நேரடியாக நிராகரிப்பு; சட்டத்தரணி ஊடாக மனைவிக்கும் அறிவிப்பு!
அவசர விசேட மனு ஊடாக கோட்டை நீதவான் பசன் அமரசேனவை சந்தித்த சிஐடி; சலே வைத்தியசாலையில் அனுமதிக்கப்பட்டமை குறித்து உத்தியோகபூர்வமாக அறிவிப்பு!
சட்டத்தரணி மற்றும் குடும்பத்தினருக்கான சந்திப்பு நேரம் 15 நிமிடங்களாகக் குறைப்பு!
தடுப்புக் காவலில் வைக்கப்பட்டு மரணாந்திக உண்ணாவிரதப் போராட்டத்தில் ஈடுபட்டு வந்த நிலையில், கொழும்பு தேசிய வைத்தியசாலையில் அனுமதிக்கப்பட்டுள்ள அரச புலனாய்வுச் சேவையின் முன்னாள் தலைவரும், ஓய்வுபெற்ற மேஜர் ஜெனரலுமான சுரேஷ் சலே புதிய நிபந்தனை ஒன்றை விதித்துள்ளார்.
தற்போதைய குற்றப் புலனாய்வுத் திணைக்கள (CID) பணிப்பாளரின் மேற்பார்வை, கட்டளை அல்லது கட்டுப்பாட்டின் கீழ் வராத பிறிதொரு வெளிவாரி பொலிஸ் விசாரணைப் பிரிவிடம் தனது விசாரணைப் பணிகளையும் தடுப்புக் காவல் இடத்தையும் மாற்றுவதாக அரசாங்கம் உத்தியோகபூர்வமாக உறுதியளிக்கும் வரை, தனது ‘மரணாந்திக உண்ணாவிரதப் போராட்டத்தை’ (Fast-unto-death) எக்காரணம் கொண்டும் கைவிடப் போவதில்லை என அவர் பிரகடனப்படுத்தியுள்ளார்.
வைத்தியசாலைக் கட்டிலில் இருந்தவாறு சுரேஷ் சலே விதித்துள்ள இந்த அதீத தீர்மானமிக்க நிபந்தனையை அவரது சட்டத்தரணி இன்றைய தினம் (08) ஊடகங்களுக்கு வெளிப்படுத்தியுள்ளார்.
ஒப்பந்த அடிப்படையில் பணியாற்றும் சிஐடி பணிப்பாளரிடம் விடுக்கப்பட்ட கோரிக்கைக்கு அமைய, சட்டத்தரணிகள் மற்றும் குடும்ப உறுப்பினர்களுக்கு தலா 15 நிமிடங்கள் என்ற வரையறுக்கப்பட்ட காலப்பகுதிக்குள் சலேயைச் சந்திப்பதற்கான அனுமதி வழங்கப்பட்டிருந்தது.
இதன்போது, உண்ணாவிரதப் போராட்டத்தைக் கைவிடுமாறு சட்டத்தரணி விடுத்த கடுமையான கோரிக்கைகளை சலே முற்றாக நிராகரித்துள்ளதுடன், இவ்வாறான கோரிக்கைகளைத் தன்னிடம் முன்வைக்க வேண்டாம் எனத் தனது மனைவிக்கும் அறிவிக்குமாறு சட்டத்தரணிக்கு அவர் அறிவுறுத்தியுள்ளார்.
திடீரென கோட்டை நீதிமன்றத்திற்குச் சென்ற சிஐடி!
இதேவேளை, சுரேஷ் சலே நேற்று (07) இரவு ஆபத்தான நிலையில் கொழும்பு தேசிய வைத்தியசாலையில் அனுமதிக்கப்பட்டுள்ளார் என்றும், அவர் தற்போது பலத்த பாதுகாப்புக்கு மத்தியில் தங்கி சிகிச்சை பெற்று வருகின்றார் என்றும் குற்றப் புலனாய்வுத் திணைக்களத்தினர் இன்று (08) கோட்டை நீதவான் பசன் அமரசேன முன்னிலையில் உத்தியோகபூர்வமாக அறிவித்துள்ளனர்.
