மதுரோவும் அவரது மனைவியும் இன்று நீதிமன்றத்தில் ஆஜர்படுத்தப்படுவர்!

கூட்டாட்சி (பெடரல்) நீதிமன்றத்தில் ஆஜர்படுத்தப்படவுள்ளதாக வெளிநாட்டு ஊடகங்கள் செய்தி வெளியிட்டுள்ளன.

கடந்த 3ஆம் திகதி காரகாஸ் தலைநகரில் அமெரிக்கப் படைகள் மேற்கொண்ட விசேட இராணுவ நடவடிக்கையின் போது இவர்கள் இருவரும் கைது செய்யப்பட்டனர்.

போதைப்பொருள் கடத்தல், பயங்கரவாத சதித்திட்டம், ஆயுதங்கள் மற்றும் அழிவுகரமான உபகரணங்களை வைத்திருத்தல் மற்றும் அந்த ஆயுதங்கள் மூலம் அமெரிக்காவிற்கு எதிராக சதி செய்தல் ஆகிய குற்றச்சாட்டுகளின் கீழ் மதுரோ மற்றும் அவரது மனைவி மீது குற்றப்பத்திரிகை தாக்கல் செய்யப்பட்டுள்ளது.

அதன்படி, இது தொடர்பான வழக்கு மன்ஹாட்டனில் உள்ள கூட்டாட்சி நீதிமன்றத்தில் இன்று மதிய வேளையில் ஆரம்பமாகவுள்ளது.

அமெரிக்க மாவட்ட நீதிபதி ஆல்வின் கே. ஹெல்லர்ஸ்டைன் இந்த விசாரணையை நடத்துவார் என்றும் தெரிவிக்கப்பட்டுள்ளது.

எவ்வாறாயினும், மதுரோவும் ஏனைய வெனிசுலா தலைவர்களும் இருபது ஆண்டுகளுக்கும் மேலாக அமெரிக்காவிற்கு கொக்கைன் இறக்குமதி செய்வதற்கு வசதியாக தங்களது அரசாங்க பதவிகளைப் பயன்படுத்தியதாக அந்நாட்டின் நீதித்துறை குற்றம் சுமத்தியுள்ளது.

நிக்கோலஸ் மதுரோவுக்கு எதிராக 2020 ஆம் ஆண்டிலும் குற்றச்சாட்டுகள் சுமத்தப்பட்டிருந்தன, ஆனால் அவர் அக்காலப்பகுதியில் அந்த குற்றச்சாட்டுகளை நிராகரித்திருந்தார்.

நிக்கோலஸ் மதுரோவின் மகனான நிக்கோலஸ் மதுரோ குவேராவிற்கு எதிராகவும் அமெரிக்க அதிகாரிகள் குற்றச்சாட்டுகளை முன்வைத்துள்ளதாக தகவல்கள் தெரிவிக்கின்றன.

இருப்பினும், சனிக்கிழமை இடம்பெற்ற இராணுவ நடவடிக்கையின் போது அவர் அமெரிக்கப் படைகளிடம் சிக்கவில்லை.

வீடியோ ஒன்றை வெளியிட்டுள்ள நிக்கோலஸ் மதுரோ குவேரா, வீதிகளில் இறங்கி அமெரிக்காவிற்கு எதிராகத் தமது எதிர்ப்பை வெளியிடுமாறு வெனிசுலா மக்களிடம் கோரிக்கை விடுத்துள்ளார்.