'நிறைவேற்று அதிகார ஜனாதிபதி முறையை ஒழிப்பது உடனடி முன்னுரிமையல்ல' என்கிறது அரசாங்கம்!

அறிமுகப்படுத்துவது தற்போதைய அரசாங்கத்தின் தேர்தல் வாக்குறுதிகளில் ஒன்றாக இருந்தபோதிலும், அது இந்த நேரத்தில் அரசாங்கத்தின் உடனடி முன்னுரிமை அல்ல என்று அரசாங்கத்தின் சிரேஷ்ட விபரம் அறிந்த தரப்பொன்று நேற்று தெரிவித்துள்ளது.

தேசிய மக்கள் சக்தி (NPP) தனது 'பொலிவான தேசம் - அழகான வாழ்க்கை' என்ற தேர்தல் கொள்கை பிரகடனத்தில், தற்போதைய அரசியலமைப்பை நீக்கி, நிறைவேற்று அதிகார ஜனாதிபதி முறையை ஒழிக்கும் புதிய அரசியலமைப்பைக் கொண்டு வருவதாக உறுதியளித்திருந்தது.

இது குறித்து 'டெய்லி மிரர்' (Daily Mirror) நாளிதழ் எழுப்பிய கேள்விக்கு பதிலளித்த பொது நிர்வாகம், உள்நாட்டலுவல்கள், மாகாண சபைகள் மற்றும் உள்ளூராட்சி மன்றங்கள் அமைச்சர் சந்தன அபேரத்ன, புதிய அரசியலமைப்பை இயற்றுவது குறித்து அரசாங்கம் கவனம் செலுத்தியுள்ள போதிலும், அது இந்த நேரத்தில் முதன்மைப் பணியாகக் கருதப்படவில்லை என்பதை உறுதிப்படுத்தினார்.

"இது எங்களது தேர்தல் வாக்குறுதிகளில் ஒன்றாகும். எனினும், தற்போதைய சூழ்நிலையில் எம்மால் இதற்கு முதலிடம் (முன்னுரிமை) வழங்க முடியாது" என அவர் குறிப்பிட்டுள்ளார்.

1978 முதல் நீடிக்கும் அரசியலமைப்பு வாக்குறுதி

இலங்கையின் தற்போதைய அரசியலமைப்பு கடந்த 1978ஆம் ஆண்டு அறிமுகப்படுத்தப்பட்டது. 1994ஆம் ஆண்டு முதல் ஆட்சிக்கு வந்த அடுத்தடுத்த அரசாங்கங்கள் நிறைவேற்று அதிகார ஜனாதிபதி முறையை ஒழித்து புதிய அரசியலமைப்பை அறிமுகப்படுத்துவதாக உறுதியளித்தன.

எவ்வாறாயினும், அங்கொன்றும் இங்கொன்றுமாக மேற்கொள்ளப்பட்ட திருத்தங்களைத் தவிர, அது ஒருபோதும் நடைமுறையில் சாத்தியமாகவில்லை.

தேர்தல் முறைமை மாற்றத்திற்கான பரிந்துரைகள் ஒரு வருடத்திற்குள்!

இருப்பினும், தனது தலைமையிலான 'நாடாளுமன்றத் தெரிவுக்குழு' நாடாளுமன்ற மற்றும் ஜனாதிபதித் தேர்தல் முறைமைகளை மாற்றுவதற்கான இறுதிப் பரிந்துரைகளை ஒரு வருடத்திற்குள் சமர்ப்பிக்கும் என்று அமைச்சர் மேலும் தெரிவித்தார்.

இந்தத் தேர்தல் முறைமைக்கான அளவுகோல்களை மாற்றுவதற்கு அரசாங்கம் எவ்வாறு உத்தேசித்துள்ளது என்று வினவப்பட்ட போது,

"அது முற்றிலும் ஏனைய கட்சிகள் மற்றும் அமைப்புகளின் கருத்துக்களைப் பொறுத்தே அமையும். ஆளும் கட்சி என்ற வகையில் நாங்கள் எங்கள் சொந்த முன்மொழிவுகளை மட்டும் முன்வைக்கவில்லை. இது குறித்து ஆர்வமுள்ள ஏனைய அனைத்து தரப்பினரின் முன்மொழிவுகளையும் ஏற்பதற்கு நாங்கள் தயாராக இருக்கிறோம். அதன் மூலமே பரிந்துரைகளை உருவாக்குவோம். இந்த முழு செயல்முறையும் ஒரு வருடத்திற்குள் நிறைவடையும்" என அவர் தெரிவித்தார்