சிஐடி விடுத்த அவசர விசேட மனுவொன்றின் ஊடாக இந்தத் தகவல்கள் நீதிமன்றத்தில் சமர்ப்பிக்கப்பட்டதுடன், சலேயின் மேலதிக மருத்துவ சிகிச்சைகளின் முன்னேற்றம் குறித்து எதிர்காலத்தில் நீதிமன்றத்திற்கு அறிக்கை சமர்ப்பிக்க நடவடிக்கை எடுக்கப்படும் என்றும் அங்கு தெரிவிக்கப்பட்டது.
உயிர்த்த ஞாயிறு பயங்கரவாதத் தாக்குதல் சம்பவம் தொடர்பாக கடந்த பிப்ரவரி 25 ஆம் திகதி கைது செய்யப்பட்ட முன்னாள் புலனாய்வுப் பிரிவு பிரதானி, சிஐடிக்குள் தனக்கு நிகழ்த்தப்படுவதாகக் கூறப்படும் அமானுஷ சித்திரவதைகளுக்கு எதிராகவே இந்த உண்ணாவிரதப் போராட்டத்தை ஆரம்பித்தார்.
இப்போராட்டமானது தற்போது அரசாங்கத்தின் விசாரணைப் பொறிமுறையையே கேள்விக்குள்ளாக்கும் ஒரு அரசியல் மற்றும் சட்டப் போராட்டமாக உருவெடுத்துள்ளது.
விசாரணை நிறுவனங்களின் சுயாதீனத்தன்மைக்குக் குந்தகம் விளைவிக்காமல், சந்தேகநபர் ஒருவரின் உரிமைகளின் அடிப்படையில் தோற்றம் பெற்றுள்ள இந்த நெருக்கடி நிலையின் அடுத்தகட்டத் தீர்ப்பு, எதிர்வரும் ஜூன் 10 ஆம் திகதி கோட்டை நீதிமன்றத்தினால் அறிவிக்கப்படவுள்ளமை குறிப்பிடத்தக்கது.
உடல்நிலை குறித்து அவரது மனைவி தகவல்
வைத்தியசாலையில் அனுமதிக்கப்பட்டுள்ள அரச புலனாய்வு சேவையின் முன்னாள் பணிப்பாளர் சுரேஷ் சலே, இதுவரை உணவோ அல்லது நீரோ உட்கொள்ளவில்லை என்று அவரது மனைவி மனோரி சலே தெரிவித்துள்ளார்.
இன்று (08) கொழும்பு தேசிய வைத்தியசாலைக்குச் சென்று சுரேஷ் சலேயின் உடல்நலம் குறித்து விசாரித்துவிட்டு வெளியில் வந்த போது, ஊடகவியலாளர்கள் எழுப்பிய கேள்விகளுக்குப் பதிலளிக்கும் போதே அவர் இதனைத் தெரிவித்தார்.
"அவர் இன்னும் உணவோ, நீரோ எதுவும் உட்கொள்ளவில்லை. அவரது நிலைமை கவலைக்கிடமாக உள்ளது. வைத்தியர்கள் கண்காணித்து வருகிறார்கள், சேலைன் ஏற்றப்படுகிறது. அவர் உண்பதோ, குடிப்பதோ இல்லை; வேறு எதையும் செய்வதில்லை. அவர் தனது உண்ணாவிரதப் போராட்டத்தைக் கைவிடப் போவதில்லை" என்று அவர் கூறினார்.
சுரேஷ் சலே தற்போது தேசிய வைத்தியசாலையில் சிகிச்சை பெற்று வரும் அதேவேளை, அவர் தனது உண்ணாவிரதப் போராட்டத்தைத் தொடர்ந்து முன்னெடுத்து வருவதாக அவரது குடும்பத்தினர் தெரிவிக்கின்றனர்.