அசல் நோக்கத்திலிருந்து விலகி, உலகளாவிய கடன் வழங்குநர்களின் இலாபத்தை அதிகப்படுத்தும் ஒரு "மூலதன மேலாளராக" மட்டுமே செயற்பட்டு வருவதாக நாட்டின் முன்னணி பொருளாதார நிபுணர்கள் சுட்டிக்காட்டியுள்ளனர்.
எனவே, இலங்கை இந்த டொலர் சார்பு நிலையிலிருந்து விடுபடுவதற்கு உடனடியாக ஒரு மாற்றுப் பொருளாதாரக் கட்டமைப்பிற்குள் நுழைய வேண்டும் என்றும் அவர்கள் வலியுறுத்தியுள்ளனர்.
பொருளாதார விவகாரங்கள் ஆய்வாளர் கயந்த தெஹிவத்தவினால் எழுதப்பட்ட “பாத் ஒஃப் ப்ரீடம்” நூல் கொழும்பு பண்டாரநாயக்க சர்வதேச மாநாட்டு மண்டபத்தில் உத்தியோகபூர்வமாக வெளியிடப்பட்ட போதே இந்த அதிரடி கருத்துக்கள் முன்வைக்கப்பட்டன.
"கடன் வழங்குநர்களின் பாதுகாவலனாகவே IMF செயற்படுகிறது" -
இவ்விழாவில் விசேட உரையாற்றிய பேராசிரியர் சுமனசிறி லியனகே, 1970ஆம் ஆண்டு தசாப்தத்திற்குப் பின்னர் சர்வதேச நாணய நிதியத்தின் (IMF) பங்கு பாரியளவில் மாற்றமடைந்துள்ளதாகக் குறிப்பிட்டுள்ளார்.
"IMF உருவாக்கப்பட்மைக்கான உண்மையான நோக்கம் இன்று நிறைவேற்றப்படுவதில்லை. இன்று அவர்களின் ஒரே நோக்கம் கடன்பட்டுள்ள நாடுகளை அபிவிருத்தி செய்வதல்ல, மாறாக பன்னாட்டு கடன் வழங்குநர்களின் இலாபங்களையும் அவர்களின் மூலதனத்தையும் பாதுகாத்துக் கொடுப்பது மட்டுமேயாகும்."
கயந்த தெஹிவத்தவின் நூல் குறித்துக் கருத்துத் தெரிவித்த பேராசிரியர், இலங்கை தற்போது அமெரிக்க டொலர்களை அடிப்படையாகக் கொண்ட ஒரு பாரிய கடன் பொறியில் சிக்கியுள்ளதாகக் கூறினார்.
இதிலிருந்து மீள்வதற்கு "பாத் ஒஃப் ப்ரீடம்" நூலில் முன்மொழியப்பட்டுள்ளவாறு, நிலையான அபிவிருத்தி மற்றும் சமூக நீதியைக் கொண்ட ஒரு மாற்றுப் பொருளாதாரக் கட்டமைப்பை நாட்டிற்குள் நடைமுறைப்படுத்துவது இன்றியமையாதது என அவர் சுட்டிக்காட்டினார்.
மத்திய வங்கி சட்டத்தினால் அரசாங்கத்தின் அதிகாரம் அவுட்; 'தீவிர நவதாராளவாத' கட்டத்திற்குள் இலங்கை
இவ்விழாவின் பிரதான சொற்பொழிவை நிகழ்த்திய பேராதனைப் பல்கலைக்கழகத்தின் பொருளாதார மற்றும் புள்ளியியல் விபரத் துறையின் சிரேஷ்ட விரிவுரையாளர் கலாநிதி கல்ப ராஜபக்ஷ, IMFஇன் அனுசரணையுடன் மேற்கொள்ளப்படும் சீர்திருத்தங்கள் காரணமாக இலங்கை தற்போது 'தீவிர நவதாராளவாத' (பத்தான ஒரு கட்டத்திற்குள் தள்ளப்பட்டுள்ளதாக எச்சரித்துள்ளார்.
விசேடமாக 2023ஆம் ஆண்டின் புதிய மத்திய வங்கிச் சட்டத்தின் ஊடாக மத்திய வங்கியின் ஒட்டுமொத்தப் பங்கும் முற்றாக மாற்றியமைக்கப்பட்டுள்ளதாக அவர் குற்றம் சுமத்தினார்.
-
அரசாங்கத்தின் தலையீடு கட்டுப்படுத்தப்படல்: விலை ஸ்திரத்தன்மை, பணவீக்கத்தைக் கட்டுப்படுத்தல் மற்றும் நிறுவனச் சுயாதீனம் என்ற போர்வையின் கீழ், நாட்டின் நிதித்துறைக் கொள்கைகளின் மீது அரசாங்கத்திற்கு இருந்த நேரடித் தலையீட்டு அதிகாரம் இல்லாது செய்யப்பட்டுள்ளது.
-
வொஷிங்டன் உடன்படிக்கை (Washington Consensus): மத்திய வங்கியின் தற்போதைய பொருளாதார தர்க்கமானது தேசிய அபிவிருத்திக்காக வடிவமைக்கப்படவில்லை. மாறாக, IMF மற்றும் வொஷிங்டன் உடன்படிக்கைகளுக்கு இணங்க, உலகளாவிய நிதி மூலதனத்தினதும் ஒரு குறிப்பிட்ட முதலாளித்துவ வர்க்கத்தினதும் வரப்பிரசாதங்களைப் பாதுகாப்பதற்காக மட்டுமே அது உருவாக்கப்பட்டுள்ளது.
