லலித் - குகன் கடத்தல் வழக்கு: யாழ். நீதிமன்றில் சாட்சியமளிப்பது கோட்டாக்கு கட்டாயம்!

காணாமல் ஆக்கப்பட்ட சம்பவம் தொடர்பான வழக்கு விசாரணைக்காக, இதுவரை காலம் யாழ்ப்பாணத்திற்கு வருகை தருவதைத் தவிர்த்து வந்த முன்னாள் ஜனாதிபதி கோட்டாபய ராஜபக்ஷ, இணையவழி மூலமாகவோ அல்லது வேறு ஏதேனும் ஒரு முறையிலோ யாழ்ப்பாண நீதிமன்றில் நிச்சயமாகச் சாட்சியமளிக்க வேண்டும் என உத்தரவிடப்பட்டுள்ளது.

மகிந்த ராஜபக்ஷவின் ஆட்சிக் காலத்தில் பாதுகாப்புச் செயலாளராகப் பணியாற்றிய கோட்டாபய ராஜபக்ஷவிற்கு, யாழ்ப்பாணம் மேலதிக நீதவான் செல்வநாயகம் லெனின்குமார் இந்த அதிரடி உத்தரவைப் பிறப்பித்துள்ளார்.

கடந்த 2011ஆம் ஆண்டு டிசம்பர் மாதம் 09ஆம் திகதி யாழ்ப்பாணத்தில் வைத்து காணாமல் ஆக்கப்பட்ட லலித் குமார் வீரராஜ் மற்றும் குகன் முருகானந்தன் ஆகியோரின் வழக்கு மீண்டும் விசாரணைக்கு எடுத்துக்கொள்ளப்பட்ட போதே இந்த உத்தரவு பிறப்பிக்கப்பட்டது.

நீதிமன்ற வளாகத்தில் ஊடகவியலாளர்களைச் சந்தித்த பாதிக்கப்பட்ட தரப்பு சட்டத்தரணி நுவன் போபகே இது குறித்துக் கருத்துத் தெரிவிக்கையில்:

"லலித் மற்றும் குகன் ஆகிய இரண்டு செயற்பாட்டாளர்களும் கடத்தப்பட்டு காணாமல் ஆக்கப்பட்ட சம்பவம் தொடர்பாக, கோட்டாபய ராஜபக்ஷ எதிர்வரும் ஒரு திகதியில் இணையவழி மூலமாகவோ அல்லது வேறு ஏதேனும் ஒரு முறையிலோ நிச்சயமாகச் சாட்சியமளிக்க வேண்டும் என்பது நீதிமன்றத்தின் இந்த உத்தரவின் மூலம் உறுதி செய்யப்பட்டுள்ளது"

எனக் குறிப்பிட்டுள்ளார்.

14 வருடப் போராட்டத்திற்கு கிடைத்த நீதி; தந்தை மகிழ்ச்சி!

பல வருடங்களாகச் சாட்சியமளிப்பதைத் தவிர்த்து வந்த முன்னாள் பாதுகாப்புச் செயலாளரை, 'வெள்ளை வேன் கடத்தல்கள்' அரங்கேறிய அதே நீதித்துறை வலயத்திற்குட்பட்ட நீதிமன்றத்திற்குள் சாட்சியமளிக்க அழைப்பது கட்டாயமாக்கப்பட்டமை குறித்து லலித் குமாரின் தந்தை தனது மகிழ்ச்சியை வெளிப்படுத்தியுள்ளார்.

