நீரிணையைப் பாதுகாப்பதற்காகப் பிரித்தானியா உள்ளிட்ட நாடுகள் போர்க்கப்பல்களை அனுப்ப வேண்டும் என அமெரிக்க அதிபர் டொனால்ட் ட்ரம்ப் பகிரங்க வேண்டுகோள் விடுத்துள்ளார்.
சீனா, பிரான்ஸ், ஜப்பான் மற்றும் தென்கொரியா ஆகிய நாடுகளும் இந்தப் பாதுகாப்பு நடவடிக்கையில் இணைய வேண்டும் என அவர் தனது 'Truth Social' சமூக வலைத்தளத்தில் பதிவிட்டுள்ளார்.
ட்ரம்ப்பின் அதிரடி வாதம்
ட்ரம்ப் தனது பதிவில் குறிப்பிட்டுள்ளதாவது:
"ஈரானின் இராணுவ பலத்தை நாம் ஏற்கனவே 100 சதவீதம் அழித்துவிட்டோம். ஆனாலும், அவர்கள் இங்கொன்றும் அங்கொன்றுமாக ட்ரோன்கள் அல்லது ஏவுகணைகளை ஏவக்கூடும். இதனால் பாதிக்கப்படும் நாடுகள், இந்த 'செயற்கையான தடைகளை' தகர்க்கத் தமது போர்க்கப்பல்களை அனுப்ப வேண்டும்."
மேலும், அமெரிக்கா ஈரானியக் கடற்கரையோரங்களில் தொடர்ந்து குண்டுவீச்சுக்களை நடத்தும் என்றும், ஈரானியப் படகுகள் மற்றும் கப்பல்களைக் கண்ட இடத்திலேயே சுட்டு வீழ்த்தும் என்றும் அவர் எச்சரித்துள்ளார். "எப்படியாவது ஹார்முஸ் நீரிணையை நாம் விரைவில் சுதந்திரமான, பாதுகாப்பான பாதையாக மாற்றுவோம்" என அவர் உறுதிபடக் கூறியுள்ளார்.
பிரித்தானியாவின் பதில்
ட்ரம்ப்பின் இந்தக் கோரிக்கைக்குப் பதிலளித்துள்ள பிரித்தானிய பாதுகாப்பு அமைச்சின் (MoD) பேச்சாளர் ஒருவர்:
பிராந்தியத்தில் கப்பல்களின் பாதுகாப்பை உறுதிப்படுத்துவது குறித்து தமது நட்பு நாடுகளுடன் பல்வேறு தெரிவுகள் (Options) பற்றி ஆலோசித்து வருவதாகத் தெரிவித்துள்ளார்.
ஏற்கனவே HMS Dragon உள்ளிட்ட போர்க்கப்பல்களைப் பிரித்தானியா மத்திய தரைக்கடல் பகுதிக்கு அனுப்பியுள்ளமை குறிப்பிடத்தக்கது.
பொருளாதார நெருக்கடி
கடந்த பெப்ரவரி 28ஆம் திகதி போர் தொடங்கியதிலிருந்து இதுவரை 16க்கும் மேற்பட்ட கப்பல்கள் ஹார்முஸ் நீரிணையில் தாக்குதலுக்கு உள்ளாகியுள்ளன. இதனால் உலகச் சந்தையில் மசகு எண்ணெய் விலை பாரியளவில் உயர்ந்துள்ளது.
ஈரானின் 'கார்க் தீவு' (Kharg Island) மீதான தாக்குதலைத் தொடர்ந்து, ஈரான் தனது 'நெம்புகோலான' ஹார்முஸ் நீரிணையைத் தொடர்ந்து முடக்கி வருகின்றமை உலகப் பொருளாதாரத்திற்கு பெரும் சவாலாக மாறியுள்ளது.