுகளுக்கு மேல் பயன்படுத்துவோருக்கு 18% அதிகரிக்கப்படும்.
-
பொதுத் தேவை (GP 1): 180 அலகுகளுக்குக் குறைவான பிரிவினருக்குக் கட்டண அதிகரிப்பு இல்லை; GP 2 மற்றும் GP 3 பிரிவினருக்கு 18% அதிகரிக்கப்படும்.
-
அரசு நிறுவனங்கள்: அனைத்து அரச நிறுவனங்களுக்கும் 18% அதிகரிக்கப்படும்.
-
ஹோட்டல் துறை: H1 மற்றும் H2 பிரிவினருக்குக் கட்டண அதிகரிப்பு இல்லை; நுகர்வு அதிகமாக இருந்தால் 18% அதிகரிக்கப்படும்.
-
கைத்தொழில் துறை: சிறு மற்றும் நடுத்தர அளவிலான கைத்தொழில்களுக்குக் கட்டண அதிகரிப்பு இல்லை; பாரிய அளவிலான கைத்தொழில்களுக்கு 18% அதிகரிக்கப்படும்.
-
மத வழிபாட்டுத் தலங்கள்: 180 அலகுகளுக்குக் குறைவாகப் பயன்படுத்தும் இடங்களுக்குக் கட்டண அதிகரிப்பு இல்லை; 180 அலகுகளுக்கு மேல் பயன்படுத்தினால் 18% அதிகரிக்கப்படும்.