காரணமாக, இலங்கையின் பணவீக்கம் 7 சதவீதம் வரை உயர்வதற்கான சாத்தியக்கூறுகள் காணப்படுவதாக மத்திய வங்கி ஆளுநர் கலாநிதி நந்தலால் வீரசிங்க தெரிவித்துள்ளார்.
மத்திய கிழக்கு யுத்தம் குறுகிய காலத்தில் முடிவுக்கு வரும் என கணிக்கப்பட்ட போதிலும், அது நீண்ட காலமாக நீடிப்பதன் காரணமாக உள்நாட்டுப் பொருளாதாரத்திற்கும் கடுமையான தாக்கங்கள் ஏற்பட்டுள்ளதாக அவர் சுட்டிக்காட்டியுள்ளார்.
நேற்று (ஜூன் 01) இரவு தொலைக்காட்சி நிகழ்ச்சியொன்றில் கலந்துகொண்டு கருத்துத் தெரிவிக்கும் போதே மத்திய வங்கி ஆளுநர் கலாநிதி நந்தலால் வீரசிங்க இதனைக் குறிப்பிட்டுள்ளார்.
பணவீக்கத்தைக் கட்டுப்படுத்த நாணயக் கொள்கை இறுக்கம்!
ஊடக சந்திப்பில் மத்திய வங்கி ஆளுநர் மேலும் விபரிக்கையில்:
"இந்த வாரத்தில் எரிபொருள் விலை மேலும் அதிகரித்துள்ளது. விலை அதிகரிப்பு என்பது தற்போது 5.4% - 5.5%ஆகக் காணப்படும் நிலையில், எதிர்காலத்தில் அது நிச்சயமாக மேலும் உயரும். இதில் எந்தவொரு சந்தேகமும் இல்லை. எரிபொருள் விலை அதிகரித்து வருவது தரவுகளின்படி தெளிவாகத் தெரிகின்றது. எவ்வாறாயினும், நுகர்வில் இன்னும் எவ்வித குறைவையும் நாம் காணவில்லை.
இதனால்தான் பணவீக்கம் அதிகரிக்கும் அபாயம் ஏற்பட்டுள்ளது. இந்நிலைமை தொடருமானால் தற்போதைய 5% என்ற மட்டத்திலிருந்து பணவீக்கம் நிச்சயமாக 7% வரை அதிகரிக்கக்கூடும். இதற்கான ஒரு பூர்வாங்க ஆயத்தமாகவே கடந்த வாரத்தில் எமது நாணயக் கொள்கையை இறுக்கமாக்கினோம். இதன் மூலம் அடுத்த மூன்று மாதங்களில் சந்தையில் நிலவும் கேள்வியை (Demand) ஒரு குறிப்பிட்ட அளவிற்கு தணித்து, கேள்வியைக் குறைப்பதன் ஊடாக பணவீக்கம் அதிகரிப்பதைத் தடுப்பது நாட்டிற்கு மிகவும் முக்கியமானது. சந்தைக் கேள்வியைக் கட்டுப்படுத்தி, அதன் மூலம் பணவீக்கத்தைக் கட்டுப்பாட்டிற்குள் வைத்திருக்கவே நாங்கள் முயற்சிக்கிறோம்".
சட்டபூர்வமான பணத்தை இலங்கைக்கு அனுப்புவதில் தடையில்லை!
சட்டபூர்வமாக சம்பாதிக்கப்பட்ட எந்தவொரு பணத்தையும் இலங்கைக்கு அனுப்புவதற்கு எவருக்கும் எந்தவொரு தடையும் இல்லை என்றும் மத்திய வங்கி ஆளுநர் கலாநிதி நந்தலால் வீரசிங்க இந்த விவாதத்தின் போது குறிப்பிட்டுள்ளார்.
"அதில் எந்தப் பிரச்சினையும் இல்லை. நாட்டில் பணச் சலவை தொடர்பான சட்டக் கட்டமைப்பு ஒன்று காணப்படுகின்றது. அச்சட்டத்தின் கீழ், சட்டபூர்வமாகப் பெறப்பட்ட பணத்தை வங்கி ஒன்றின் ஊடாக இலங்கையிலுள்ள வங்கிக்கு மீண்டும் அனுப்புவதற்கு எந்தவொரு தடையும் இல்லை. ஆனால் அது சட்டவிரோதமான பணமாக இருந்தால், அதனை அனுப்புவது கடினமாகும்".