சர்வதேச விமான நிலையங்களில் இலங்கை கடவுச்சீட்டுகள் ஏன் ஸ்கேன் செய்யப்படுவதில்லை?

நுழைவாயில்களில், இலங்கை கடவுச்சீட்டுகள் (Passports) ஸ்கேன் செய்யப்படுவதில் சிக்கல்கள் ஏற்படுவதாகப் பயணிகள் சுட்டிக்காட்டியுள்ளனர். இதனால் இலங்கை பயணிகள் கையேட்டு சரிபார்ப்புக்காக (Manual Check) நீண்ட வரிசைகளில் காத்திருக்க வேண்டியுள்ளதாக டெய்லி மிரர் பத்திரிகை செய்தி வெளியிட்டுள்ளது.

இது குறித்து குடிவரவு மற்றும் குடியகல்வு அதிகாரிகள் சங்கத்தின் தலைவர் ஜூட் பெர்னாண்டோவிடம் வினவியபோது, இலங்கை கடவுச்சீட்டு ஒரு ‘ஈ-பாஸ்போர்ட்’ (e-passport) அல்ல, அது ஒரு இயந்திரத்தால் வாசிக்கக்கூடிய கடவுச்சீட்டு (Machine-readable passport) மட்டுமே எனத் தெரிவித்தார். இதுவே சர்வதேச விமான நிலையங்களில் ஸ்கேன் செய்யும் போது பிழைகள் ஏற்படுவதற்கு முக்கிய காரணம் என அவர் விளக்கினார்.

இருப்பினும், இந்த விவகாரம் தொடர்பாக சர்வதேச விமான நிலையங்கள் இலங்கை அதிகாரிகளிடம் இதுவரை உத்தியோகபூர்வமாக எந்த முறைப்பாட்டையும் தெரிவிக்கவில்லை என்றும் அவர் கூறினார்.

கட்டுநாயக்க விமான நிலையத்திலும் (BIA) சிக்கல்கள்

ஜப்பானிய அரசாங்கத்தின் 8.4 மில்லியன் அமெரிக்க டொலர் நிதி உதவியுடன் கட்டுநாயக்க விமான நிலையத்தில் நிறுவப்பட்ட புதிய தானியங்கி எல்லைக் கட்டுப்பாட்டு (ABC) ஈ-கேட் முறைமையிலும் பயணிகள் அசௌகரியங்களை எதிர்கொண்டுள்ளனர்.

இது குறித்து குடிவரவு மற்றும் குடியகல்வு திணைக்களம் வழங்கிய விளக்கத்தில், முன்கூட்டியே கிடைக்க வேண்டிய பயணிகளின் தகவல்கள் (Advanced Passenger Information - API) முறைமையில் முழுமையாக இல்லாததே இதற்குக் காரணம் எனக் குறிப்பிட்டுள்ளது.

"ஈ-கேட் முறைமையானது விமான இலக்கங்களையும் பயணிகளின் விபரங்களையும் தானாகவே ஸ்கேன் செய்யும் வகையில் வடிவமைக்கப்பட்டுள்ளது. ஆனால், சில விமான நிறுவனங்கள் பயணிகளின் விபரங்களை உரிய நேரத்தில் முறையாக வழங்காத காரணத்தினால், பயணிகள் கையேட்டு சரிபார்ப்பு கவுண்டர்களுக்கு திருப்பி அனுப்பப்படுகின்றனர்," என ஜூட் பெர்னாண்டோ விளக்கமளித்தார்.

இந்த ஈ-கேட் முறைமை கடந்த 2026 ஜனவரி 28 ஆம் திகதி உத்தியோகபூர்வமாக ஆரம்பித்து வைக்கப்பட்டது. ஆஸ்திரியா, பெல்ஜியம் போன்ற நாடுகள் இவ்வாறான முறைமைகளை முழுமையாக ஒருங்கிணைக்க குறைந்தது இரண்டு வருடங்கள் எடுத்துக் கொண்டதாகச் சுட்டிக்காட்டப்பட்டுள்ளது.

தற்போது ஏற்படும் பிழைகள் பதிவு செய்யப்பட்டு, ஒவ்வொன்றாக சரிசெய்யப்பட்டு வருகின்றன. இந்த முறைமை Waiting Time-ஐக் குறைக்கவும், பாதுகாப்பை பலப்படுத்தவும் நோக்கமாகக் கொண்டது.