கடந்த 17ஆம் திகதி சபையில் கருத்து வெளியிட்டிருந்த ஆளுங்கட்சித் தலைவரும் அமைச்சருமான பிமல் ரத்நாயக்க, ஜனாதிபதியின் இந்த வருகையை உத்தியோகபூர்வமாக உறுதிப்படுத்தியிருந்தார்.
எதிர்க்கட்சித் தலைவர்களுடன் சந்திப்பு:
நாடாளுமன்றத்தில் உரையாற்றுவதைத் தொடர்ந்து, எதிர்க்கட்சித் தலைவர்களுடன் விசேட கலந்துரையாடல் ஒன்றினை முன்னெடுக்கவும் ஜனாதிபதி எதிர்பார்ப்பதாக அமைச்சர் பிமல் ரத்நாயக்க மேலும் சுட்டிக்காட்டினார்.
அரசியல் முக்கியத்துவம்:
நாட்டில் நிலவும் தற்போதைய எரிசக்தி நெருக்கடி மற்றும் சர்வதேச போர்ச் சூழல் தொடர்பில் ஜனாதிபதி இதன்போது முக்கிய கருத்துக்களை முன்வைக்கலாம் என எதிர்பார்க்கப்படுகிறது.
நாடாளுமன்றக் கூட்டத்தொடரின் இன்றைய அமர்வு ஜனாதிபதியின் வருகையையொட்டி மிகுந்த அரசியல் முக்கியத்துவம் வாய்ந்ததாகக் கருதப்படுகிறது.
முன்னதாக, ஏற்றுமதிக்கு முன்னுரிமை அளித்து, இத்துறை எதிர்நோக்கும் சவால்களை வெற்றிகொள்ள அரசாங்கம் அதிகபட்சமாக தலையிடும் என்று ஜனாதிபதி அநுர குமார திஸாநாயக்க தெரிவித்துள்ளார்.
மத்திய கிழக்கில் உருவாகியுள்ள போர்ச் சூழல் காரணமாக இந்நாட்டின் ஏற்றுமதித் துறைக்கு ஏற்பட்டுள்ள சவால்களை வெற்றிகொள்வதற்கு எடுக்கப்பட வேண்டிய அடுத்தகட்ட நடவடிக்கைகள் குறித்து ஆராய்வதற்காக, இத்துறையின் பிரதான ஏற்றுமதியாளர்கள் மற்றும் இலங்கை வர்த்தக சபை பிரதிநிதிகளுடன் நேற்று (19) பிற்பகல் ஜனாதிபதி அலுவலகத்தில் இடம்பெற்ற கலந்துரையாடலின் போதே ஜனாதிபதி இவ்வாறு தெரிவித்தார்.
இங்கு குறிப்பாக ஏற்றுமதித் துறைக்கும், உற்பத்தியாளர்கள் மற்றும் சேவை வழங்குநர்களுக்கும் எரிபொருளைப் பெற்றுக்கொள்வதில் ஏற்பட்டுள்ள சிக்கல்கள் குறித்து ஜனாதிபதி கவனம் செலுத்தினார்.
தேசிய பொருளாதாரத்திற்கு ஏற்படக்கூடிய பாதிப்புகளைக் குறைத்து, உருவாகியுள்ள சூழ்நிலையை முகாமைத்துவம் செய்வதற்காக ஏற்றுமதித் துறைக்கு முன்னுரிமை அளித்துச் செயற்படுவது குறித்து இங்கு விசேட கவனம் செலுத்தப்பட்டது.
இத்துறையில் எழுந்துள்ள பிரச்சினைகள் மற்றும் அது தொடர்பாக ஏற்றுமதியாளர்கள் மற்றும் இத்துறையில் ஈடுபட்டுள்ளவர்களால் முன்வைக்கப்பட்ட கருத்துகள் மற்றும் ஆலோசனைகள் குறித்தும் இங்கு விரிவாகக் கலந்துரையாடப்பட்டது.