இலங்கை மின்சார சபையின் தொழிற்சங்கங்கள் முன்னெடுத்துள்ள தொடர்ச்சியான வேலைநிறுத்தப் போராட்டம் காரணமாக, தடைப்பட்டுள்ள மின்சார விநியோகத்தை வழமைக்குக் கொண்டுவருவதற்குச் சற்று காலதாமதம் ஏற்படக்கூடும் எனத் தெரிவிக்கப்படுகிறது.
இலங்கை மின்சார சபையை மறுசீரமைத்த பின்னர், புதிதாக நிறுவப்பட்ட நிறுவனங்களுக்கு ஊழியர்களை இணைத்துக்கொள்ளும் போது முறையான நியமனக் கடிதங்களை வழங்காமை உள்ளிட்ட 8 கோரிக்கைகளை முன்வைத்து இந்தத் தொழிற்சங்க நடவடிக்கை ஆரம்பிக்கப்பட்டுள்ளது.
நேற்று (09) மாலை 3 மணிக்கு ஆரம்பமான இந்த 24 மணித்தியால அடையாள வேலைநிறுத்தப் போராட்டம் தொடர்ந்தும் முன்னெடுக்கப்பட்டு வருவதாக இலங்கை மின்சார தொழிற்சங்கங்கள் தெரிவித்துள்ளன.
தமது கோரிக்கைகளுக்கு உரிய தீர்வு வழங்கப்படாவிட்டால், தொழிற்சங்க நடவடிக்கையை மேலும் தீவிரப்படுத்தப் போவதாக இலங்கை மின்சார சபை தொழில்நுட்பவியலாளர் சங்கத்தின் தலைவர் கோசல அபேசிங்க தெரிவித்துள்ளார்.
எவ்வாறாயினும், மின்சார சபையை கலைத்து புதிய நிறுவனங்களின் கீழ் கொண்டுவருவதன் மூலம் ஊழியர்களின் உரிமைகளுக்கோ அல்லது சலுகைகளுக்கோ எவ்வித பாதிப்பும் ஏற்படாது என இலங்கை மின்சார சபை மறுசீரமைப்பு செயலணியின் தலைவர் புபுது நிரோஷன சுட்டிக்காட்டியுள்ளார்.