அகழ்வாராய்ச்சிகளின் மூலம் கண்டெடுக்கப்பட்ட மனித உடல்களின் எண்ணிக்கை 300 ஐத் தாண்டியுள்ளது.
ஒரு வருடத்திற்கும் மேலாக இந்த அகழ்வாராய்ச்சிப் பணிகளைக் கண்காணித்து வரும், பாதிக்கப்பட்டவர்கள் சார்பாக முன்னிலையாகும் சட்டத்தரணிகள் குறிப்பிடுகையில், செம்மணி சித்துப்பாத்தி மனிதப் புதைகுழியிலிருந்து இதுவரை அடையாளம் காணப்பட்ட 302 மனித உடல்களில் 298 உடல்கள் முழுமையாகத் தோண்டி எடுக்கப்பட்டுள்ளதாகத் தெரிவித்துள்ளனர்.
இப்புதைகுழியில் அகழ்வுப் பணிகள் இடம்பெற்ற 72 ஆவது நாளான ஜூன் 07 ஆம் திகதியும் 8 மனித உடல்கள் தோண்டி எடுக்கப்பட்டதுடன், அவற்றில் இரண்டு சிறுவர்களுடையது என அவர்கள் மேலும் குறிப்பிட்டுள்ளனர். நேற்று முன்தினம் (06) செம்மணி சித்துப்பாத்தி மனிதப் புதைகுழியிலிருந்து 6 மனித உடல்கள் கண்டெடுக்கப்பட்டிருந்தன.
செம்மணி சித்துப்பாத்தி மனிதப் புதைகுழியின் மேலதிக அகழ்வாராய்ச்சிப் பணிகளை முன்னெடுப்பதற்காக அரசாங்கத்திடமிருந்து 210 இலட்சம் ரூபாய் (21 மில்லியன்) நிதி கிடைத்ததைத் தொடர்ந்து, ஏழு மாத இடைவெளியின் பின்னர் 2026 ஏப்ரல் 27 ஆம் திகதி திங்கட்கிழமை முற்பகல் யாழ்ப்பாணம் நீதவான் செல்வநாயகம் லெனின் குமார் முன்னிலையில் அகழ்வுப் பணிகள் மீண்டும் ஆரம்பமாகின.
எலும்புக்கூடுகளுடன் மீட்கப்பட்ட சிறுவர்களின் விளையாட்டுப் பொருட்கள்
இப்புதைகுழியின் மூன்றாம் கட்ட அகழ்வுப் பணிகள் தொடர்ந்து 12 நாட்கள் மேற்கொள்ளப்பட்ட பின்னர், அகழ்வாராய்ச்சிக் குழுவினருக்கு ஓய்வு வழங்குவதற்காக மே 9 ஆம் திகதி சனிக்கிழமை தற்காலிகமாக நிறுத்தப்பட்ட போது 261 மனித எலும்புக்கூடுகள் கண்டெடுக்கப்பட்டிருந்தன. மூன்று வார கால ஓய்வின் பின்னர், இதன் அகழ்வுப் பணிகள் மீண்டும் 2026 ஜூன் மாதம் 1 ஆம் திகதி ஆரம்பிக்கப்பட்டன.
நீதிமன்ற உத்தரவின் பேரில், தடையயல் தொல்பொருள் ஆய்வாளர் (Forensic Archaeologist) பேராசிரியர் ராஜ் சோமதேவ மற்றும் யாழ்ப்பாண சட்ட மருத்துவ அதிகாரி செல்லையா பிரணவன் ஆகியோரின் வழிகாட்டலின் கீழ், யாழ்ப்பாணம் செம்மணி சித்துப்பாத்தி மனிதப் புதைகுழியின் அகழ்வாராய்ச்சிப் பணிகள் முதன்முறையாக 2025 மே 15 ஆம் திகதி ஆரம்பிக்கப்பட்டிருந்தன.
செம்மணி சித்துப்பாத்தி மனிதப் புதைகுழியிலிருந்து மனித எலும்புகளுடன் இதுவரை தோண்டி எடுக்கப்பட்ட 100 க்கும் அண்மித்த தனிப்பட்ட பாவனைப் பொருட்களுள் (Artifacts) குழந்தைகளின் பால் புட்டிகள், பொம்மை உள்ளிட்ட விளையாட்டுப் பொருட்கள், சிறுவர்களின் பாதணிகள், பாடசாலைப் பைகள் மற்றும் சில நாணயங்களும் அடங்குகின்றன.
இலங்கையில் இதுவரை கண்டறியப்பட்ட மிகப்பெரிய மனிதப் புதைகுழியாகக் கருதப்படுவது 28 சிறுவர்கள் உட்பட 376 மனித உடற்பாகங்கள் மீட்கப்பட்ட மன்னார் சதொச (Sathosa) மனிதப் புதைகுழியாகும்.
