வேலைவாய்ப்புகள் பாதிக்கப்படக்கூடும் என எச்சரிக்கை விடுக்கப்பட்டுள்ளது.
மேற்காசிய பிராந்தியத்தில் நிலவும் பதற்றநிலை காரணமாக, இலங்கையின் புலம்பெயர் தொழிலாளர் சந்தையில் ஏற்படக்கூடிய தாக்கம் குறித்து தற்பொழுது பல்வேறு கருத்துக்கள் முன்வைக்கப்பட்டு வருகின்றன. இது தொடர்பாக அரசாங்கத் தரப்பினருக்கும் தனியார் வேலைவாய்ப்பு முகவர்களுக்கும் இடையில் முரண்பட்ட நிலைப்பாடுகள் காணப்படுகின்றன.
இலங்கை வெளிநாட்டு வேலைவாய்ப்புப் பணியகத்தின் தரவுகளின்படி, போர்ச் சூழலால் இதுவரை எவ்வித வேலைவாய்ப்புகளும் உத்தியோகபூர்வமாக ரத்துச் செய்யப்படவில்லை. தற்போது ஏற்பட்டுள்ள பிரதான பாதிப்பு, இலங்கையிலிருந்து தொழிலாளர்கள் வௌிநாடுகளுக்குச் செல்வதில் ஏற்பட்டுள்ள பயணத் தாமதமே தவிர, வேலை ஒப்பந்தங்கள் இரத்துச் செய்யப்படவில்லை என பணியகம் தெரிவித்துள்ளது.
இருப்பினும், இலங்கை வெளிநாட்டு வேலைவாய்ப்பு முகவர் சங்கம் (ALFEA) இது குறித்து எச்சரிக்கை விடுத்துள்ளது. இது தொடர்பாக கருத்துத் தெரிவித்த அச்சங்கத்தின் செயலாளர் எம்.ஏ.எம். அர்ஷாத் பின்வருமாறு குறிப்பிட்டார்:
"இலங்கையின் வருடாந்த வெளிநாட்டு வேலைவாய்ப்புகளில் 80 முதல் 90 சதவீதமானவை மத்திய கிழக்கு நாடுகளிலேயே தங்கியுள்ளன. போர் நீடிக்குமானால், ஆட்சேர்ப்பு நடவடிக்கைகள் பாதிக்கப்படுவதுடன், இலட்சக்கணக்கான தொழிலாளர்களின் வாழ்வாதாரமும் அச்சுறுத்தலுக்கு உள்ளாகும்."