'அவசரகால சட்ட விதிமுறைகள் சட்டவிரோதமானது என உயர்நீதிமன்ற தீர்ப்பு உள்ளது!'

முன்னதாக நாட்டில் ஏற்பட்ட 'அரகலய' போராட்டத்தை ஒடுக்குவதற்கும் ஈஸ்டர் தாக்குதல் காலத்திலும் கொண்டுவரப்பட்ட அடக்குமுறை விதிகளுக்கு ஒப்பானது என நாடாளுமன்ற உறுப்பினர் பைசர் முஸ்தபா நாடாளுமன்றத்தில் வலியுறுத்தினார்.

ஜனாதிபதியினால் பிரகடனப்படுத்தப்பட்ட அவசரகால சட்ட விதிமுறைகள் மீதான விவாதத்தில் கலந்துகொண்டு உரையாற்றிய அவர், அனர்த்த நிலைமையை எதிர்கொள்ள எதிர்க்கட்சியின் முழுமையான ஆதரவை வழங்க உடன்பட்ட போதிலும், தற்போது முன்வைக்கப்பட்டுள்ள விதிமுறைகள் மூலம் பொதுமக்களின் சுதந்திரம் கடுமையாகக் கட்டுப்படுத்தப்படுவதாகக் குறிப்பிட்டார்.

அடக்குமுறை விதிமுறைகள் மற்றும் கருத்து சுதந்திரம் குறிப்பாக 19ஆவது பிரிவின் கீழ் துண்டுப்பிரசுரங்களை விநியோகித்தல், வதந்திகள் மற்றும் பொய்ப் பிரசாரங்களைக் கட்டுப்படுத்துவதற்கு எடுக்கப்பட்டுள்ள நடவடிக்கைகள் குறித்து விமர்சித்த முஸ்தபா, இதன் மூலம் கருத்துச் சுதந்திரம் (Freedom of Expression) கடுமையாக மீறப்படுவதாகச் சுட்டிக்காட்டினார்.

"இந்த விதிமுறைகளுக்கும் அனர்த்த முகாமைத்துவத்திற்கும் எந்தத் தொடர்பும் இல்லை" என்பது அவரது நிலைப்பாடாக இருந்தது. மேலும், 02ஆவது பிரிவின் மூலம் வாகனங்கள் மற்றும் சொத்துக்களை வலுக்கட்டாயமாக அரசாங்கம் கையகப்படுத்துவதற்கும் (Requisition of vehicles and property) அவர் தனது எதிர்ப்பை வெளியிட்டார்.

அனர்த்த நிலைமை முடிவுக்கு வந்துள்ளதாக பாதுகாப்புச் செயலாளரின் கடிதம் ஒரு முக்கியமான வெளிப்பாடாக, 2025 டிசம்பர் 05ஆம் திகதியன்று பாதுகாப்பு அமைச்சின் செயலாளரால் வெளியிடப்பட்ட கடிதம் ஒன்றின் மூலம் இந்த அனர்த்த நிலைமை முடிவுக்கு வந்துள்ளதாக அறிவிக்கப்பட்டுள்ளதாக அவர் குறிப்பிட்டார். அந்த கடிதத்தை சபையில் சமர்ப்பிப்பதாகவும் அவர் தெரிவித்தார்.

சட்டவிரோத விதிமுறைகள் குறித்த உயர்நீதிமன்ற தீர்ப்பு இந்த விதிமுறைகளின் சட்டபூர்வமான தன்மை குறித்து கேள்வி எழுப்பிய அவர், 2025 ஜூலை 23 அன்று உயர்நீதிமன்றம் வழங்கிய தீர்ப்பு ஒன்றையும் சபையில் சமர்ப்பித்தார். போராட்டக் காலங்களில் விதிக்கப்பட்ட இவ்வாறான விதிமுறைகள் சட்டவிரோதமானவை என அந்தத் தீர்ப்பு உறுதிப்படுத்தியுள்ளதாகவும், எனவே தற்போதைய விதிமுறைகளும் சட்டச் சிக்கல்களுக்கு உள்ளாகலாம் என்றும் அவர் சுட்டிக்காட்டினார்.

எதிர்க்கட்சியின் கோரிக்கை அரசாங்கம் இந்த அடக்குமுறை விதிமுறைகளை நீடிக்கக் கூடாது எனவும், அனர்த்தத்தை எதிர்கொள்வதற்கு அனைவரும் ஒன்றிணைந்து வலுவான மற்றும் வெளிப்படையான பொறிமுறையொன்றை உருவாக்க வேண்டும் எனவும் முஸ்தபா அரசாங்கத்திடம் கோரிக்கை விடுத்தார்.