கோணேஸ்வரத்துக்கு உரித்தான 247 ஏக்கர் நிலப்பரப்பை இழக்கும் அபாயத்தில் கோயில் நிர்வாகம்!

நிலத்தின் ஒரு பகுதியை விமானப்படை அபகரிக்க முயற்சிப்பதாக கோவிலின் நிர்வாக சபை உறுப்பினர் ஒருவர் வெளிப்படுத்தியுள்ளார்.

நூற்றாண்டுகள் பழமையான திருகோணமலை திருக்கோணேஸ்வரம் கோவில் நிர்வாக சபையின் ஆயுட்கால உறுப்பினர் சி. ஜெயசங்கர் கூறுகையில், ரேடார் கட்டமைப்பை நிறுவுவதற்காக கடற்படையின் ஊடாக (விமானப்படைக்காக) கோவில் நிலத்தின் ஒரு பகுதியை அவர்கள் கோருவதாகத் தெரியவந்துள்ளது என்றார்.

"விமானப்படை ரேடார் கட்டமைப்பை நிறுவுவதற்காக எமது நிலத்தின் ஒரு பகுதியை கோருவதாக எனக்குத் தெரியவந்தது. ரேடார் எனப்படும் நவீன உபகரணங்களை அவர்கள் தற்போது நிலைகொண்டுள்ள சீனக்குடா பகுதியில் நிறுவ முடியும். அங்கு அத்தகைய நவீன வசதிகள் உள்ளன. அவ்வாறிருக்கையில், அவர்கள் ஏன் கோணேஸ்வரம் நிலத்திற்குள் நுழைய முயற்சிக்கிறார்கள் என்று ஆராய்ந்தால், எமது நிலத்தை முழுமையாக அபகரிப்பதே அவர்களின் நோக்கம் என்பது புரிகிறது."

விமானப்படையின் இந்த முயற்சியால் கோவிலுக்குச் சொந்தமான நிலம் முழுமையாக இழக்கப்படும் அபாயம் குறித்து எச்சரித்த சி. ஜெயசங்கர், இதனைத் தோற்கடிக்க உலகெங்கிலும் வாழும் இந்து பக்தர்கள் அனைவரும் ஒன்றுபட வேண்டும் என ஊடகவியலாளர் சந்திப்பில் வலியுறுத்தினார்.

"திருகோணமலை மாவட்ட மக்கள் மட்டுமல்ல, உலகம் முழுவதும் வாழும் இந்துக்கள் அனைவரும் இதற்கு கடும் எதிர்ப்பைத் தெரிவித்து, இந்த முயற்சியைத் தோற்கடிக்க முன்வருமாறு மிகவும் பணிவாகவும் அன்பாகவும் கேட்டுக்கொள்கிறேன்."

சுற்றுலாத்துறைக்கு பாதுகாப்புப் படையினரால் ஏற்பட்டுள்ள அச்சுறுத்தல் குறித்து அவர் மேலும் விவரிக்கையில்:

"இப்போதும் நுழைவாயிலில் இராணுவம் உள்ளது — கேணியடி கிணறு இருந்த பகுதி மூடப்பட்டு இராணுவம் இருக்கிறது. அடுத்து நடுப்பகுதியில் பொலிஸ் விடுதிகள் உள்ளன. அதற்கு அப்பால் நந்திமலை பகுதியில் கடற்படை உள்ளது. இதனால் சுற்றுலாத்துறைக்கு பெரும் பாதிப்பு ஏற்பட்டுள்ளதுடன், நாட்டின் பொருளாதாரமும் வீழ்ச்சியடைகிறது."

இலங்கையின் பாதுகாப்புச் செயலாளராக முன்னாள் விமானப்படைத் தளபதி சம்பத் துய்யகொந்தா நியமிக்கப்பட்டுள்ளமை குறிப்பிடத்தக்கது.

பிரித்தானியர் ஆட்சிக்காலத்தில் வழங்கப்பட்ட ஒப்படத்தின்படி, திருக்கோணேஸ்வரம் ஆலயம் 247 ஏக்கர் நிலப்பரப்பைக் கொண்டது. இதற்கான செப்புப் பட்டய ஆவணம் (CV 217) இந்தியாவில் பாதுகாப்பாக வைக்கப்பட்டுள்ளதாக நிர்வாகம் கூறுகிறது.

இலங்கையின் பஞ்ச ஈஸ்வரங்களான யாழ்ப்பாணம் நகுலேஸ்வரம், மன்னார் கேதீஸ்வரம், திருகோணமலை கோணேஸ்வரம், சிலாபம் முன்னேஸ்வரம் மற்றும் மத்தறை தொண்டீஸ்வரம் ஆகியவற்றில் இதுவும் ஒன்றாகும்.