செலுத்துவதற்கு முன்னர், அந்த நிலக்கரித் தொகுதி தொடர்பான கப்பலேற்றல் சான்றிதழை (Shipping Certificate) இலங்கை நிலக்கரி நிறுவனம் எதிர்பார்த்துள்ளதாகத் தெரிவிக்கப்படுகிறது.
தென்னாப்பிரிக்காவிலிருந்து கொண்டு வரப்படும் இந்த நிலக்கரித் தொகுதி தரம் குறைந்ததாகக் குற்றச்சாட்டுகள் எழுந்துள்ளமையே இதற்குக் காரணமாகும்.
பல மாத கால தாமதத்தின் பின்னர் கடந்த ஆண்டின் இறுதியில் முடிக்கப்பட்ட டெண்டரின் அடிப்படையில், இந்திய விநியோகஸ்தர் ஒருவர் மொத்தம் 25 நிலக்கரித் தொகுதிகளை வழங்குவதற்கு ஒப்பந்தம் செய்துள்ளார்.
கப்பலில் ஏற்றப்பட்டதற்கான சான்றிதழில் (Loading Certificate) நிலக்கரியின் கலோரி பெறுமானம் குறைவாகக் காட்டப்பட்டுள்ளதால், மின் உற்பத்தித் திறன் மற்றும் நிதி இழப்புகள் ஏற்பட வாய்ப்புள்ளமை குறித்துக் கவலைகள் எழுந்துள்ளன.
இலங்கை மின்சார சபையின் உள்வாரித் தகவல்களின்படி, புதிதாக வழங்கப்பட்ட நிலக்கரியில் சுமார் 117 மெட்ரிக் தொன் மூலம் 285 மெகாவாட் மின்சாரத்தையே உற்பத்தி செய்ய முடியும். ஆனால் முன்னர் ரஷ்ய நிலக்கரியில் 107-109 மெட்ரிக் தொன் மூலம் சுமார் 300 மெகாவாட் மின்சாரத்தை உற்பத்தி செய்ய முடிந்தது.
இதன்படி, மின்சாரத்தை உற்பத்தி செய்ய அதிக அளவு நிலக்கரி தேவைப்படுவதால், செயல்பாட்டுத் திறன் (Operating efficiency) வீழ்ச்சியடைந்துள்ளமை தெரியவருகிறது.
எதிர்காலத்திலும் இதே போன்ற தரப் பிரச்சினைகள் தொடருமானால், அது இலங்கையின் மின் உற்பத்தி மற்றும் மின்கட்டண நிர்ணயத்தில் பாரிய தாக்கங்களை ஏற்படுத்தும் என மின்சார சபை வட்டாரங்கள் தெரிவிக்கின்றன.
இலங்கையின் சமீபத்திய நிலக்கரி இறக்குமதி டெண்டர் முறைகேடுகளால் நிறைந்துள்ளதாக முன்னிலை சோசலிசக் கட்சி 2025 செப்டம்பர் மாதம் கூறியிருந்தது.
இலங்கை நிலக்கரி நிறுவனத்தின் பொது மேலாளர் நாமல் ஹேவகே, நிலக்கரித் தொகுதி தொடர்பான குற்றச்சாட்டுகள் எழுந்துள்ளதை ஏற்றுக்கொண்டார். இருப்பினும், இறக்குமதி செய்யப்படும் துறைமுகச் சான்றிதழ் கிடைத்த பின்னரே உண்மையான நிலையை உறுதிப்படுத்த முடியும் என அவர் தெரிவித்தார்.
"தரக் குறைபாடுகள் ஏதேனும் இருந்தால், ஒப்பந்தத்தில் அதற்கான நிபந்தனைகள் உள்ளன. விநியோகஸ்தர் அதற்குரிய அபராதத்தைச் செலுத்த வேண்டியிருக்கும்" என்றும் அவர் வலியுறுத்தினார்.
நொரோச்சோலை நிலக்கரி மின்நிலையம் இலங்கையின் மின்சாரத் தேவையில் சுமார் 40 சதவீதத்தைப் பூர்த்தி செய்கிறது.