நந்திக்கடல் நன்னீர் ஏரி மீனவர் மோதலை இனவாதமாக மாற்ற முயற்சி!

முல்லைத்தீவு பிரதேச சபை உறுப்பினர் ஒருவர் மீது குற்றச்சாட்டு.

6 பேர் காயம், இருவர் பொலிஸ் வசம | அச்சத்தில் பிரதேச மக்கள்...

முல்லைத்தீவு நந்திக்கடல் நன்னீர் ஏரியில் மீன்பிடிக்கச் சென்ற இரு மீனவக் குழுக்களுக்கிடையே ஏற்பட்ட மோதலானது, பிரதேச அரசியல் கும்பலொன்றினால் இனவாதத்தைத் தூண்டும் ஒரு நடவடிக்கையாக மாற்றப்பட்டுள்ளதாகப் பாரிய குற்றச்சாட்டு எழுந்துள்ளது.

தகவல்களின்படி, கடந்த சில தினங்களுக்கு முன்னர் நந்திக்கடல் ஏரியில் மீன்பிடித்துக் கொண்டிருந்த 6 மீனவர்களுக்கு இடையே ஏற்பட்ட வாக்குவாதம் முற்றியதில், இரு தரப்பினரும் தடிகளால் ஒருவரையொருவர் தாக்கியுள்ளனர்.

இந்த மோதலில் இரு தரப்பையும் சேர்ந்த 6 பேர் பலத்த காயமடைந்து வைத்தியசாலையில் அனுமதிக்கப்பட்டுள்ளனர். காயமடைந்தவர்களில் 3 முஸ்லிம் சகோதரர்களும் 3 தமிழ் சகோதரர்களும் அடங்குவர்.

தற்போது இருவர் பொலிஸ் அத்தங்காவலில் உள்ள நிலையில், ஏனைய நால்வர் வைத்தியசாலையில் சிகிச்சை பெற்று வருகின்றனர்.

அரசியல் சதியா?

இந்த மீனவர் மோதல் ஒரு சாதாரண சம்பவம் அல்ல எனவும், பிரதேச சபை உறுப்பினர் ஒருவர் உள்ளிட்ட ஊழல் மலிந்த அரசியல் கும்பலினால் திட்டமிடப்பட்ட முறையில் இனவாதத்தைத் தூண்டும் நோக்கில் முன்னெடுக்கப்பட்ட ஒரு சதி எனவும் பிரதேச மக்கள் குற்றம் சுமத்துகின்றனர்.

குறித்த அரசியல் கும்பல், தமிழ் இளைஞர்கள் சிலருக்கு 4 இலட்சம் ரூபா பணத்தை வழங்கி, முஸ்லிம் மீனவ இளைஞர்கள் மீது தாக்குதல் நடத்துவதற்காக 35 பேர் கொண்ட குழுவொன்றைத் தயார் செய்துள்ளதாகத் தகவல்கள் வெளியாகியுள்ளன.

"இது வெறும் மீனவச் சண்டை அல்ல. இனவாதத்தைத் தூண்டி வாக்குகளைப் பெறுவதற்காக அரசியல்வாதிகள் செய்யும் அநாகரிகமான செயல். பொலிஸார் வேடிக்கை பார்க்கிறார்கள். நாங்கள் அச்சத்தில் இருக்கிறோம்" எனப் பெயரை வெளிப்படுத்த விரும்பாத பிரதேசவாசி ஒருவர் தெரிவித்தார்.

பொலிஸார் தோல்வியா?

இந்தச் சம்பவத்தின் பின்னணியில் அரசியல் கரங்கள் இருப்பதாகப் பிரதேசத்தில் பேசப்பட்டு வரும் நிலையில், பொலிஸாரும் பாதுகாப்புப் பிரிவினரும் மௌனம் காப்பது குறித்து மக்கள் கடும் அதிருப்தியை வெளியிட்டுள்ளனர்.

"பொலிஸ் பாதுகாப்பு இருந்தாலும் பயன் இல்லை. ஊழல் அரசியல்வாதிகள் சட்டத்திற்கு மேலாக இருக்கிறார்கள்" என மற்றுமொரு பிரதேசவாசி குற்றம் சுமத்தினார்.

பிரதேசத்தின் அமைதியைக் குலைக்கும் இவ்வாறான சம்பவங்களில் அரசியல்வாதிகளின் நேரடித் தலையீடுகள் குறித்து உடனடியாக பக்கச்சார்பற்ற விசாரணைகளை முன்னெடுத்து, குற்றவாளிகளுக்கு எதிராகக் கடும் சட்ட நடவடிக்கை எடுக்குமாறு பிரதேச மக்கள் கோரிக்கை விடுத்துள்ளனர்.