நிலக்கரி கொள்முதல் தொடர்பான விசேட தணிக்கை அறிக்கை வெளியீடு!

கொள்முதல் செய்யப்படும் செயல்முறை மற்றும் 2025/2026 பருவத்திற்கான நிலக்கரி கொள்முதல் குறித்த விசேட தணிக்கை அறிக்கை வெளியிடப்பட்டுள்ளது.

அதன்படி, இலங்கைக்கு நிலக்கரி விநியோகிப்பதில் சர்ச்சைக்குரிய 'ட்ரைடென்ட்' (Trident) நிறுவனம், ஏற்றும் துறைமுகத்தில் (Loading Port) பரிசோதனை அறிக்கைகளைப் பெற்றுக்கொண்ட ஆய்வகமானது, உரிமம் ரத்து செய்யப்பட்ட ஒன்று என கணக்காய்வாளர் நாயகம் இந்த விசேட தணிக்கை அறிக்கையின் ஊடாக அம்பலப்படுத்தியுள்ளார்.

நாடாளுமன்றத்தின் பொது நிறுவனங்கள் தொடர்பான குழு (COPE), கடந்த காலங்களில் தேசிய தணிக்கை அலுவலகத்திற்கு விடுத்த கோரிக்கைக்கு அமைவாக கணக்காய்வாளர் நாயகம் இந்த அறிக்கையை சமர்ப்பித்துள்ளார்.

அறிக்கையில் வெளிப்படுத்தப்பட்டுள்ள முக்கிய விடயங்கள்:

• பதிவு செய்யப்படாத நிறுவனத்திற்கு ஒப்பந்தம்: ஏல விண்ணப்பங்களுக்கான விளம்பரம் வெளியிடப்பட்ட திகதியன்று, ஒப்பந்தத்தைப் பெற்றுக்கொண்ட ட்ரைடென்ட் நிறுவனம் தனது பதிவைக்கூட பூர்த்தி செய்திருக்கவில்லை. முழுமையான பதிவுக்கட்டணத்தைச் செலுத்தி பதிவை உறுதிப்படுத்தாத மூன்று நிறுவனங்களுக்கு ஏலத்தில் பங்கேற்க வாய்ப்பளிக்கப்பட்டுள்ளது.

• தரம் குறைந்த நிலக்கரி மற்றும் உரிமம் இல்லாத ஆய்வகம்: கொள்முதல் செய்யப்பட்ட நிலக்கரி உரிய தரத்தில் இருக்கிறதா என்பதை ஏற்றும் துறைமுகத்திலும் இறக்கும் துறைமுகத்திலும் சுயாதீன ஆய்வாளர்கள் பரிசோதிக்க வேண்டும். ஏற்றும் துறைமுகத்தில் விற்பனையாளரால் நியமிக்கப்பட்ட 'Mitra SK South Africa' நிறுவனத்திற்கு தகுந்த அங்கீகாரம் இருக்கவில்லை. எனவே, அந்தப் பணியை 'PT Mitra SK Analisa Testama Samarinda' என்ற இந்தோனேசிய நிறுவனத்திடம் ஒப்படைத்துள்ளனர். எனினும், அந்த நிறுவனத்தின் உரிமம் 2025 டிசம்பர் 29 அன்றே ரத்து செய்யப்பட்டுள்ளது. 2026 மார்ச் 31 வரை அந்த உரிமம் புதுப்பிக்கப்பட்டதற்கான எந்த ஆதாரமும் தணிக்கையில் கண்டறியப்படவில்லை.

• தரவு முரண்பாடுகள் மற்றும் அலட்சியம்: ஏற்றும் துறைமுகத்தின் அறிக்கைகளுக்கும் லக்விජය மின் உற்பத்தி நிலையத்தின் தரவுகளுக்கும் இடையில் முரண்பாடுகள் காணப்பட்டன. இதை உறுதிப்படுத்த லங்கா நிலக்கரி நிறுவனத்திற்கு மாற்று வழிகள் இருந்தும், அவை எதனையும் பயன்படுத்த அந்த நிறுவனம் நடவடிக்கை எடுக்கவில்லை.

• காலதாமதம் மற்றும் மேலாண்மைத் தவறு: இலங்கைக்கு நிலக்கரி இறக்கக்கூடிய காலப்பகுதி வரையறுக்கப்பட்டதாகும். அவ்வாறான சந்தர்ப்பம் இருந்த 2025 நவம்பர் 13 முதல் டிசம்பர் 30 வரையிலான 40 நாட்களில் எந்தவொரு நிலக்கரி கப்பலையும் கொண்டு வர லங்கா நிலக்கரி நிறுவனம் தவறியுள்ளது.

• அவசர கொள்முதலில் முறைகேடு: கப்பல்கள் வராததால் இந்த ஆண்டு மார்ச் 18 அன்று அவசர கொள்முதல் மூலம் நிலக்கரி வாங்க நேரிட்டது. இதற்காகத் தெரிவு செய்யப்பட்ட 'Taranjot Resource' தனியார் நிறுவனமும், கடந்த 36 மாதங்களில் லக்விஜய மின் நிலையத்திற்குத் தேவையான குறைந்தபட்ச வெப்பப் பெறுமதியான (Calorific Value) 5,900 kcal வழங்கத் தவறிய ஒரு நிறுவனமாகும்.

இந்த நிலைமைகளைக் கருத்தில் கொள்ளும்போது, நிலக்கரியை உரிய காலத்திற்கு கொண்டு வரத் தவறியமை மற்றும் எதிர்காலத்தில் ஏற்படக்கூடிய கட்டுப்பாடற்ற சூழல்களினால் லக்விஜய மின் நிலையத்திற்குத் தேவையான நிலக்கரி போதாமல் போனால், அது நாட்டின் தொடர்ச்சியான மின்சார விநியோகத்தைப் பாரதூரமாகப் பாதிக்கும் என கணக்காய்வாளர் நாயகம் தனது விசேட அறிக்கையில் எச்சரித்துள்ளார்.