இன்று காலை நிலவரப்படி, பிரெண்ட் (Brent) ரக மசகு எண்ணெய் பீப்பாய் ஒன்றின் விலை 87.88 அமெரிக்க டொலர்களாகப் பதிவாகியுள்ளது. அதேவேளை, அமெரிக்க மசகு எண்ணெய் பீப்பாய் ஒன்றின் விலை 83.35 டொலர்களாகக் காணப்படுவதாகக் குறிப்பிடப்பட்டுள்ளது.
உலக சந்தையில் கடந்த சில நாட்களாக சடுதியாக அதிகரித்திருந்த மசகு எண்ணெய் விலைகள், தற்போது மீண்டும் வீழ்ச்சியை நோக்கி நகர்ந்துள்ளன.
மத்திய கிழக்கில் நிலவும் போர் பதற்றம் காரணமாக, கடந்த திங்கட்கிழமை மசகு எண்ணெய் பீப்பாய் ஒன்றின் விலை 2022 ஜூலை மாதத்திற்குப் பின்னர் முதற்தடவையாக 100 டொலர் எல்லையைத் தாண்டியதுடன், அதிகபட்சமாக 119 டொலர்கள் வரை உயர்ந்திருந்தது.
இவ்வாறானதொரு பின்னணியில், "யுத்தம் மிக விரைவில் முடிவுக்கு வரும்" என அமெரிக்க ஜனாதிபதி டொனால்ட் ட்ரம்ப் நேற்று விடுத்திருந்த கருத்தையடுத்து, பிரெண்ட் ரக மசகு எண்ணெய் விலை 90 டொலர்கள் வரை குறைவடைந்தது. இது 8 சதவீத வீழ்ச்சியாகும்.
இதேவேளை, ஈரானிய போர்ச் சூழல் காரணமாக கடந்த சில நாட்களாக நிலவி வந்த கடும் தளம்பல் நிலையைத் தொடர்ந்து, இன்று காலை ஆசிய சந்தை வர்த்தக நடவடிக்கைகள் ஆரம்பமாகிய போது மசகு எண்ணெய் விலை ஓரளவிற்கு நிலையான மட்டத்தை எட்டியுள்ளதாகத் தெரிவிக்கப்படுகிறது.