ஜப்பானில் இன்று பொதுத் தேர்தல்!

வாக்காளர்கள் தயாராக உள்ளதாக சர்வதேச ஊடகங்கள் செய்தி வெளியிட்டுள்ளன.

இம்முறை தேர்தலில் வாக்களிப்பதற்காக ஜப்பானின் 103 மில்லியன் வாக்காளர்கள் தயாராக உள்ளதாக சர்வதேச ஊடகங்கள் செய்தி வெளியிட்டுள்ளன. நாடு முழுவதும் 44,000 இற்கும் மேற்பட்ட வாக்குச்சாவடிகளில் இந்த வாக்குப்பதிவு இடம்பெறவுள்ளது.

தேர்தலுக்கு முன்னைய கருத்துக்கணிப்புகளின்படி, ஜப்பானிய பிரதமர் சனாய் தகாச்சி (Sanae Takaichi) முன்னிலையில் உள்ளதாகத் தெரியவருகிறது. அவரது லிபரல் ஜனநாயகக் கட்சி (LDP) மற்றும் புகழ்பெற்ற ஜப்பானிய புத்தாக்கக் கட்சி (Japan Innovation Party) ஆகியவற்றுடன் இணைந்து உருவாக்கப்பட்டுள்ள கூட்டணியின் ஊடாக அவர் அதிகூடிய நாடாளுமன்ற ஆசனங்களைக் கைப்பற்றக்கூடும் என எதிர்பார்க்கப்படுகிறது.

கடந்த ஒக்டோபர் மாதம், அப்போதைய பிரதமர் ஷிகெரு இஷிபா பதவியேற்று ஓராண்டு காலம் நிறைவடைவதற்கு முன்னரே பதவியிலிருந்து விலகியதை அடுத்து, சனாய் தகாச்சி ஜப்பானின் புதிய பிரதமராகப் பதவியேற்றார்.

நாடாளுமன்றத்தின் பெரும்பான்மை பலத்துடன் பிரதமராகப் பதவியேற்ற சனாய் தகாச்சி, ஜப்பானின் முதலாவது பெண் பிரதமர் என்ற வரலாற்றையும் படைத்திருந்தார். பிரதமர் பதவியேற்று மூன்று மாதங்கள் கடந்துள்ள நிலையில், அவர் அண்மையில் நாடாளுமன்றத்தைக் கலைத்து இந்த பொதுத்தேர்தலுக்கு அழைப்பு விடுத்திருந்தமை குறிப்பிடத்தக்கது.