காணொளிகளைக் கண்டறிந்து அவற்றைக் கட்டுப்படுத்துவதற்கான புதிய வசதியை யூடியூப் (YouTube) நிறுவனம் அறிமுகப்படுத்தியுள்ளது.
உலகளாவிய ரீதியில் தேர்தல்கள் நெருங்கி வரும் நிலையில், தவறான தகவல்கள் பரப்பப்படுவதைத் தடுக்கும் நோக்கில் இந்த நடவடிக்கை எடுக்கப்பட்டுள்ளது. இதன்படி, அரசியல் பிரமுகர்கள் மற்றும் ஊடகவியலாளர்கள் தமது உருவம் அல்லது குரல் அனுமதியின்றிப் பயன்படுத்தப்பட்டுள்ளதைக் கண்டறிந்து, அவற்றை நீக்குமாறு கோரிக்கை விடுக்க முடியும்.
செயற்கை நுண்ணறிவு (AI) மூலம் ஒருவரின் உருவத்தையோ அல்லது குரலையோ மிக எளிதாகப் போலியாக உருவாக்க முடியும் என்பதால், இந்தத் தொழில்நுட்பம் தவறாகப் பயன்படுத்தப்படுவதைத் தடுக்க யூடியூப் முன்னுரிமை அளித்துள்ளது.
2024 டிசம்பரில் முதன்முதலில் அறிமுகப்படுத்தப்பட்ட இந்த வசதி, ஆரம்பத்தில் முன்னணி நடிகர்கள் மற்றும் விளையாட்டு வீரர்களுக்கு மாத்திரமே வழங்கப்பட்டது. தற்போது சுமார் 4 மில்லியன் படைப்பாளிகள் (Creators) இதனைப் பயன்படுத்தி வரும் நிலையில், இந்த வசதி இப்போது அரசியல் மற்றும் பொதுத்துறை சார்ந்தவர்களுக்கும் விரிவுபடுத்தப்பட்டுள்ளது.
"படைப்பாளிகளைத் தாண்டி இந்தத் தொழில்நுட்பத்தின் தேவை இருப்பதை நாங்கள் அறிவோம். முதற்கட்டமாக ஒரு குறிப்பிட்ட குழுவினருடன் இந்த முன்னோடித் திட்டத்தை (Pilot project) ஆரம்பிக்கிறோம்" என யூடியூப் நிறுவனத்தின் படைப்பாளி தயாரிப்புப் பிரிவின் துணைத் தலைவர் அம்ஜத் ஹனிப் தெரிவித்துள்ளார்.
இருப்பினும், இந்த வசதி கருத்துச் சுதந்திரத்தைப் பாதிக்காத வகையில் கையாளப்படும் என யூடியூப் தெளிவுபடுத்தியுள்ளது. இது குறித்துக் கருத்து வெளியிட்ட அரசாங்க விவகாரங்கள் மற்றும் பொதுக் கொள்கைக்கான துணைத் தலைவர் லெஸ்லி மில்லர், "போலிக் காணொளிகளைக் கண்டறிவது என்பது அவை தானாகவே நீக்கப்படும் என்று அர்த்தமல்ல. பகடி (Parody), நையாண்டி மற்றும் அரசியல் விமர்சனங்களை உள்ளடக்கிய காணொளிகள் நீக்கப்படமாட்டாது" எனத் தெரிவித்துள்ளார்.
தற்போது இந்த வசதியைப் பயன்படுத்தும் பிரபலங்களிடமிருந்து வரும் நீக்கல் கோரிக்கைகள் மிகக் குறைவாகவே உள்ளதாகத் தெரிவித்துள்ள அந்நிறுவனம், பெரும்பாலான ஏஐ காணொளிகள் பாதிப்பில்லாத வகையிலேயே அமைந்துள்ளதாகவும் சுட்டிக்காட்டியுள்ளது.