கிரிஷ் சதுக்கம் (Krrish Square) திட்டம் தற்போதைய நிலையிலேயே இருக்கும் என நகர அபிவிருத்தி அதிகாரசபை தகவல்கள் தெரிவிக்கின்றன.
கிரிஷ் சதுக்கத் திட்டத்தின் பின்னணியில் உள்ள உள்நாட்டு நிறுவனமான கிரிஷ் டிரான்ஸ்வர்க் கொழும்பு லிமிடெட் நிறுவனத்தின் பிரதான கடன் வழங்குநர் ஒருவர், நிறுவனத்திலிருந்து விலகுவதற்கான ஆவணங்களைத் தாக்கல் செய்துள்ளதாக நகர அபிவிருத்தி அதிகாரசபையின் உயர்மட்டத் தகவல்கள் தெரிவிக்கின்றன.
இதன் விளைவாக, நிறுவனத்தின் விவகாரங்களை நிர்வகிப்பதற்காக நீதிமன்றத்தினால் கலைப்பாளர் (Liquidator) ஒருவர் நியமிக்கப்பட்டுள்ளார்.
"நிறுவனம் (Krrish Transworks) கலைக்கப்பட வேண்டியுள்ளது, எனவே இப்போது நிறுவனத்தை நிர்வகிக்கும் அதிகாரம் கலைப்பாளரிடமே உள்ளது. கலைப்பு செயல்முறை குறிப்பிடத்தக்க முன்னேற்றமடைந்துள்ளது" என அந்தத் தகவல் வட்டாரம் தெரிவித்தது.
தொடர்ந்து கருத்துத் தெரிவித்த அவர், கலைப்பாளர் நிறுவனத்தின் பொறுப்புகளை அடையாளம் கண்ட பிறகு, தற்போதைய முதலீட்டாளரின் நிதிப் பிரச்சினைகளால் தடைப்பட்டுள்ள இத்திட்டத்தைப் பொறுப்பேற்க புதிய முதலீட்டாளர்களுக்கு அழைப்பு விடுக்கப்படலாம் என்றும் கூறினார்.
ஏற்கனவே அடுக்குமாடி குடியிருப்புகளை வாங்கியுள்ள நபர்களுக்கான பொறுப்புகள் காரணமாக, இத்திட்டத்திற்காக குத்தகைக்கு விடப்பட்ட நிலத்தை மீண்டும் கையகப்படுத்துவது சிக்கலானது என்பதால், நகர அபிவிருத்தி அதிகாரசபை இறுதி முடிவை எடுப்பதற்கு முன்னர் கலைப்பு செயல்முறை முடியும் வரை காத்திருக்க வேண்டியுள்ளதாகவும் அவர் மேலும் வெளிப்படுத்தினார்.
கிரிஷ் குழுமத்தின் உள்நாட்டு நிறுவனமான கிரிஷ் டிரான்ஸ்வர்க்ஸ் கொழும்பு லிமிடெட், கிரிஷ் சதுக்கத் திட்டத்திற்காக 2012 ஆம் ஆண்டு 5 பில்லியன் ரூபாய் தொகைக்கு 99 வருட கால குத்தகை ஒப்பந்தத்தை நகர அபிவிருத்தி அதிகாரசபையுடன் மேற்கொண்டிருந்தது.
முன்மொழியப்பட்ட இத்திட்டம், உயர்தர குடியிருப்பு கோபுரங்கள், வணிக மற்றும் சில்லறை விற்பனை இடங்கள் மற்றும் ஏழு நட்சத்திர ஹோட்டல் ஆகியவற்றைக் கொண்ட ஒரு பாரிய அளவிலான கலப்பு அபிவிருத்தித் திட்டமாக அமையும் என எதிர்பார்க்கப்பட்டது.
இத்திட்டத்தில் டிரான்ஸ்வர்க்ஸ் (Transworks) கட்டிடமும் உள்ளடக்கப்படவிருந்ததுடன், அதன் பாரம்பரியம் மற்றும் கட்டடக்கலைத் தன்மையைப் பேணி, அதனை ஒரு சொகுசு பூட்டிக் ஹோட்டலாக (Boutique Hotel) மாற்றவும் திட்டமிடப்பட்டிருந்தது.