மதிப்புரைகள் வெற்றிகரமாக நிறைவடைந்ததைத் தொடர்ந்து, 695 மில்லியன் அமெரிக்க டொலர் தொகை இலங்கை திறைசேரிக்கு மாற்றப்பட்டுள்ளது.
கடந்த 27ஆம் திகதி நடைபெற்ற சர்வதேச நாணய நிதியத்தின் நிறைவேற்றுச் சபை (IMF Executive Board) கூட்டத்தின் போதே இந்த மதிப்புரைகளுக்கான உத்தியோகபூர்வ அங்கீகாரம் வழங்கப்பட்டது.
விரிவான நிதி வசதித் திட்டத்தின் கீழ், கடந்த 2023 ஆம் ஆண்டு மார்ச் மாதத்தில் சர்வதேச நாணய நிதியத்தினால் இலங்கைக்கு 3 பில்லியன் அமெரிக்க டொலர் நிதி வசதி அங்கீகரிக்கப்பட்டிருந்தது.
அதன் 5ஆவது மற்றும் 6 ஆவது மதிப்புரைகளை அங்கீகரிப்பதற்காக கடந்த 27ஆம் திகதி நாணய நிதியத்தின் விධායක சபை கூடியது.
இக்கூட்டத்தின் பின்னர் கருத்துத் தெரிவித்த சர்வதேச நாணய நிதியத்தின் பிரதி முகாமைத்துவ பணிப்பாளர் கென்ஜி ஒகாமுரா , சவாலான சூழ்நிலைகளுக்கு மத்தியிலும் இலங்கை விரிவான நிதி வசதித் திட்டத்தின் நிபந்தனைகளை வலுவான முறையில் நடைமுறைப்படுத்தியுள்ளதாகக் குறிப்பிட்டுள்ளார்.
பொருளாதார வளர்ச்சி வேகம் குறையும்!
எவ்வாறாயினும், 'டித்வா' சூறாவளி மற்றும் மத்திய கிழக்கு பிராந்தியத்தில் நிலவும் யுத்தம் காரணமாக இலங்கையின் பொருளாதாரத்திற்கு அபாயங்கள் காணப்படுவதாகவும் அவர் தெரிவித்துள்ளார்.
எரிபொருள் விலை அதிகரிப்பு மற்றும் சுற்றுலாத் துறை மூலமான வருவாய் குறைவடைந்துள்ளமை போன்ற காரணங்களால், 2026 ஆம் ஆண்டில் நாட்டின் பொருளாதார வளர்ச்சி 3 சதவீதம் (3%) என்ற மட்டம் வரை மந்தகதியடையும் என எதிர்வு கூறப்பட்டுள்ளதாக சர்வதேச நாணய நிதியம் சுட்டிக்காட்டியுள்ளது.
அத்துடன், கடன் மறுசீரமைப்பு பணிகள் நிறைவடையும் தருவாயை எட்டியுள்ள போதிலும், கடன் நிலைபேற்றுத்தன்மைக்கான அபாயங்கள் இன்னும் உயர் மட்டத்திலேயே காணப்படுகின்றன. இதனால், விலைகளின் ஸ்திரத்தன்மைக்கு முதலிடம் வழங்கி, நிதிச் சீர்திருத்தக் கொள்கைகளைத் தொடர்ந்து முன்னோக்கிக் கொண்டு செல்ல வேண்டும் என சர்வதேச நாணய நிதியத்தின் பிரதி முகாமைத்துவ பணிப்பாளர் கென்ஜி ஒகாமுரா மேலும் வலியுறுத்தியுள்ளார்.