'இலங்கையில் தமிழ் இனப்படுகொலை எதுவும் இடம்பெறவில்லை!'

என வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் திட்டவட்டமாகத் தெரிவித்துள்ளார்.

தனது உத்தியோகபூர்வ ஆஸ்திரேலிய விஜயத்தை நிறைவு செய்து கொண்டு இலங்கை திரும்புவதற்கு முன்னர், கன்பெராவிலுள்ள (Canberra) இலங்கை உயர்ஸ்தானிகராலயத்தில் 'SBS சின்ஹல' சேவைக்கு வழங்கிய விசேட நேர்காணலின் போதே அமைச்சர் இதனை வலியுறுத்தியுள்ளார்.

சமீபத்தில் சிட்னி (Sydney) நகரில் அரங்கேறிய சில அரசியல் நடவடிக்கைகள், இலங்கையின் தேசிய நல்லிணக்கத்திற்கு நேரடியாகப் பாதிப்பை ஏற்படுத்துகின்றன எனச் சுட்டிக்காட்டிய அமைச்சர், இது குறித்து வெளிவிவகார அமைச்சு ஊடாக ஆஸ்திரேலிய அரசாங்கத்திற்கு உத்தியோகபூர்வமாகத் தெளிவுபடுத்தப்பட்டுள்ளது என்றும் வெளிப்படுத்தினார்.

இலங்கையின் மாற்றம் குறித்து புலம்பெயர் சமூகம் உற்சாகம்!

சர்ச்சைக்குரிய இந்த அரசியல் நிலைப்பாட்டைத் தெளிவுபடுத்திய அதேவேளை, இலங்கைக்குப் பொருளாதார ரீதியாகத் தீர்மானமிக்கதொரு வெற்றியைப் பெற்றுக்கொடுக்கவும் அமைச்சர் சமர்த்தாகச் செயல்பட்டுள்ளார்.

இதற்கமைய, பிராந்திய விரிவான பொருளாதாரக் கூட்டாண்மையில் (RCEP) இலங்கைக்கான அங்கத்துவத்தைப் பெற்றுக்கொள்வதற்கு ஆஸ்திரேலியா மற்றும் நியூசிலாந்து ஆகிய நாடுகள் தங்களது முழுமையான ஆதரவை வழங்குவதாக உறுதியளித்துள்ளன.

ஆஸ்திரேலிய வெளிவிவகார அமைச்சர் பெனி வொங் (Penny Wong) அவர்களை நேரில் சந்தித்து, இலங்கையின் இறையாண்மைக்காகக் குரல் கொடுத்த அமைச்சர் விஜித ஹேரத், இலங்கையில் ஏற்பட்டுள்ள புதிய அரசியல் மாற்றம் குறித்து ஆஸ்திரேலியாவில் வாழும் இலங்கை சமூகம் பெருமிதத்துடனும் மிகுந்த உற்சாகத்துடனும் உள்ளதாக மேலும் குறிப்பிட்டுள்ளார்.