'யாழ் தேவி' மற்றும் 'உத்தர தேவி' ரயில்கள் இன்னும் இயக்கப்படவில்லை!

திருத்தப் பணிகள் நிறைவடைந்துள்ள போதிலும், 'யாழ் தேவி' உள்ளிட்ட முக்கிய ரயில்கள் இன்னும் சேவையில் ஈடுபடுத்தப்படவில்லை என ரயில் நிலைய அதிபர்கள் சங்கம் தெரிவித்துள்ளது.

'உத்தர தேவி' நகர்சேர் அதிவேக ரயிலும் இதுவரை இயக்கப்படவில்லை என சுட்டிக்காட்டியுள்ள அந்தச் சங்கம், ஏனைய பாதைகளிலும் ரயில் சேவைகள் மட்டுப்படுத்தப்பட்டுள்ளதால் பயணிகள் கடும் சிரமத்திற்கு உள்ளாகியுள்ளனர் எனத் தெரிவித்துள்ளது.

இது குறித்து கருத்து தெரிவித்துள்ள ரயில் நிலைய அதிபர்கள் சங்கத்தின் தலைவர் சுமேத சோமரத்ன:

"வடக்கு மற்றும் மன்னார் ரயில் பாதைகளின் திருத்தப் பணிகள் முடிவடைந்துள்ளன. ஆனால், ரயில்களின் பற்றாக்குறை காரணமாக யாழ் தேவி, உத்தர தேவி மற்றும் தலைமன்னார் ரயில்களை இன்னும் இயக்க முடியவில்லை. ரயில்வே பொது மேலாளர் முயற்சி செய்தாலும், போக்குவரத்து அமைச்சின் மட்டத்தில் இருந்து தேவையான வசதிகள் கிடைப்பதில்லை என்பது தெளிவாகத் தெரிகிறது."

மேலும், அரச ஊழியர்களுக்கான புதிய மாத கால பருவகால அட்டைகள் (Season Tickets) மற்றும் சாதாரண பயணச் சீட்டுகள் நிலையங்களுக்கு முறையாக அனுப்பி வைக்கப்படவில்லை எனவும், இதனால் ரயில் நிலைய அதிபர்கள் பொதுமக்களுடன் தேவையற்ற முரண்பாடுகளை எதிர்கொள்ள நேரிட்டுள்ளதாகவும் அவர் குறிப்பிட்டார்.

எரிபொருள் தட்டுப்பாடு நிலவும் வேளையில் ரயில் போக்குவரத்தை அதிகரிக்க வேண்டும் என முன்மொழியப்பட்ட போதிலும், போக்குவரத்து அமைச்சர் அது குறித்து எவ்வித அக்கறையும் காட்டவில்லை என அவர் தனது அதிருப்தியை வெளியிட்டார்.

அத்துடன், மின்சார ரயில்களை ஆரம்பிப்பதற்கு முன்னர் தற்போதுள்ள ரயில் பாதைகளை முறையாகப் பராமரிக்க வேண்டும் எனவும், குறிப்பாக கடலோர ரயில் பாதை (Coast Line) மிகவும் மோசமான நிலையில் உள்ளதால் பயணிகளின் உயிருக்கு ஆபத்து நிலவுவதாகவும் அவர் எச்சரித்துள்ளார்.