கேள்விகளுக்குப் பதிலளித்துள்ள அமைச்சர் நலிந்த ஜயதிஸ்ஸ, 'மனிதாபிமான அடிப்படையில்' (Humanitarian basis) அந்தச் செலவுகளை அரசாங்கம் பொறுப்பேற்றுள்ளதாகத் தெரிவித்துள்ளார்.
இது தொடர்பாக ஊடகங்களிடம் கருத்துத் தெரிவித்த ஐக்கிய மக்கள் சக்தியின் (SJB) நாடாளுமன்ற உறுப்பினர் சுஜீவ சேனசிங்க, உயிரிழந்த மாலுமிகளின் சடலங்களைப் பாதுகாப்பதற்காகப் பயன்படுத்தப்படும் குளிரூட்டிகளுக்கான செலவுகள் குறித்துக் கேள்வியெழுப்பினார்.
"அமெரிக்கா மற்றும் இந்தியாவுடன் ஜனாதிபதி என்ன உடன்படிக்கைகளைச் செய்துள்ளார் என்பது எமக்குத் தெரியாது. அரசாங்கம் தேவையற்ற ஒரு சிக்கலில் சிக்கியுள்ளது. அங்கு 80-க்கும் மேற்பட்ட சடலங்கள் உள்ளன. அவற்றை எவ்வளவு காலம் வைத்திருக்கப் போகிறோம்? குளிரூட்டிகளுக்காக எவ்வளவு செலவாகிறது? மீட்கப்பட்ட மாலுமிகளை அமெரிக்காவும் ஈரானும் தேடி வருவதாகத் தகவல்கள் வெளியாகின்றன. இதனை நாம் எவ்வாறு எதிர்கொள்ளப் போகிறோம் என்பது தெரியவில்லை," என அவர் குறிப்பிட்டார்.
இதற்குத் தனது சமூக வலைத்தளப் பக்கத்தில் பதிலளித்துள்ள அமைச்சர் நலிந்த ஜயதிஸ்ஸ, மாலுமிகளின் சடலங்களைப் பராமரித்தல் மற்றும் அது தொடர்பான ஏனைய செயற்பாடுகளுக்கான செலவுகளை அரசாங்கமே பொறுப்பேற்றுள்ளதாகக் குறிப்பிட்டார்.
"அந்தச் சடலங்கள் இலங்கையில் இருக்கும் வரை, அந்த மாலுமிகள் இலங்கை அரசாங்கத்தின் பொறுப்பின் கீழ் இருக்கும் வரை மற்றும் காயமடைந்த ஈரானிய வீரர்கள் எமது வைத்தியசாலைகளில் சிகிச்சை பெறும் வரை, அவர்களுக்கான அனைத்துச் செலவுகளையும் இலங்கை அரசாங்கம் மனிதாபிமான அடிப்படையில் ஏற்கும்" என அவர் மேலும் தெரிவித்தார்.