ஈரான் போர்க் கப்பல் மூழ்கடிப்புக்குப் பின் இலங்கைக் கடற்பரப்பில் உச்சக்கட்ட தயார்நிலை!

கடற்பரப்பிற்குள் ஸ்திரத்தன்மை மற்றும் பாதுகாப்பை உறுதிப்படுத்தும் நோக்கில் இலங்கை கடற்படை உச்சக்கட்ட தயார்நிலையில் (High Alert) வைக்கப்பட்டுள்ளதாக பிரதி பாதுகாப்பு அமைச்சர் அருண ஜயசேகர தெரிவித்துள்ளார்.

தேசிய பாதுகாப்பிற்கு உடனடி அச்சுறுத்தல்கள் ஏதுமில்லை என பொதுமக்களுக்கு உறுதியளித்துள்ள அவர், கடற்படையினர் தமது வழமையான கடல்சார் கண்காணிப்பு நடவடிக்கைகளைத் தீவிரப்படுத்தியுள்ளதாகக் குறிப்பிட்டுள்ளார்.

ஈரானிய மாலுமிகளின் உடல்கள் கையளிப்பு

கடந்த மார்ச் 4ஆம் திகதி, அமெரிக்க நீர்மூழ்கிக் கப்பலால் தாக்கி மூழ்கடிக்கப்பட்ட ஈரானிய போர்க்கப்பலில் பலியான 84 கடற்படையினரின் உடல்கள் ஈரான் அரசாங்கத்திடம் ஒப்படைக்கப்பட்டுள்ளதாக பிரதி அமைச்சர் நேற்று உறுதிப்படுத்தினார்.

வெளிவிவகார அமைச்சு மற்றும் தெஹ்ரானில் உள்ள இலங்கை தூதரகம் ஆகியவற்றின் ஒருங்கிணைப்புடன், சனிக்கிழமை இரவு விசேட விமானம் மூலம் உடல்கள் ஈரானுக்கு அனுப்பி வைக்கப்பட்டன.

மீட்கப்பட்டவர்கள் இராணுவக் காவலில்

இந்தச் சம்பவத்தின் போது வெவ்வேறு கப்பல்களிலிருந்து மீட்கப்பட்ட 239 வெளிநாட்டவர்கள் தற்போது இலங்கை இராணுவத்தின் பாதுகாப்பில் வைக்கப்பட்டுள்ளனர்:

• முதலாவது கப்பலிலிருந்து 32 பேரும், இரண்டாவது கப்பலிலிருந்து 207 பேரும் மீட்கப்பட்டுள்ளனர்.

• இவர்கள் மேலதிக விசாரணைகளுக்காக வெலிசர மற்றும் கொக்கல முகாம்களில் தங்கவைக்கப்பட்டுள்ளனர்.

இலங்கையின் நடுநிலையான நிலைப்பாடு

மத்திய கிழக்கில் நிலவும் இந்த பாரிய கடல்சார் மோதலின் போது, இலங்கை மிகவும் நடுநிலையான மற்றும் தொழில்முறை ரீதியான போக்கைக் கடைப்பிடித்துள்ளதாக அமைச்சர் ஜயசேகர சுட்டிக்காட்டினார்.

"யார் பக்கம் சாயாமல் நடுநிலை வகித்ததன் மூலம், பிராந்திய மோதலால் தேசிய பாதுகாப்பிற்குப் பாதிப்பு ஏற்படாத வகையில் நிலைமையைத் திறம்படக் கையாள முடிந்தது" என அவர் மேலும் தெரிவித்தார்.