எந்தவொரு கணத்திலும் வெடிக்கக்கூடிய இலங்கையின் 3 "நிதி வெடிகுண்டுகள்"!
இங்கு சபையோரை நோக்கி உரையாற்றிய பொருளாதார ஆய்வாளரும் நூலின் ஆசிரியருமான கயந்த தெஹிவத்த, இலங்கையின் நிதிச் சந்தையானது தற்போது மிகவும் பலவீனமான ஒரு மட்டத்தில் உள்ளதாகக் குறிப்பிட்டுள்ளார்.
எந்தவொரு சந்தர்ப்பத்திலும் ஒட்டுமொத்த நிதி அமைப்பிலும் (Financial System) பெரும் நெருக்கடியை ஏற்படுத்தக்கூடிய 3 பிரதான அழுத்த புள்ளிகளை அல்லது தீர்க்கமான சந்திகளை அடையாளம் காண முடியும் என அவர் விபரித்தார்.
அவரது ஆய்வின்படி, எந்த நேரத்திலும் வெடிக்கக் காத்திருக்கும் அந்த 3 நிதி வெடிகுண்டுகள் வருமாறு:
-
பரிமாற்ற சந்தை (Foreign Exchange Market)
-
சொத்துச் சந்தை (Asset Market) - (பங்குகள், பிணைமுறிப் பத்திரங்கள் மற்றும் அசையா சொத்து ரியல் எஸ்டேட் வணிகங்கள் உட்பட)
-
கடன் சந்தை (Credit Market) - (வெளிநாட்டுக் கடன்கள் மற்றும் உள்நாட்டுத் தனியார் கடன்கள் உட்பட)
நிதிச் சந்தை வீழ்ச்சியும் ரூபாயின் மதிப்பிறக்கமும்!
குறிப்பிடப்பட்ட இந்த மூன்று சந்தைகளில் (வினிமய, சொத்து, கடன்) ஏதேனும் ஒரு துறையில் நெருக்கடி ஆரம்பமானால், அது மிக வேகமாக ஏனைய துறைகளுக்கும் பரவக்கூடும் என பொருளாதார ஆய்வாளர் கயந்த தெஹிவத்த மேலும் விளக்கியுள்ளார்.
இதன் இறுதி விளைவாக, உள்நாட்டு நாணயத்தின் மதிப்பு பாரியளவில் வீழ்ச்சியடைவதுடன் (Depreciation), சொத்துக்களின் விலைகளும் வீழ்ச்சியடைந்து ஒட்டுமொத்த நிதி அமைப்பும் முடங்கும் அபாயம் உள்ளதாக அவர் எச்சரித்துள்ளார்.
விசேடமாக, சமீபத்தில் மேற்கொள்ளப்பட்ட வட்டி வீத அதிகரிப்பு காரணமாக, 11.9 ட்ரில்லியன் ரூபா பெறுமதியான உள்நாட்டுத் தனியார் கடன்கள் மீது கடுமையான அழுத்தம் பிரயோகிக்கப்படும் என்றும், இதனால் கடன் சந்தையின் பலவீனமான நிலைமை மேலும் மோசமடையும் என்றும் அவர் சுட்டிக்காட்டியுள்ளார்.
IMF மாதிரிகளுக்குப் பதிலாக மாற்றுப் பொருளாதாரக் கொள்கை தேவை!
வழமையான சர்வதேச நாணய நிதியத்தின் (IMF) நிபந்தனைகள் மற்றும் திட்டங்களை மட்டுமே நம்பியிருந்து, பொதுமக்கள் மீது பாரிய வரிச் சுமைகளைத் திணிப்பதற்குப் பதிலாக, உள்நாட்டு உற்பத்தி மற்றும் சமூக நீதியை அடிப்படையாகக் கொண்ட ஒரு சுயாதீனமான பொருளாதாரக் கொள்கை நாட்டிற்கு உடனடியாகத் தேவைப்படுவதாக இங்கு கூடியிருந்த பொருளாதார நிபுணர்கள் சுட்டிக்காட்டியுள்ளனர்.
முக்கிய இராஜதந்திரிகள் மற்றும் அரசியல் தலைவர்கள் பங்கேற்பு
நூல் வெளியீட்டு விழாவில் பல முக்கிய உள்நாட்டு, வெளிநாட்டு பிரமுகர்கள் மற்றும் இராஜதந்திரிகள் கலந்துகொண்டிருந்தனர். அவர்களுள் சில விபரம் வருமாறு:
-
பற்றிசியா லாசரா பேகோ குவேரா (Patricia Lázara Pego Guerra): இலங்கைக்கான கியூபா தூதுவர்
-
மொஜ்தபா பர்கந்தான் (Mojtaba Barghandan): இலங்கைக்கான ஈரான் இஸ்லாமிய குடியரசு தூதரகத்தின் சிரேஷ்ட இராஜதந்திரி
-
திலங்க சுமதிபால: முன்னாள் பிரதிச் சபாநாயகர்
-
டளஸ் அழகப்பெரும: முன்னாள் கல்வி அமைச்சர்
-
புபுது ஜயகொட: முன்னிலை சோசலிசக் கட்சியின் கல்விச் செயலாளர்