மீண்டும் மின்சாரக் கட்டண உயர்வு குறித்து ஜனாதிபதி சூசகம்!

நெருக்கடியின் விளைவாக ஏற்பட்டதல்ல எனக் குறிப்பிட்ட ஜனாதிபதி அணுர குமார திஸாநாயக்க, மூன்று மாத காலப்பகுதியில் ஏற்படக்கூடிய நஷ்டம் சுமார் 32 பில்லியன் ரூபாவாக இருக்கலாம் என தற்போதைய மதிப்பீடுகள் தெரிவிக்கின்றன என்றார்.

இதில் 10 பில்லியன் ரூபாயை மக்களே சுமக்க வேண்டியிருக்கும் என்றும், மீதமுள்ள 22 பில்லியன் ரூபாயை அரசாங்கமும் மின்சார நிறுவனங்களும் ஏற்கும் என்றும் அவர் நேற்று தெரிவித்தார்.

நாடாளுமன்றத்தில் விசேட கூற்றொன்றை விடுத்த அவர், ஏப்ரல் 1 ஆம் திகதி மேற்கொள்ளப்பட்ட மின்சாரக் கட்டணத் திருத்தம் பெப்ரவரி 1 ஆம் திகதி மேற்கொள்ளப்பட்ட கணிப்புகளின் அடிப்படையிலானது என்றும், தற்போதைய நிலைமையின் அடிப்படையில் மூன்று மாதங்களுக்கான நஷ்டம் 32 பில்லியன் ரூபா என மதிப்பிடப்பட்டுள்ளதாகவும் தெரிவித்தார்.

குறைந்த நீர்மின் உற்பத்தி, எரிபொருள் விலை உயர்வு, உலை எண்ணெய் (Furnace oil) மற்றும் நெப்தாவிற்கு (Naphtha) பதிலாக டீசலைப் பயன்படுத்துதல் மற்றும் தரம் குறைந்த நிலக்கரி விநியோகம் காரணமாக நிலக்கரி மூலம் எதிர்பார்க்கப்பட்ட மின் உற்பத்தியில் ஏற்பட்ட பற்றாக்குறை ஆகியவற்றினால் இந்த நஷ்டம் ஏற்பட்டுள்ளதாக அவர் கூறினார்.

எவ்வாறாயினும், தரம் குறைந்த நிலக்கரியால் ஏற்படும் நஷ்டம் சம்பந்தப்பட்ட நிறுவனங்களிடமிருந்து அறவிடப்படும் என்றும், எந்தச் சூழ்நிலையிலும் இந்தச் செலவுகள் மக்களின் மின்சாரப் பட்டியல்களில் சேர்க்கப்படாது என்றும், அவை தேசிய அமைப்பு முகாமைத்துவக் கட்டமைப்பிற்குள் உள்வாங்கப்பட வேண்டும் என்றும் ஜனாதிபதி குறிப்பிட்டார்.

அடுத்த மின்சாரக் கட்டணத் திருத்தத்தின் போது 90 யூனிட்டுகளுக்கும் குறைவாக மின்சாரத்தைப் பயன்படுத்தும் நுகர்வோருக்கு மானியம் வழங்க அரசாங்கம் தீர்மானித்துள்ளதாகவும், அதற்காக மாதம் ஒன்றுக்கு 5 பில்லியன் ரூபாய் வீதம் மூன்று மாதங்களுக்கு 15 பில்லியன் ரூபாய் ஒதுக்கப்படும் என்றும் அவர் கூறினார்.

மதிப்பிடப்பட்ட 32 பில்லியன் ரூபாய் நஷ்டத்தில், அரசாங்கம் 15 பில்லியன் ரூபாயை ஏற்கும் என்றும், நிலக்கரி தொடர்பான பிரச்சினைகளால் ஏற்படக்கூடிய சுமார் 7 பில்லியன் ரூபாயை மின்சார நிறுவனங்கள் ஏற்கும் என்றும், மீதமுள்ள 10 பில்லியன் ரூபாயை மின்சார நுகர்வோர் சுமக்க வேண்டியிருக்கும் என்றும் அவர் தெரிவித்தார்.

"நாங்கள் இந்த அணுகுமுறையையே பின்பற்றுகிறோம். இதைவிடச் சிறந்த மாற்று வழி இருந்தால், அதைக் கேட்க நாங்கள் தயாராக இருக்கிறோம்," என்று அவர் மேலும் கூறினார்.