பொலிஸ் உத்தியோகத்தர்களைக் கொலை செய்ததாகக் குற்றம் சுமத்தப்பட்ட மூவருக்கு இன்று (19) காலை மரண தண்டனை நிறைவேற்றப்பட்டுள்ளது. இவர்களில் ஈரானிய தேசிய மற்போர் (Wrestling) அணியைச் சேர்ந்த இளம் வீரர் சலே முகமதியும் (Saleh Mohammadi) அடங்குகின்றார்.
ஈரானின் கொம் (Qom) மாகாணத்தில் இந்தத் தூக்குத் தண்டனைகள் நிறைவேற்றப்பட்டதாக அந்நாட்டு தஸ்நிம் (Tasnim) செய்திச் சேவை உறுதிப்படுத்தியுள்ளது.
குற்றச்சாட்டுகள்:
சலே முகமதி, மெஹ்தி காசெமி மற்றும் சயீத் தாவூதி ஆகிய மூவரும் பொலிஸாரைக் கொன்றதுடன், 'மொஹாரெபே' (இறைவனுக்கு எதிரான போர்) புரிந்ததாகவும் குற்றம் சுமத்தப்பட்டு தண்டனை விதிக்கப்பட்டது.
மனித உரிமை அமைப்புகளின் விசனம்:
தண்டனைக்குள்ளானவர்கள் சித்திரவதைக்கு உட்படுத்தப்பட்டு பலவந்தமாக வாக்குமூலம் பெறப்பட்டதாகவும், அவர்களுக்கு நியாயமான விசாரணை வழங்கப்படவில்லை என்றும் சர்வதேச மனித உரிமை அமைப்புகள் குற்றம் சுமத்தியுள்ளன.
பின்னணி:
ஈரானிய நாணயத்தின் வீழ்ச்சி மற்றும் வாழ்க்கைச் செலவு அதிகரிப்புக்கு எதிராக டிசம்பர் மற்றும் ஜனவரி மாதங்களில் ஈரான் முழுவதும் வெடித்த போராட்டங்களில் 7,000 இற்கும் அதிகமானோர் கொல்லப்பட்டதாகத் தரவுகள் தெரிவிக்கின்றன.
சர்வதேச எதிர்வினைகள்:
இஸ்ரேலுக்காக உளவு பார்த்ததாகக் குற்றம் சுமத்தப்பட்ட சுவீடன் - ஈரான் இரட்டைக் குடியுரிமை கொண்ட ஒருவருக்கும் நேற்று மரண தண்டனை நிறைவேற்றப்பட்டது. இதற்கு சுவீடன் தனது கடும் கண்டனத்தை வெளியிட்டுள்ளது.
இதற்கிடையில், போராட்டக்காரர்களுக்கு மரண தண்டனை நிறைவேற்றப்பட்டால் ஈரானுக்கு எதிராக "கடுமையான நடவடிக்கை" எடுக்கப்படும் என அமெரிக்க ஜனாதிபதி டொனால்ட் ட்ரம்ப் கடந்த ஜனவரியில் எச்சரித்திருந்தார்.
தற்போதைய சூழலில் அமெரிக்கா மற்றும் இஸ்ரேல் ஈரானின் மூலோபாய இலக்குகள் மீது பாரிய தாக்குதல்களை முன்னெடுத்து வருகின்றமை குறிப்பிடத்தக்கது.