மூழ்கடிக்கப்பட்டதை அடுத்து, அதன் சகோதரக் கப்பலான IRIS Bushehr மற்றும் மீட்கப்பட்ட கடற்படையினரின் எதிர்கால நடவடிக்கைகள் குறித்து, இலங்கை இராஜதந்திர மட்டத்திலான பேச்சுவார்த்தைகளை ஆரம்பித்துள்ளது.
ஈரானிய அதிகாரிகளுடன் இலங்கை இராஜதந்திர தூதுக்குழுவினர் இது தொடர்பான உத்தியோகபூர்வ கலந்துரையாடல்களை முன்னெடுத்துள்ளதாக 'டெய்லி மிரர்' (Daily Mirror) செய்தி வெளியிட்டுள்ளது.
தாயகம் திரும்புவதில் சட்டச் சிக்கல்கள்
ஈரானிய கடற்படையினரை மீண்டும் அவர்களின் நாட்டிற்கு அனுப்பும் (Repatriation) செயல்முறை நீண்டகாலம் எடுக்கலாம் என எதிர்பார்க்கப்படுகிறது. சர்வதேச கடல்சார் சட்டங்கள் மற்றும் 1907 ஆம் ஆண்டின் ஹேக் உடன்படிக்கையின் (Hague Conventions) படி, போரில் ஈடுபட்டுள்ள ஒரு நாட்டின் போர்க்கப்பலையோ அல்லது அதன் வீரர்களையோ ஒரு நடுநிலை நாடு (இலங்கை) பொறுப்பேற்கும் போது, போர் முடியும் வரை அவர்கள் மீண்டும் போரில் ஈடுபடுவதைத் தடுக்க அவர்களைத் தடுத்து வைக்க வேண்டியது அவசியமாகும்.
கடற்படையின் தேடுதல் நடவடிக்கைகள்
இதற்கிடையில், காலி கடற்பரப்பில் மாயமான ஏனைய ஈரானிய வீரர்களைக் கண்டறிய இலங்கை கடற்படை தொடர்ந்தும் தேடுதல் மற்றும் மீட்புப் பணிகளை முன்னெடுத்து வருகின்றது. இது குறித்து கருத்துத் தெரிவித்த கடற்படை ஊடகப் பேச்சாளர் புத்திக சம்பத், தற்போது இரண்டு கடற்படைக் கப்பல்கள் இப்பணியில் ஈடுபட்டுள்ளதாகவும், ஏனையவை தயார் நிலையில் வைக்கப்பட்டுள்ளதாகவும் குறிப்பிட்டார்.
நேற்று மாலை வரை மீட்கப்பட்ட 84 உடல்களுக்குப் பிறகு, மேலதிகமாக உடல்கள் எதுவும் இன்று கண்டெடுக்கப்படவில்லை. இந்த மீட்பு நடவடிக்கைகள் எவ்வித வெளிநாட்டு சக்திகளின் உதவியுமின்றி இலங்கை கடற்படையினரால் மாத்திரம் முன்னெடுக்கப்படுவதாக அவர் உறுதிப்படுத்தினார்.
திருகோணமலைக்கு மாற்றப்படும் கப்பல்
ஆரம்பக்கட்ட நடைமுறைகள் முடிந்ததும், IRIS Bushehr கப்பல் இலங்கை கடற்படையின் பாதுகாப்பில் திருகோணமலை துறைமுகத்திற்கு கொண்டு செல்லப்படவுள்ளது. அங்கு கொண்டு செல்லப்படும் கடற்படையினர் 'போர் வீரர்கள் அல்லாதோர்' (Non-combatants) என்ற அடிப்படையில் பாதுகாப்பான இடத்தில் தங்க வைக்கப்படுவர் என ஊடகப் பேச்சாளர் தெரிவித்தார். இலங்கையின் நடுநிலைமையை உறுதிப்படுத்துவதற்காகவே இந்த நடவடிக்கைகள் எடுக்கப்படுகின்றன.
ஜனாதிபதி அநுர குமார திஸாநாயக்கவின் அதிரடி முடிவு
பிராந்தியத்தில் நிலவும் பதற்றமான சூழலைக் கருத்திற்கொண்டு, 208 ஈரானிய கடற்படையினரை பாதுகாப்பாக கரைக்குக் கொண்டு வரவும், கப்பலைத் தனது பொறுப்பில் எடுக்கவும் ஜனாதிபதி அනුර குමාර திஸாநாயக்க உத்தரவிட்டிருந்தார்.
இது குறித்து ஜனாதிபதி செயலகத்தில் ஊடகங்களுக்குக் கருத்துத் தெரிவித்த ஜனாதிபதி:
"தாக்குதலுக்கு இலக்காகக்கூடிய ஒரு வெளிநாட்டு இராணுவக் கப்பல் கொழும்பு துறைமுகத்திற்கு அருகில் தங்கியிருப்பது பாதுகாப்பு ரீதியாக பாரிய அச்சுறுத்தலாகும். இது வர்த்தகக் கப்பல் போக்குவரத்து மற்றும் காப்புறுதிச் செலவுகள் அதிகரிப்பதற்கும் வழிவகுக்கும். எனவேதான் மனிதாபிமான அடிப்படையில் அவர்களைப் பாதுகாக்கவும், கப்பலை திருகோணமலைக்கு மாற்றவும் தீர்மானிக்கப்பட்டது."
சம்பவத்தின் பின்னணி
இந்தியாவின் விசாகப்பட்டினத்தில் நடைபெற்ற MILAN 2026 கடற்படை பயிற்சியில் பங்கேற்றுவிட்டுத் திரும்பிக் கொண்டிருந்த மூன்று ஈரானிய கப்பல்களில் IRIS Bushehr உம் ஒன்றாகும். இக்கப்பல் பனாந்துறை கடற்பரப்பில் இராஜதந்திர அனுமதிக்காகக் காத்திருந்த போதே, மார்ச் 4 ஆம் திகதி காலை காலி கடற்பரப்பிலிருந்து 19 கடல் மைல் தொலைவில் IRIS Dena கப்பல் அமெரிக்க நீர்மூழ்கிக் கப்பலால் தாக்கப்பட்டது.
இந்தத் தாக்குதலில் 32 பேர் உயிர் தப்பியதுடன், 84 உடல்கள் மீட்கப்பட்டன. இதனைத் தொடர்ந்து IRIS Bushehr கப்பலின் பாதுகாப்பு கருதி, அதனை இலங்கை துறைமுகத்திற்குள் நுழைய அனுமதிக்குமாறு விடுக்கப்பட்ட கோரிக்கையை அடுத்து, பாதுகாப்பு மற்றும் வெளிவிவகார அமைச்சுகளுடன் ஆலோசித்து அரசாங்கம் இம்முடிவை எடுத்தது.
தற்போது மீட்கப்பட்டுள்ள 53 அதிகாரிகள், 84 கடற்பயிற்சி மாணவர்கள் உட்பட 208 பேரும் வெலிசர கடற்படை முகாமிற்கு அழைத்துச் செல்லப்பட்டுள்ளனர். அங்கு அவர்களுக்கு மருத்துவப் பரிசோதனைகள் மற்றும் நலன்புரி உதவிகள் வழங்கப்பட்டு வருகின்றன.