ஈஸ்டர் தாக்குதலின் போது சுரேஷ் சலே இலங்கையில் இருக்கவில்லை!

சுரேஷ் சலே இலங்கையில் இருக்கவில்லை எனவும், அப்போது அவர் புலனாய்வுப் பிரிவின் தலைவராகப் பணியாற்றவில்லை எனவும் அவரது சட்டத்தரணி சஞ்சீவ சமரவிக்ரம தெரிவித்துள்ளார்.

கொழும்பில் நடைபெற்ற ஊடகவியலாளர் சந்திப்பொன்றில் உரையாற்றிய போதே அவர் இந்தத் தகவல்களை வௌியிட்டார்.

சட்டத்தரணி சமரவிக்ரமவின் விளக்கத்தின்படி, சுரேஷ் சலேவின் அக்காலப்பகுதியிலான நடமாட்டங்கள் பின்வருமாறு அமைந்துள்ளன:

வௌிநாட்டுப் பயணம்:
சுரேஷ் சலே 2016ஆம் ஆண்டு இலங்கையை விட்டு வௌியேறியதுடன், 2018 டிசம்பர் மாதத்திலேயே மீண்டும் நாட்டிற்குத் திரும்பியிருந்தார்.

இந்தியாவில் இராணுவப் பயிற்சி:
2019 ஜனவரி மாதம் முதல் நவம்பர் மாதம் வரை அவர் இந்தியாவில் உள்ள பாதுகாப்புப் பணிகள் பதவி நிலை உத்தியோகத்தர் கல்லூரியில் (Defence Services Staff College) உயர்மட்ட இராணுவப் பயிற்சியினைப் பெற்றுக்கொண்டிருந்தார்.

பதவி நியமனம்:
கோட்டாபய ராஜபக்ஷ ஜனாதிபதியாகப் பதவியேற்ற பின்னரே சுரேஷ் சலே மீண்டும் இலங்கைக்குத் திரும்பினார். அதன் பின்னரே அவர் இலங்கை அரச புலனாய்வுப் பிரிவின் (SIS) தலைவராக நியமிக்கப்பட்டார்.

சுரேஷ் சலே ஈஸ்டர் தாக்குதல்களுக்குப் பின்னரே புலனாய்வுப் பிரிவின் தலைமைப் பதவிக்கு நியமிக்கப்பட்டார் என்பதைச் சுட்டிக்காட்டிய சட்டத்தரணி, தாக்குதல் நடந்த தருணத்தில் அவர் இலங்கையிலேயே இல்லாத நிலையில், அவர் மீது சுமத்தப்படும் குற்றச்சாட்டுகள் அடிப்படையற்றவை எனவும் வாதிட்டார்.