வழக்கு விசாரணையின் பின்னர் ஊடகங்களிடம் பேசிய லலித் குமாரின் தந்தை ஆறுமுகம் வீரராஜா:

"நாங்கள் கடந்த 14 வருடங்களாக கொழும்பு நீதிமன்றங்களுக்கும் யாழ்ப்பாணம் நீதிமன்றங்களுக்கும் அலைந்து திரிந்து இந்த வழக்கைத் தொடர்ந்தோம். அக்காலப்பகுதியில் பாதுகாப்புச் செயலாளராக இருந்த கோட்டாபய ராஜபக்ஷ, தம்மால் நீதிமன்றத்திற்கு வந்து சாட்சியமளிக்க முடியாது எனக் கூறிவந்தார். எனினும், அவர் நீதிமன்றில் முன்னிலையாகி நிச்சயமாகப் பதிலளிக்க வேண்டும் என நீதவான் தற்போது உத்தரவிட்டுள்ளார்"

எனத் தெரிவித்தார்.

முன்னாள் ஜனாதிபதியும் முன்னாள் பாதுகாப்புச் செயலாளருமான கோட்டாபய ராஜபக்ஷவிற்கு, உண்மையில் பாதுகாப்புத் அச்சுறுத்தல் அல்லது பாதுகாப்புப் பிரச்சினை உள்ளது என்பதை உறுதிப்படுத்துவதற்கான எந்தவொரு ஆவணமோ அல்லது சான்றுகளோ நீதவானிடம் சமர்ப்பிக்கப்படவில்லை எனப் பாதிக்கப்பட்ட தரப்பு சார்பாக முன்னிலையான சட்டத்தரணி நுவன் போபகே கடந்த டிசம்பர் மாதம் நீதிமன்றத்தில் வலியுறுத்தியிருந்தார்.

லலித் குமார் வீரராஜ் மற்றும் குகன் முருகானந்தன் ஆகியோர் கடத்தப்பட்டு காணாமல் ஆக்கப்பட்டமைக்கு எதிராகத் தொடரப்பட்டுள்ள ஆட்கொணர்வு மனு மீதான வழக்கு விசாரணைக்காக, சாட்சியமளிக்க வருமாறு கோரி கடந்த 2019ஆம் ஆண்டு செப்டம்பர் மாதம் 27ஆம் திகதி நீதிமன்றத்தில் முன்னிலையாகுமாறு யாழ்ப்பாணம் நீதவான் நீதிமன்றம் முன்னாள் பாதுகாப்புச் செயலாளர் கோட்டாபய ராஜபக்ஷவிற்கு அந்த ஆண்டிலும் அழைப்பாணை விடுத்திருந்தது.

எல்.டி.டி.ஈ பயங்கரவாத அமைப்பைத் தோற்கடித்த காலத்தில் தான் பாதுகாப்புச் செயலாளராகப் பணியாற்றியதால், பாதுகாப்பு காரணங்களை முன்னிட்டு யாழ்ப்பாண நீதிமன்றத்தில் முன்னிலையாக முடியாது என கோட்டாபய ராஜபக்ஷவினால் முன்வைக்கப்பட்ட காரணங்களை அக்காலத்தில் ஏற்றுக்கொண்ட மேல்முறையீட்டு நீதிமன்ற நீதிபதி தீபாலி விஜேசுந்தர, அவர் யாழ்ப்பாணத்திற்கு அழைக்கப்படுவதை நிறுத்தி வைக்கும் உத்தரவொன்றைப் பிறப்பித்திருந்தார்.

ஆயினும், நீதிமன்றத்தில் முன்னிலையாக வேண்டியிருந்த தினத்திற்கு அடுத்த நாளே, வடக்கு மற்றும் கிழக்கு மாகாணங்களின் ஒட்டுமொத்தப் பகுதிகளுக்கும் சிநேகிபூர்வமாக விஜயம் செய்து தீவிர தேர்தல் பிரசாரங்களில் ஈடுபட்ட கோட்டாபய ராஜபக்ஷ, எவ்வித ஆபத்துகளுமின்றி பாதுகாப்பாக மீண்டும் கொழும்பு திரும்பினார்.

அதிலிருந்து இரண்டு மாதங்களின் பின்னர், அவர் தேர்தலில் அமோக வெற்றியீட்டி நாட்டின் ஜனாதிபதியாகப் பதவியேற்றுக் கொண்டார் என்பது குறிப்பிடத்தக்கது.