ஆழ்கடல் போதைப்பொருள் கடத்தலுக்கு மரண தண்டனை: புதிய சட்டம் அமுல்!

ஆயுள் தண்டனை விதிக்கும் புதிய சட்டம் இலங்கையில் உத்தியோகபூர்வமாக அமுல்படுத்தப்பட்டுள்ளது.

2026ஆம் ஆண்டின் 7ஆம் இலக்க நச்சுப்பொருள், அபினி மற்றும் அபாயகரமான மருந்துகள் (திருத்தச்) சட்டம் நாடாளுமன்றத்தில் நிறைவேற்றப்பட்டு, கடந்த மார்ச் 6ஆம் திகதி வர்த்தமானி மூலம் பகிரங்கப்படுத்தப்பட்டுள்ளது. சர்வதேச கடல்சார் போதைப்பொருள் கடத்தலை ஒடுக்கும் நோக்கில் இந்த நடவடிக்கை எடுக்கப்பட்டுள்ளது.

புதிய சரத்து (54AA): பிரதான சட்டக்கோவையில் சேர்க்கப்பட்டுள்ள இந்த புதிய பிரிவின்படி, ஆழ்கடலில் ஹெரோயின், கொக்கெய்ன், மோபின் மற்றும் அபினி போன்ற அபாயகரமான போதைப்பொருட்களை உற்பத்தி செய்வது முற்றாகத் தடை செய்யப்பட்டுள்ளது.

இலங்கை பிரஜைகள் மட்டுமன்றி, இலங்கையில் பதிவு செய்யப்பட்ட கப்பல்கள் அல்லது எந்தவொரு நாட்டிலும் பதிவு செய்யப்படாத (Stateless vessels) கப்பல்களில் பயணிக்கும் வெளிநாட்டவர்களுக்கும் இச்சட்டம் பொருந்தும்.

இவ்வாறான குற்றங்களில் ஈடுபட்டு மேல் நீதிமன்றத்தினால் குற்றவாளிகளாகக் காணப்படும் நபர்களுக்கு மரண தண்டனை அல்லது ஆயுள் தண்டனை விதிக்கப்படும்.

மேலும், சர்வதேச கடற்பரப்பில் போதைப்பொருட்களை வைத்திருத்தல் மற்றும் கடத்துதல் போன்ற செயற்பாடுகளுக்கும் கடுமையான தண்டனைகள் அறிவிக்கப்பட்டுள்ளன. அத்துடன், இவ்வாறான சட்டவிரோத நடவடிக்கைகளில் ஈடுபடுத்தப்படும் "நாடற்ற கப்பல்களை" (Stateless ships) பறிமுதல் செய்யும் அதிகாரம் அதிகாரிகளுக்கு வழங்கப்பட்டுள்ளது.

இலங்கைக் கடற்படையினரால் கடந்த 2025ஆம் ஆண்டு முன்னெடுக்கப்பட்ட பாரிய போதைப்பொருள் சுற்றிவளைப்புகளைத் தொடர்ந்தே இந்த சட்டத்திருத்தம் கொண்டுவரப்பட்டுள்ளது.

குறிப்பாக, சர்வதேச கடற்பரப்பில் கைது செய்யப்படும் வெளிநாட்டு சந்தேகநபர்களைத் தண்டிப்பதில் நிலவிய சட்டச் சிக்கல்களைத் தீர்ப்பதற்கு இந்த புதிய சட்டம் வழிவகுக்கும் என எதிர்பார்க்கப்படுகிறது.