ஆவணங்கள் வௌியிடப்பட்டுள்ள நிலையில், அதில் இலங்கையின் பெயர் 182 இடங்களில் குறிப்பிடப்பட்டுள்ளதாகத் தெரியவருகிறது.
இருப்பினும், இந்த ஆவணங்களில் எவ்விடத்திலும் அவர் இலங்கையில் குற்றச்செயல்களில் ஈடுபட்டதாகக் குறிப்பிடப்படவில்லை என்பது குறிப்பிடத்தக்கது.
சிறுவர் துஷ்பிரயோகச் சம்பவங்கள் தொடர்பில் அமெரிக்காவில் குற்றவாளியாகக் காணப்பட்ட ஜேப்ரி எப்ஸ்டீனின் வழக்குடன் தொடர்புடைய மில்லியன் கணக்கான புதிய ஆவணங்களை அமெரிக்க நீதிக் திணைக்களம் கடந்த வாரம் பகிரங்கப்படுத்தியது.
இதற்கமைய, எப்ஸ்டீனுடன் தொடர்புகளைப் பேணிய உலகின் அதி செல்வந்த மற்றும் செல்வாக்கு மிக்க நபர்களின் பட்டியல் மேலும் நீண்டுள்ளதாக சர்வதேச ஊடகங்கள் செய்தி வௌியிட்டுள்ளன.
'எப்ஸ்டீன் கோப்புகள்' (Epstein Files) என அழைக்கப்படும் இந்த ஆவணங்களின் புதிய தொகுப்பு கடந்த ஜனவரி 30ஆம் திகதி வௌியிடப்பட்டது. இதில் மூன்று மில்லியன் பக்கங்கள், 180,000 புகைப்படங்கள் மற்றும் 2,000 காணொளிகள் உள்ளடங்கியுள்ளன.
அத்துடன், பில்லியனர்களான ரிச்சர்ட் பிரான்சன், பில் கேட்ஸ், இலோன் மஸ்க் போன்ற உலகப் புகழ்பெற்ற நபர்களின் பெயர்களும் இதில் இடம்பெற்றுள்ளன. எவ்வாறாயினும், இந்த ஆவணங்களில் பெயர் குறிப்பிடப்பட்டிருப்பதன் மூலம் அவர்கள் குற்றம் செய்தார்கள் என்று அர்த்தமாகாது எனத் தெரிவிக்கப்பட்டுள்ளது.
இவ்வாறானதொரு பின்னணியில், எப்ஸ்டீன் கோப்புகளில் 182 சந்தர்ப்பங்களில் இலங்கையைப் பற்றிய குறிப்புகள் இடம்பெற்றுள்ளன. எப்ஸ்டீனுக்குச் சொந்தமான 'லிட்டில் செயின்ட் ஜேம்ஸ்' (Little Saint James) எனும் இரகசியத் தீவை நிர்மாணிப்பதற்காக, இலங்கையின் உலகப் புகழ்பெற்ற கட்டிடக் கலைஞர் ஜியோப்ரி பாவாவின் (Geoffrey Bawa) தனித்துவமான கட்டிடக்கலை பாணியைப் பின்பற்றுவதற்கு முயற்சி மேற்கொள்ளப்பட்டதாக அதில் குறிப்பிடப்பட்டுள்ளது.
நீதிமன்றத்தில் சமர்ப்பிக்கப்பட்ட மின்னஞ்சல் தரவுகளின்படி, எப்ஸ்டீனின் நெருங்கிய நண்பரான ஜூலியன் லீஸ் (Julian Lees) என்பவரால் ஜியோப்ரி பாவாவின் தனித்துவமான கட்டிடக்கலை வடிவமைப்புகள் அடங்கிய மின்னஞ்சல் ஒன்று எப்ஸ்டீனுக்கு அனுப்பப்பட்டுள்ளது.
இயற்கையையும் கட்டிடங்களையும் ஒன்றிணைக்கும் பாவாவின் தனித்துவமான பாணியைத் தனது தீவில் மறுஉருவாக்கம் செய்வது குறித்து அவர்கள் நீண்ட கலந்துரையாடல்களை நடத்தியுள்ளதாக அந்த அறிக்கைகள் தெரிவிக்கின்றன.
ஜூலியன் லீஸ் என்பவர் 80-90 காலப்பகுதியில் பிரித்தானியாவின் பலம்வாய்ந்த ஆயுத வியாபாரியாக இருந்த டக்ளஸ் லீஸின் மகன் ஆவார். எப்ஸ்டீனின் ஆவணங்களில் ஜூலியன் லீஸ் வெறும் நண்பராக மாத்திரமன்றி, அவருடன் வர்த்தக ரீதியான கலந்துரையாடல்களை மேற்கொண்ட நெருங்கிய சகாக்களில் ஒருவராகவும் குறிப்பிடப்பட்டுள்ளார்.
மேலும், ஜூலியன் லீஸ் நீண்ட காலமாக இலங்கையைத் தனது வசிப்பிடமாகக் கொண்டிருந்தமையும் இந்த அறிக்கைகளின் ஊடாகப் புலனாகியுள்ளது.
இருப்பினும், எப்ஸ்டீன் அல்லது ஜூலியன் லீஸ் இலங்கைக்குள் எவ்விதமான குற்றச் செயல்களிலும் ஈடுபட்டதாக இந்த ஆவணங்களில் குறிப்பிடப்படவில்லை என்பதுடன், நாட்டின் பாதுகாப்புத் தரப்பினருக்கும் இது தொடர்பில் எவ்விதத் தகவல்களும் கிடைக்கப் பெறவில்லை எனத் தெரிவிக்கப்படுகிறது.