தாக்குதலிலிருந்து தப்பிய மற்றுமொரு ஈரானியக் கப்பல்: இந்தியா வழங்கிய அவசரத் தஞ்சமும் இலங்கையின் நிலையும்!

ஈரானியக் கப்பலான IRIS Lavan இந்தியாவினால் பாதுகாப்பாக பொறுப்பேற்கப்பட்டுள்ளமை தெரியவந்துள்ளது.

இந்தியாவில் நடைபெற்ற சர்வதேச கடற்படை அணிவகுப்பில் பங்கேற்க வந்திருந்த இக்கப்பலை, மனிதாபிமான அடிப்படையில் தரிக்க அனுமதிக்குமாறு ஈரான் விடுத்த அவசர வேண்டுகோளை இந்தியா ஏற்றுக்கொண்டுள்ளது.

கொச்சி துறைமுகத்தில் தஞ்சம்
அரசாங்க வட்டாரங்களின்படி, கடந்த மார்ச் 1ஆம் திகதி IRIS Lavan கப்பல் இந்தியாவின் கொச்சி துறைமுகத்தில் தரிக்க அனுமதிக்கப்பட்டது. இதன்படி, அக்காப்பலில் இருந்த 183 கடற்படையினரும் கொச்சியில் உள்ள இந்திய கடற்படை வசதிகளில் தங்க வைக்கப்பட்டுள்ளனர்.

தாக்குதலில் இருந்து தப்பியமைக்கான பின்னணி:
அவசர வேண்டுகோள்: அமெரிக்கா மற்றும் இஸ்ரேல் தமது 'Epic Fury' இராணுவ நடவடிக்கையை ஆரம்பித்த பெப்ரவரி 28ஆம் திகதியன்றே, ஈரானினால் இந்த வேண்டுகோள் விடுக்கப்பட்டது.

தொழில்நுட்பக் கோளாறு: குறித்த கப்பலில் 'தொழில்நுட்பக் கோளாறு' ஏற்பட்டுள்ளதால் அவசரமாகத் தரிக்க அனுமதிக்க வேண்டும் என ஈரான் கோரியிருந்தது.

IRIS Dena-வின் கதி: இந்தியாவின் 'மிலன்' (Milan) கடற்படைப் பயிற்சியில் பங்கேற்றுவிட்டுத் திரும்பிக் கொண்டிருந்த IRIS Dena கப்பல் மீது மார்ச் 4ஆம் திகதி தாக்குதல் நடத்தப்பட்டது. இதில் 87 ஈரானிய கடற்படையினர் உயிரிழந்தனர். இந்தியா எடுத்த இந்தத் தீர்மானத்தினால், IRIS Lavan கப்பலும் அதிலிருந்த 183 வீரர்களும் அமெரிக்க ஏவுகணைத் தாக்குதலில் இருந்து தப்பியுள்ளதாக அவதானிகள் கருதுகின்றனர்.

இலங்கையிடம் தஞ்சமடைந்த மூன்றாவது கப்பல்
இதேவேளை, மற்றுமொரு அமெரிக்கத் தாக்குதலுக்கு அஞ்சிய ஈரானிய கடற்படையின் மூன்றாவது கப்பலான IRIS Bushehr, இலங்கையின் உதவியை நாடியுள்ளது.

இக்கப்பலில் இருந்த வீரர்கள் தற்போது இலங்கையின் பாதுகாப்பில் உள்ள நிலையில், கப்பல் சர்வதேச கடற்பரப்பில் நங்கூரமிட்டுள்ளது. இதனைத் திருகோணமலை துறைமுகத்திற்கு கொண்டு வருவதற்கு இலங்கை நடவடிக்கை எடுத்து வருகின்றமை குறிப்பிடத்தக்கது.

இராஜதந்திர ரீதியிலான சவால்
இந்தியாவின் செல்வாக்குமிக்க கடல் பிராந்தியத்தில் இடம்பெற்ற இந்தத் தாக்குதலை, இந்தியாவின் பிராந்திய பாதுகாப்பு வழங்கல் (Security Provider) பாத்திரத்திற்கு விடுக்கப்பட்ட சவாலாக பலரும் கருதுகின்றனர். இது குறித்துக் கருத்துத் தெரிவித்த ஈரான் வெளிவிவகார அமைச்சர் செய்யது அராக்ச்சி, "தாக்கப்பட்ட கப்பல் இந்திய கடற்படையின் அதிதியாக அங்கு சென்றிருந்தது" எனச் சுட்டிக்காட்டியுள்ளார்.