சொந்தத் தங்கையை கழுத்தை நெரித்துக் கொலை செய்து, சடலத்தை குளியலறை நீர் தொட்டிக்குள் மறைத்து வைத்த குற்றச்சாட்டில் 14 வயதுடைய பாடசாலை மாணவன் ஒருவன் ஏறாவூர் பொலிஸாரினால் கைது செய்யப்பட்டுள்ளார்.
இந்தச் சம்பவத்தில் ஏறாவூர் பகுதியைச் சேர்ந்த சாத்நாதன் சதீசா என்ற சிறுமியே பரிதாபமாக உயிரிழந்துள்ளார்.
TikTok வீடியோவினால் வந்த வினை!
பொலிஸாரின் ஆரம்பகட்ட விசாரணைகளின்படி, உயிரிழந்த சிறுமியின் தாய் தற்போது வெளிநாட்டில் பணிபுரிந்து வருவதுடன், சம்பவத்தன்று தந்தை வேலைக்காக வீட்டை விட்டு வெளியே சென்றிருந்தார்.
இதன்போது வீட்டில் இருவரும் தனியாக இருந்த வேளையில், டிக் டொக் வீடியோக்களைப் பார்ப்பதற்காக அண்ணன் தனது தங்கையிடம் மொபைல் போனை கேட்டுள்ளார். இதன்போது இருவருக்குமிடையே கடுமையான வாக்குவாதம் வெடித்துள்ளது.
தங்கை மொபைல் போனை கொடுக்க மறுத்ததால் ஆத்திரமடைந்த அண்ணன், தங்கையைத் தாக்கியதுடன் அவளது கழுத்தை நெரித்துக் கொலை செய்துள்ளார்.
எதுவும் நடவாதது போல் அண்டை வீட்டுக்குச் சென்ற அண்ணன்!
தங்கையின் கழுத்தை நெரித்ததில் அவள் மயக்கமடைந்த அல்லது உயிரிழந்ததை அடுத்து, சந்தேகநபரான அண்ணன் அவளது சடலத்தை குளியலறைக்கு இழுத்துச் சென்று, அங்கிருந்த தண்ணீர் தொட்டிக்குள் போட்டு மறைத்துள்ளார். அதன் பின்னர், வீட்டில் எதுவும் நடக்காதது போல அண்டை வீட்டுக்குச் சென்று விளையாடியுள்ளார்.
வேலை முடிந்து தந்தை மாலை வீடு திரும்பிய போது பிள்ளைகளைக் காணாது தேடியுள்ளார். இதன்போது குளியலறை தண்ணீர் தொட்டிக்குள் மகள் மூழ்கியிருந்ததைக் கண்டு அதிர்ச்சியடைந்துள்ளார்.
அவர் உடனடியாக மகளை மீட்டு வைத்தியசாலைக்குக் கொண்டு சென்ற போதிலும், அவள் ஏற்கனவே உயிரிழந்துவிட்டதாக வைத்தியர்கள் தெரிவித்துள்ளனர்.
பொலிஸாரிடம் சிக்கிய சிறுவன்!
சம்பவம் தொடர்பாக ஏறாவூர் பொலிஸார் மேற்கொண்ட தீவிர விசாரணைகளின் போது, 14 வயதுடைய அண்ணன் தனது தங்கையைக் கொலை செய்ததை ஒப்புக்கொண்டு வாக்குமூலம் அளித்துள்ளார்.
சிறுமியின் மரணத்திற்கான துல்லியமான காரணம் கழுத்து நெரிக்கப்பட்டதா அல்லது தண்ணீரில் மூழ்கியதா என்பதைக் கண்டறியும் பிரேத பரிசோதனைக்காகச் சடலம் தற்போது மட்டக்களப்பு போதனா வைத்தியசாலையில் வைக்கப்பட்டுள்ளது.
கைது செய்யப்பட்டுள்ள 14 வயதுடைய சந்தேக நபரான மாணவன் மட்டக்களப்பு நீதவான் நீதிமன்றத்தில் ஆஜர்படுத்தப்படவுள்ளதாக ஏறாவூர் பொலிஸார் மேலும் தெரிவித்துள்ளனர்.