புத்தாண்டுக்கான பொருளாதார சவால்கள் இதோ!

பொருளாதார பாதிப்புகளை ஈடுகட்ட ஒரு ஒருங்கிணைந்த வேலைத்திட்டம் அவசியம் என இலங்கை மனித உரிமைகள் மத்திய நிலையம் தெரிவித்துள்ளது.

அதிக வரி விதிப்பு மற்றும் மின்சாரம், எரிவாயு விலைகளை அதிகரிப்பதன் மூலம் அரசாங்கம் தனது வருமானத்தை (Revenue Augmentation) அதிகரிக்க முடிந்துள்ள போதிலும், அரச நிதி ஒழுக்கத்தைப் பேணுவதில் அரசாங்கம் பலவீனமான செயல்திறனைக் காட்டி வருவதாக அதன் நிறைவேற்றுப் பணிப்பாளர் ரஜித் கீர்த்தி தென்னக்கோன் வெளியிட்டுள்ள அறிக்கையில் தெரிவிக்கப்பட்டுள்ளது.

அந்த அறிக்கையில் மேலும் குறிப்பிடப்பட்டுள்ளதாவது:

கடன் நெருக்கடி மேலும் அதிகரிப்பு
அநுர குமார திசாநாயக்க ஜனாதிபதியாகப் பதவியேற்ற போது 17,595.05 பில்லியன் ரூபாவாக இருந்த இலங்கையின் உள்நாட்டுக் கடன், 2025 செப்டம்பர் இறுதியில் 18,701.46 பில்லியன் ரூபா வரை 1,106.41 பில்லியன் ரூபாவினால் அதிகரித்துள்ளது. 2024 இறுதியில் 10,429.04 பில்லியன் ரூபாவாக இருந்த வெளிநாட்டுக் கடன், 2025 செப்டம்பர் அளவில் 10,974.34 பில்லியன் ரூபா வரை உயர்ந்துள்ளது.

நாட்டின் மொத்த உள்நாட்டு மற்றும் வெளிநாட்டுக் கடன் தொகை 29,675.81 பில்லியன் ரூபாவாக அதிகரித்துள்ளது.

வெளிநாட்டு கையிருப்பு வீழ்ச்சி
வெளிநாட்டு கையிருப்பு தொடர்ச்சியாக வீழ்ச்சியடைவது பொருளாதாரம் எதிர்நோக்கும் பாரிய சவாலாகும். 2025 மார்ச் மாதம் 6,531 மில்லியன் டொலராக இருந்த வெளிநாட்டு கையிருப்பு, நவம்பர் இறுதியில் 6,033 மில்லியன் டொலர் வரை (498 மில்லியன் டொலரால்) வீழ்ச்சியடைந்துள்ளது. வெள்ள அனர்த்தத்தினால் அழிவடைந்த உட்கட்டமைப்பு மற்றும் தொழிற்சாலைகளை முறையாக நவீனமயப்படுத்த வேண்டுமாயின், அரசாங்கம் பெருமளவிலான வெளிநாட்டு செலாவணியைச் செலவிட்டு பொருட்களை இறக்குமதி செய்ய வேண்டியது அவசியமாகும்.

2024 இல் அன்றைய அரசாங்கம் நடப்புக் கணக்கில் (Current Account) மேலதிக மீதியைப் பேண முடிந்த போதிலும், 2025 செப்டம்பர் மற்றும் அக்டோபர் மாதங்களில் அது மீண்டும் பற்றாக்குறையாக மாறியது. நடப்புக் கணக்கு மீதி எப்போதும் நேர்மறையாக இருக்க வேண்டிய அவசியமில்லை என்றாலும், 2025 நவம்பரில் மீண்டும் அது நேர்மறை நிலைக்குத் திரும்பியது பொருளாதாரத்தின் திசை குறித்து ஒரு சாதகமான அறிகுறியாகும்.

ரூபாயின் மதிப்பு வீழ்ச்சி
கடந்த ஆண்டில் 293.25 ரூபாவாக இருந்த டொலரின் மாற்று விகிதம், தற்போது 309.45 ரூபா வரை அதிகரித்துள்ளது. ரூபாயின் மதிப்பு வீழ்ச்சியடைவது வெளிநாட்டுக் கடன் மற்றும் வட்டியைச் செலுத்துவதற்கான செலவை அதிகரிப்பதுடன், இறக்குமதி மற்றும் உற்பத்திப் பொருட்களின் விலையேற்றத்திற்கு நேரடியாகப் பாதிப்பை ஏற்படுத்துகிறது.

டொலருக்கு நிகராக ரூபாயின் மதிப்பு தொடர்ந்து வீழ்ச்சியடைவதால், வர்த்தக வங்கிகளுக்கும் உண்டியல் (கறுப்புச் சந்தை) விகிதங்களுக்கும் இடையிலான இடைவெளி படிப்படியாக விரிவடைந்து வருகிறது. இந்த நிலைக்கு நிச்சயமற்ற தன்மையே காரணமாகும். 2021-2022 பொருளாதார நெருக்கடியின் ஆரம்பமும் வங்கி மற்றும் கறுப்புச் சந்தை டொலர் மாற்று விகித அதிகரிப்பிலேயே வெளிப்பட்டது.

அனர்த்தங்கள் மற்றும் மறுசீரமைப்பு
வெள்ளம் மற்றும் மண்சரிவு அனர்த்தத்தினால் நாட்டிற்கு ஏற்பட்ட சேதம் மற்றும் மீளக்கட்டியெழுப்பலுக்கான மதிப்பீட்டை இலங்கை அரசாங்கம் இன்னும் தயாரிக்கவில்லை. ஐக்கிய நாடுகள் அபிவிருத்தித் திட்டம் (UNDP) இது குறித்து ஆரம்பத்தில் மதிப்பீடு இல்லாத அறிக்கையொன்றைச் சமர்ப்பித்தது. உலக வங்கியின் கூற்றுப்படி, அனர்த்தத்தினால் பொருளாதாரத்திற்கு ஏற்பட்ட பாதிப்பு 4 பில்லியன் அமெரிக்க டொலர்களாகும். சர்வதேச தொழிலாளர் அமைப்பின் (ILO) கூற்றுப்படி, இது 16 பில்லியன் டொலர் அல்லது மொத்த உள்நாட்டு உற்பத்தியில் 16% ஆகும்.

நிவாரணங்களை வழங்குவதற்கு பெருமளவு வரிப் பணமும், மீளக்கட்டுமானப் பொருட்களை இறக்குமதி செய்யப் பாரிய வெளிநாட்டு செலாவணியும் தேவைப்படுகிறது. அரசாங்கம் உடனடியாக அனர்த்தத்தின் நிதி பாதிப்பு மற்றும் மீளக்கட்டுமான மதிப்பீடுகளைத் தயாரிக்க வேண்டும். வாழ்வாதாரத்தைக் கட்டியெழுப்புவதற்குப் போதுமான நிவாரணங்கள் கிடைக்காதது இடம்பெயர்ந்தவர்களுக்கு ஏற்கனவே ஒரு பிரச்சினையாக மாறி வருகிறது.